AINA, II

(Àina) [Loharano].

Midika ara-bakiteny hoe “maso”, ary ilazana loharano voajanahary mba hiavahany amin’ny rano avy amin’ny lavadrano na sinibe namboarin’olombelona, izay nantsoin’ny Hebreo hoe beʼer sy bôhr. (Ge 49:22; De 8:7; jereo LAVADRANO; LAVAKA FANANGONAN-DRANO.) Matetika izy io no soratana hoe “En-” rehefa miaraka amin’ny anarana hafa, toy ny hoe En-rimona, En-jedy, En-ganima.

1. Toerana iray notononin’i Jehovah tamin’i Mosesy rehefa nofaritana ny sisin-tanin’ny Israely tany atsinanana. (No 34:11) Lazain’io andininy io fa “any atsinanan’i Aina” no misy an’i “Ribla.” Tsy ilay Ribla any Hamata any avaratr’i Damaskosy izy io matoa tononina miaraka amin’ny Ranomasin’i Kinereta (Galilia). Any avaratr’io ranomasina io no misy an’i Aina, na dia tsy fantatra aza izay tena nisy azy.

2. Anisan’ny tanàna farany atsimo nomena ny fokon’i Joda tany am-boalohany (Js 15:32) fa nomena ho anjara lovan’ny fokon’i Simeona tatỳ aoriana satria nalalaka be ny anjara tanin’i Joda. (Js 19:1, 7, 9; 1Ta 4:24, 32) Akaikin’ny tanànan’i Rimona i Aina, ary toa nakambana ho lasa En-rimona ny anaran’ireo tanàna roa ireo, rehefa nisy mponina indray tany, taorian’ny sesitany tany Babylona. (Ne 11:29) Maro àry no mihevitra azy io ho i Kirbet Omm er-Ramamin (Horvat Remalya), tokotokony ho 15 km any avaratr’i Beri-sheba.​—Jereo RIMONA No. 2.

3. Lazain’ny Josoa 21:16 fa anisan’ny tanàna nomena ho an’ny Levita i Aina. Rehefa ampitahaina anefa io andininy io sy ny Josoa 15:42; 19:7 ary ny 1 Tantara 6:59 dia hita fa iray ihany i Aina sy Asana.​—Jereo ASANA.