MITOMANY

Mandatsa-dranomaso rehefa mihetsi-po mafy, ohatra hoe malahelo. Nitomany ny vehivavy sy ny lehilahy fahiny, anisan’izany ny miaramila mpiady mahery toa an’i Davida. Tsy nihevitra izy ireo hoe kanosa ny olona matoa mitomany. (Ge 42:24; 43:30; 45:2, 3, 14, 15; 46:29; Rt 1:9, 14; 2Sa 13:36; Jb 30:25; Sl 6:6-8) Anisan’ny tena nampitomany ny fahafatesan’ny havana na namana. (2Sa 18:33–19:4; Lk 7:11-15; 8:49-56; Jn 20:11-15) Mety hahatonga ny firenena iray manontolo hitomany ny fahafatesan’ny olona manan-kaja na mamy hoditra (2Sa 3:31-34), ka indraindray dia nisy fotoana lava natokana hanehoana alahelo. (Ge 50:1-3, 10, 11; No 20:29; De 34:8) Nitomany koa ny olona rehefa resy an’ady (De 1:44, 45; Je 31:15; Ft 1:16), lasa babo (Sl 137:1), nampahorina (Mpto 4:1), nisy loza nananontanona (Es 3:13, 14; 4:1-4), ary nanenina noho ny fahotana (Ezr 10:1-4; Je 3:21, 22; 31:9; Jl 2:12; Lk 22:54-62; Jk 4:8, 9; jereo FISAONANA). Anisan’ny fombafomba fivavahana tamin’ilay andriamanitra babylonianina hoe Tamoza ny fitomaniana.​—Ezk 8:14.

Ankoatra ny fahafatesana sy ny fahoriana, dia matetika koa ny fiahiana sy ny fitiavana lalina ny hafa no mahatonga ny olona hitomany. Izany no nahatonga ny apostoly Paoly hilaza hoe nananatra sy nanitsy tamin-dranomaso an’ireo mpiray finoana taminy izy. (As 20:31; 2Ko 2:4) Nitomany izy rehefa niresaka momba an’ireo “mitsangan-ko fahavalon’ny hazo fijalian’i Kristy.” (Fi 3:18, 19) Nitomany daholo ireo mpiandraikitra teo anivon’ny fiangonan’i Efesosy rehefa nandre fa mety tsy hahita an’i Paoly intsony izy ireo. Nifankatia be mantsy i Paoly sy ireo mpiandraikitra ireo.​—As 20:36-38.

Nisy mpanompon’i Jehovah nitomany rehefa nivavaka, anisan’ireny i Hana, Hezekia ary Nehemia. (1Sa 1:9-11; 2Mp 20:1-5; Ne 1:2-4; Sl 39:12) Na i Jesosy aza, tamin’izy teto an-tany, dia “nitaraindraina mafy sy nitomany” rehefa nitalaho sy niangavy tamin’ny Rainy.​—He 5:7.