“Fa aiza ny sivy?”
NY FITANTARANA araka ny Baiboly ny amin’ny boka folo nositranin’i Jesosy dia manazava tsara ny fifanoheran-javatra hita eo amin’ny olona izay miseho ho mahay mankasitraka sy ireo manao tsirambina izany. Ireo boka noraran’ny Lalàna tsy hanatona na iza na iza, dia niantsoantso an’i Jesosy raha mbola niditra tao amin’ny vohitra iray izy. Nitalaho taminy izy mba hamindrafo tamin’izy ireo. Rehefa hitan’i Jesosy fa boka izy ireo, dia hoy izy taminy: “Mandehana, misehoa amin’ny mpisorona.” Inona no nitranga tamin’izay? Manampy teny toy izao ny fitantarana:
“Ary rehefa lasa izy ireo, dia nadio teny am-pandehanana. Ary ny anankiray tamin’ireo, raha nahita fa sitrana izy, dia niverina ka nankalaza an’Andriamanitra tamin’ny feo mahery sady niankohoka tamin’ny tongotr’i Jesosy ka nisaotra Azy; ary Samaritana iny lehilahy iny. Dia namaly Jesosy ka nanao hoe: Tsy efa voadio avokoa va izy folo lahy? fa aiza ny sivy? Moa tsy nisy hita niverina hanome voninahitra an’Andriamanitra afa-tsy ity olona hafa firenena ity ihany va?” — Lioka 17:11-19.
‘Mampalahelo tokoa, hoy angamba ianao, raha tamin’ny boka folo lahy nositraniny, dia anankiray monja no naneho ny fankasitrahany.’ Tsy isalasalana fa isika rehetra dia tokony handatsaka am-po ny fianarana azo tsoahina avy amin’ny fanamarihan’i Jesosy sy ny fanontaniany hoe: “Fa aiza ny sivy?” Izany zavatra niseho izany koa dia tokony hanosika antsika hiseho hahay hankasitraka.
Aoka isika hiseho hahay hankasitraka ny mpianakavintsika
Manana fotoana maro ahafahana mampiseho ny fankasitrahantsika ny hafa, isika, indrindra fa ireo namantsika sy mpianakavintsika. Marina izany na dia amin’ny zavatra madinika aza: fanomezana tsy nampoizintsika, fitsidihan’ny sakaiza iray, sakafo tsara na fanasana sy fipasohana ny akanjontsika.
Ry zanaka, azonareo atao ny mampiseho ny fankasitrahanareo ny ray aman-dreninareo. Amin’ny fomba ahoana? Amin’ny fanatontosana haingana sy tsy mingonongonana ny adidinareo isan’andro, amin’ny fitananareo ny efitranonareo ho madio sy amin’ny fandaminana tsara ny fitafianareo. Afaka mampiseho ny fankasitrahanareo noho ny fanabeazana azonareo ianareo amin’ny fiezahana tsara manao ny asanareo any an-tsekoly na ny enti-modinareo. Tany amin’ny tany iray, dia notombanana fa 3 550 000 ariary no nilaina mba hitaizana zaza iray hatreo amin’ny fahafolo taonany. Oviana no nilazanareo farany tamin’ireo ray aman-dreninareo ny fankasitrahana tsapanareo ny aminy noho izay rehetra nataony ho anareo?
Ry ray aman-dreny, asehonareo ve fa mankasitraka izay tontosain’ny zanakareo ianareo? Angamba tsy tsara toy ny ataonareo ny ataony. Nefa hahafaly azy raha manao teny fisaorana azy vitsivitsy ianareo noho ny fiezahany. Ary amin’izany ianareo dia hamporisika ny zanakareo mbola hanao tsaratsara kokoa ihany amin’ny ho avy.
