Fanontanian’ny Mpamaky
● Raha toa ny kristianina iray ka nanitsakitsa-bady, nibebaka ary niaiky ny fahotany tamin’ny komity mpitsara ao amin’ny fiangonana kristianina, moa ve izy tokony hiaiky amin’ny vadiny koa fa nanitsakitsaka azy, na dia hampijaly an’io mafy aza izany?
Eny, manana adidy ny kristianina iray hampahafantatra ny fahadisoany amin’ny vadiny tsy diso, alohan’ny hahafahan’ireo anisan’ny komity mpitsara hanaiky fa tamim-pahatsorana tokoa no nibebahany. Mandoto ny fandrian’ny mpivady ny fanitsakitsaham-bady ary ampy hahatonga an’ilay vady tsy diso ho afaka hisaraka sy hanana fahalalahana hanambady indray, araka ny Soratra Masina (Matio 19:9). Manana zo tanteraka hahafantatra izay nitranga àry io vady tsy diso io.
Raha ny marina dia tsy ny fiaikena ny fanitsakitsaham-bady mihitsy no mampalahelo an’ilay vady tsy diso. Noho izany antony izany no tokony ho nieritreretan’ilay vady nijangajanga tsara ny voka-dratsin’ny ataony, alohan’ny hanaovany izany, ary tsy tokony ho resin’ny fakam-panahy izy. Rehefa natao ilay fahadisoana, dia efa diso aoriana loatra raha amin’izay vao hanomboka hieritreritra ny amin’ny fomba hisorohana ny fijalian’ilay vady tsy diso.
Na dia mety hijaly mafy aza izy io rehefa mandre ny nanitsakitsahana azy, izany akory tsy hoe tsy maintsy hanapaka ny fanambadiana. Rehefa nandre ny fiaikena amim-pahatsorana sy ny fangatahana famelana azy ilay vady tsy diso, dia afaka manapa-kevitra ny hamela ny helok’ilay meloka. Araka izany, ny fiaikena dia mahatonga an’ilay lehilahy sy ilay vehivavy ho afaka handinika tsara ny fanambadiany ka hihevitra izay azo atao mba hanatsarana ny fifandraisan’izy ireo sy hanalavirana ny fiverenan’ny fahadisoana toy izany indray. Angamba aza ilay vady tsy diso nety ho nahatonga ny fivadihan’ny iray. Ohatra, raha toa ny vehivavy iray ninia nanaisotra tamin’ny vadiny ny zony amin’ny maha-vady, dia misy andraikiny amin’izay nitranga. Araka ny fiheveran’Andriamanitra dia tsy hoe tsy nanan-tsiny mihitsy izy akory, satria manome izao torohevitra izao ny Baiboly: “Aoka ny lahy hanao izay mety hatao amin’ny vavy; ary mba toy izany koa ny vavy amin’ny lahy. ... aza misara-pandriana hianareo, raha tsy amin’izay andro sasany ifanekenareo ho andro hivavahana, nefa mbola hiraisanareo fandriana indray, mba tsy hakan’i Satana fanahy anareo noho ny tsy faharetanareo.”—1 Korintianina 7:3-5.
Ankoatry ny fanomezany fahafahana hametraka fanorenana ho amin’ny fanambadiana tsaratsara kokoa, ny fiaikena dia mety hampanalavitra zava-manahirana lehibe hafa koa. Raha mbola manafina hatrany koa ny fahadisoany ilay nanitsakitsa-bady, dia tsy mety hanana fieritreretana tsara eo anoloan’ny vadiny. Mety hiseho izany na eo amin’ny teniny na eo amin’ny ataony. Mety hahatsapa ilay vady tsy diso fa misy zavatra tsy metimety ka hiresaka ny amin’izany izy. Mba hiarovan-tena dia handainga angamba ilay vady diso ka hanampy ny fahadisoany izany. Farany dia hanao ratsy kokoa noho ny raha niaiky ny nataony sy nitady ny famelan’ny vadiny izy.
Raha tena mibebaka tokoa ny lehilahy iray na ny vehivavy iray meloka ho nanitsakitsa-bady ka maniry hiaro ny fanambadiany, dia tokony hitady ny famelan’ilay vadiny tsy diso izy. Raha mamela heloka io, dia afaka miara-miasa izy roroa ka miezaka hiaro ny fandrian’ny mpivady amin’izay rehetra mety ho fahalotoana (Hebreo 13:14). Koa satria tafiditra amin’izany ny fahadiovan’ny fiangonana ara-pitondran-tena, dia tokony hahariharin’izy ireo amin’ny komity mpitsara ao amin’ny fiangonana koa izay nitranga.