AGAGA

(Agàga).

Anarana na anaram-boninahitra niantsoana mpanjaka amalekita sasany.

1. Nilaza i Balama tao amin’ilay faminaniana fahatelo nambarany, fa “hisandratra avo noho i Agaga” ny mpanjakan’ny Israely “ary hasandratra ny fanjakany.” (No 24:7) Tany amin’ny 1473 T.K. tany ho any izy no nilaza ireo teny ireo. Tsy voaresaka intsony ny momba an’i Agaga, raha tsy tamin’ny andron’i Saoly Mpanjaka indray (1117-1078 T.K.). Misy manam-pahaizana àry milaza fa anaram-boninahitra niantsoana an’ireo mpanjaka amalekita ilay hoe “Agaga”, tsy misy hafa amin’ny hoe Farao, izay anaram-boninahitra niantsoana ny mpanjakan’i Ejipta. Mety ho anaran’olona mitovy koa anefa izy io. Na ahoana na ahoana, dia hita taratra amin’ny tenin’i Balama fa nisy fotoana nampahatanjaka ny fanjakan’i Agaga.​—No 24:20; jereo AMALEKA, AMALEKITA.

2. Mpanjaka amalekita resin’i Saoly Mpanjaka. Nasain’i Jehovah haringana mantsy ny Amalekita. (Ek 17:14; De 25:17-19; 1Sa 15:1-7) Tsy novonoin’i Saoly anefa i Agaga, ary navelany haka tamin’ireo biby azo babo ny olona. Nilaza àry i Samoela fa nolavin’Andriamanitra tsy ho mpanjaka i Saoly. (1Sa 15:8-29) Novonoin’i Samoela i Agaga sady hoy izy: “Nataon’ny sabatrao fongana ny zanaky ny vehivavy, koa mba hatao fongana toy izany koa ny zanaky ny reninao, ka amin’ny vehivavy rehetra dia izy no ho fongana anaka indrindra.”​—1Sa 15:32, 33; ampit. Mpts 1:5-7.