Ry lehilahy, tsaroanareo ve fa “tsy mety vita mihitsy ny asan’ny vehivavy iray”? Amin’izany, moa ve ianareo midera ny vadinareo mba tsy hahatonga ny asany ao an-tokantrano hanorisory azy? Raha ny amin’ny “vehivavy mahay”, dia izao no lazain’ny Baiboly: “Ny zanany mitsangana ka midera azy hoe sambatra; ny lahy koa mitsangana ka midera azy hoe: Maro ny zazavavy nanao soa, fa hianao manoatra noho izy rehetra.” (Ohabolana 31:10, 28, 29). Ny lehilahy iray dia afaka mampiseho ny fankasitrahany ny vadiny amin’ny fomba maro, angamba amin’ny fiaraha-mivoaka aminy indray takariva na amin’ny fanehoam-pitiavana.
Ry vehivavy, ianareo koa dia manana fahafahana maro hiseho hahay hankasitraka. Mba hamelomana ny fianakaviana, ny lehilahy iray dia mandrakariva no tsy maintsy miasa miaraka amin’ny olona izay ny toetrany sy ny fahazarany dia hafa noho ny azy, ka izany dia mety hahaketraka azy tokoa. Koa rehefa mody ao an-trano izy, dia manohina azy indrindra ny fandraisan’ny vadiny azy amim-pitiavana na ny teny fankasitrahana vitsivitsy mety hataony ho azy noho izay rehetra ataony ho an’ny fianakaviana. Eny, ho feno fankasitrahana marina tokoa ny vady mahay — sy mankasitraka — ny lehilahy iray! Izao no vakina ao amin’ny Baiboly: “Fa ny tombany dia mihoatra lavitra noho ny voahangy. Matoky azy ny fon’ny lahy, ary tsy mitsahatra ny fanambinana azy. Soa no ataon-dravehivavy aminy, fa tsy ratsy, amin’ny andro rehetra iainany.” — Ohabolana 31:10-12.
Aoka hojerentsika koa ny amin’ny ray aman-dreny be taona. Nanao zavatra be dia be ho an’ny fianakaviana izy ireny tao anatin’ny taona maro. “Lova avy amin’i Jehovah” ny zanaka, nefa andraikitra lehibe koa ny fitaizana azy ireny (Salamo 127:3). Raha ny marina, dia ho azo atao ny milaza fa izany dia fandaharam-pampiofanana maharitra roapolo taona. Zanaka be dia be anefa no tsy maneho fankasitrahana ny ray aman-dreniny noho izany taona feno fandavan-tena sy fahafoizan-tena izany. Matetika tokoa ny ray aman-dreny be taona no atao any amin’ny trano voatokana ho an’ny antitra. Marina fa ilaina indraindray ny fanaraha-mason’ny mahay ao amin’ny trano toy izany. Nefa na manao ahoana na manao ahoana fahaizan’ireny olona ireny, ny mety ho fikarakarany ny ray aman-dreny be taona dia tsy mitovy amin’ny maha-ao anatin’ny fianakavian’ny tena. Koa raha azo atao ary rehefa ilaina izany, fomba tsara toy inona fanaporofoana ny fankasitrahantsika an’ireo ray aman-drenintsika be taona moa ny fanasana azy ireny hiara-monina amintsika! Izany no nasehon’ny apostoly Paoly toy izao: “Fa raha misy mpitondratena manana zanaka na zafy, aoka ireo hianatra aloha haneho izay toe-panahy araka an’Andriamanitra amin’ny ao an-tranony ka hamaly soa ny ray aman-dreniny; fa izany no ankasitrahana eo anatrehan’Andriamanitra.” (I Timoty 5:4). Mazava ho azy fa ireo ray aman-dreny be taona na raibe aman-drenibe dia tokony hiara-miasa sy hampiseho ny fahaizany mankasitraka noho izay rehetra atao ho azy ireny.
