Taratasy avy Amin’ny Filan-kevi-pitantanana

Ry mpiara-manompo malala,

Mpivavaka amin’i Jehovah isika dia tiantsika ny Teniny, izany hoe ny Baiboly. Resy lahatra isika fa tena marina ny tantara ao, sady azo ampiharina ny tari-dalana omeny, ary tena tia ny olona i Jehovah matoa nanome azy io. (Salamo 119:105; Lioka 1:3; 1 Jaona 4:19) Tena te hanampy ny olona hahafantatra ny marina ao amin’ny Tenin’Andriamanitra izahay, ka namoaka an’ity boky hoe “Andao Hianatra Tantara ao Amin’ny Baiboly” ity. Andao ange hojerentsika kely ny zavatra hita ato e!

Natao ho an’ny ankizy ity boky ity. Afaka manampy ny olon-dehibe koa anefa izy ity, raha tiany ny hianatra bebe kokoa ny Baiboly. Natao ho an’ny olona rehetra mantsy ny Tenin’Andriamanitra, ka azo antoka hoe handray soa daholo isika raha mandinika ny lesona azo ianarana ao. Hanampy antsika ho tena sambatra ireny lesona ireny!

Avy ao amin’ny Baiboly ny tantara ato amin’ity boky ity, ary resahina ato ny namoronana ny olombelona sy izay nitranga taorian’izay. Natao tsotra sy mora azo ireo tantara, ary natao milahatra arakaraka ny fotoana nisehoany, raha mbola azo natao koa.

Tsy hoe tantara tsotra fotsiny anefa no hita ato, fa misy sary koa, amin’izay hoatran’ny hoe tena iainantsika mihitsy ilay tantara. Natao velombelona koa ilay izy, mba ho tsapantsika mihitsy ny fihetseham-pon’ny olona ao amin’ilay izy.

Manampy antsika ity boky ity mba hahita hoe resahina ao amin’ny Baiboly na ny olona nankatò an’i Jehovah na ny olona tsy nankatò azy. Hahatonga antsika handray fianarana avy amin-dry zareo izany. (Romanina 15:4; 1 Korintianina 10:6) Misy fizarana 14 ity boky ity, ary fintinina eo am-piandohan’ny fizarana tsirairay ny zavatra azontsika ianarana sy tadidina.

Raha manan-janaka ianao, dia azonao atao ny mamaky lesona iray amin’ny zanakao, ary miresadresaka momba ny sary. Azonareo mianaka vakina avy eo ny andinin-teny ao amin’ny Baiboly misy an’ilay tantara. Ampio izy hahita hoe inona no ifandraisan’izay novakiny tao amin’ny Baiboly sy ny lesona resahina ato. Afaka manao hoatr’izany koa ianao rehefa manampy olon-dehibe hahazo ny zavatra resahin’ny Baiboly amin’ny ankapobeny.

Mino izahay fa hanampy ny olona tso-po ity boky ity, na ankizy izy na olon-dehibe, mba hampihatra an’izay ianarany avy ao amin’ny Tenin’Andriamanitra. Amin’izay ry zareo ho tia an’i Jehovah sy hivavaka aminy, ary ho lasa anisan’ny fianakaviany.