TAMOZA, I

(Tamòza).

Andriamanitra nitomanian’ireo vehivavy hebreo nivadi-pinoana tany Jerosalema, tamin’ny taona fahenina (612 T.K.) nanaovana sesitany an’i Ezekiela mpaminany.​—Ezk 8:1, 3, 14.

I Domozy no iantsoana an’i Tamoza ao amin’ny asa soratra somerianina, ary vady na sakaizan’i Inanna (Ishtar babylonianina) andriamanibavin’ny fahavokarana izy. Mety ho mpanjaka i Tamoza taloha, fa natao andriamanitra rehefa maty. I Domozy no niantsoana an’ireo mpanjakan’i Somera, araka ny asa soratra somerianina izay toa nosoratana tamin’ny taonjato faha-18 T.K.

Hoy i D. Wolkstein sy S. Kramer momba an’i Tamoza: “Maromaro ihany ireo ‘andriamanitra maty’ tany Somera fahiny, fa i Domozy na ilay antsoin’ny Baiboly hoe Tamoza no tena be mpahalala. Mbola nitomany azy ny vehivavy tany Jerosalema tamin’ny andron’i Ezekiela mpaminany. Mpitondra somerianina mety maty i Domozy andriamanitra, tany am-boalohany. Nisy vokany lalina teo amin’ireo filozofa sy mpanoratra angano somerianina ny fiainany sy ny fahafatesany.” (Inanna, Mpanjakavavin’ny Lanitra sy ny Tany, New York, 1983, p. 124) Hoy koa i O. Gurney: “Lehilahy mpanjakan’i Ereka i Domozy, tany am-boalohany ... Olona tokoa izy satria misy angano milaza fa niteny toy izao tamin’i Inanna izy: ‘Hoentiko any an-tranon’andriamanitro ianao.’ Tsy hilaza zavatra hoatran’izany mihitsy raha andriamanitra.”​—Gazety Mandalina ny Fiteny Semitika, Boky Faha-7, 1962, p. 150-152.