Any ivelan’ny faritry ny fianakaviana
Rehefa milaza amintsika ny fankasitrahany noho izay nolazaintsika na nataontsika ny mpianakavintsika, moa ve tsy manafana ny fontsika izany? Toy izany koa, ireo tsy anisan’ny fianakaviantsika dia voatohina noho ny mari-pankasitrahana asehontsika aminy noho izay nolazainy na nataony. Be dia be aoka izany ny fahafahana manao toy izany, hany ka tsy azo atao ny manonona azy rehetra.
Angamba vao haingana ianao no nanomboka nandalina ny fampianarana ao amin’ny Baiboly noho ny fianarana manokana na tamin’ny fiarahana amin’ny Vavolombelon’i Jehovah. Rehefa mandroso ny tena eo amin’ny fahalalana ny Tenin’Andriamanitra, moa ve tsy misy soa ara-panahy raisina avy amin’izany? Tsy isalasalana mihitsy fa zavatra ankamaminao izany. Inona koa no holazaina ny amin’ireo namana kristiana anananao ankehitriny? Lazain’ny Soratra Masina fa Jehovah Andriamanitra dia ‘hampihorohoro ny firenena rehetra’ ka “izay irin’ny firenena rehetra” dia hiditra ao amin’ny trano fivavahany. Miharihary tokoa fa ireny “irin’ny firenena” ireny dia olona izay mirohotra ho ao amin’ny “tendrombohitra misy ny tranon’i Jehovah”, izay mivavaka aminy “amin’ny fanahy sy ny fahamarinana”. (Isaia 2:2-4; Hagay 2:7; Jaona 4:23, 24.) Maneho fitiavana ireny olona ireny; izy ireny dia marina, tsy mivadika sy mifikitra lalina amin’Andriamanitra sy amin’ny fotopoto-pitsipiny marina. Eritrereto kely ange! Eo amin’izao tontolo izao voamariky ny tsy fisiam-pitiavana, ny fanaovana ny tsy marina sy ny tsy fahaiza-mankasitraka, ny tenanao dia manana tombontsoa miaraka amin’ny namana tsara dia tsara izay manompo an’Andriamanitra (II Timoty 3:1-5). Moa ve ianao tsy manana antony tokony hisehoana ho velom-pankasitrahana lalina satria mandray soa amin’ny fiarahana toy izany? Azo antoka fa izany tokoa.
Mifanohitra amin’izany kosa, dia mety ho nanaraka fomba fiaina kristiana hatramin’ny taona maro ianao. Raha izany no izy, dia aoka isika hieritreritra ireo namantsika kristiana efa hatramin’ny fotoana vitsivitsy sahady izao. Tsy isalasalana fa mety ny hisaorana azy ireny noho ny mariky ny hatsaram-pony maro be amin’ny teny sy ny atao. Angamba izy ireny nandray antsika ho ao an-tranony na nanasa antsika hisakafo. Ary koa, ambonin’ny teny fisaorana vitsivitsy, moa ve tsy hety ny hanoratana ho azy ireny teny kely na handefasana “carte” ho azy mba hilazana aminy ny fankasitrahantsika?
Ny tsirairay avy amintsika dia tsy isalasalana mihitsy fa afaka mahita fomba maro hitondrana fahasambarana ho an’ny tenantsika sy ho an’ny hafa amin’ny fisehoana ho mahay mankasitraka amim-pahatsorana. Aoka isika hanahaka an’ilay hany boka sitrana izay tena nanana fihetsika nahay nankasitraka. Aoka isika tsy ho tsy mahay misaotra sahala amin’ireo hafa nahatonga an’i Jesosy hanontany hoe: “Fa aiza ny sivy?”’
Tokony hampiseho mazava isika fa mankasitraka ny namantsika. Fa inona no azontsika atao amin’Ilay namorona ny zavatra rehetra (Apokalypsy 4:11)? Inona no antony tokony hahafeno fankasitrahana an’i Jehovah Andriamanitra antsika, ary ahoana no azontsika anehoana aminy izany?