ANTRENDRY

Voankazo sy hazo (Phoenix dactylifera) anisan’ny fianakavian’ny palmie fahita any Palestina. Boribory lavalava ilay voankazo, be nofo, mamy, ary misy voany iray.

Nampiasain’ny Baiboly ao amin’ny fanoharana ny antrendry. Nilaza, ohatra, ilay tovovavy solemita fa ny volon’ilay mpiandry ondry tiany dia toy ny “antrendry maro eo amin’ny tangozany” (“sampam-palafa”, Kat.; heb.: taltallim, ‘antrendry iray tangozana’, Lexicon in Veteris Testamenti Libros, nataon’i L. Koehler sy W. Baumgartner, Leyde, 1958, p. 1030). Toy ny hazo palmie ilay tovovavy rehefa mijoro, hoy i Solomona, ary toy ny “antrendry” (‘sampahon’antrendry’, Kat.) ny nonony.​—To 5:11; 7:7, 8; jereo PALMIE.