LEBA-KAMAY

[Fon’ireo Mitsangana Hanohitra Ahy].

Toa anarana hafa niantsoana an’i Kaldea, na Kasdim. Ao amin’ny Jeremia 51:1 ihany no ahitana azy io. Voalaza ao izay hataon’i Jehovah amin’i Babylona sy ny mponin’i Kaldea. Ny fomba fanoratra athbash no nahazoana an’ilay teny hoe Leba-kamay eo. Ny litera farany (tav) amin’ny abidy hebreo no nasolo ny litera voalohany (ʼalef), ny litera alohan’ny farany (shin) no nasolo ny litera faharoa (beht), ary toy izany hatrany. Ilay teny hebreo hoe Lev kamai (Leba-kamay) àry no nampiasaina ao amin’ny Jeremia 51:1, mba tsy hahafantarana an’ilay tena anarana hoe Kasdim. Tsy mampiasa hoe “Leba-kamay” ny Fandikan-teny Grikan’ny Fitopolo fa hoe “ny Kaldeanina”, ary ny Targoma manao hoe “ny tanin’ny Kaldeanina.”