Ny herin’ny fitsikiana
“Rehefa nitsiky tamiko ireo vehivavy roa ireo, dia nanontany tena kelikely aho raha efa nahita azy ireo taloha.” Nanoratra ireo teny ireo i Kazuhiko Nagoya, mpandahatra tantara ao amin’ny Daily Yomiuri any Tokyo tao amin’ny lahatsorany hoe “Ny siran’ny fiainana”. Izao no azo novakina tao: “Noho ny fitsikiany dia ho noheverina fa efa nahita ahy izy ireo tamin’ny fihaonana taloha ka faly nahita ahy indray.” Tsy izany velively anefa no izy. Nibanjina azy ireo aho ka tsapako fa tsy fantatro tanteraka izay ireo.” Rehefa nitsiky tamin’io lehilahy io koa ny olona hafa roa, dia izao no nambarany: “Nahatsiaro ho sambatra aoka izany aho. Izany dia ny fomba fitsikin’ireo olona ireo amin’ny vahiny iray rehefa voamarik’izy ireo izy ao amin’ny anankiray amin’ireo fivoriany.”
Olona iza no mandray vahiny amim-pahatsaram-panahy toy izany? Nanampy teny toy izao i Nagoya: “Izany dia nitranga tao amin’ny Okoku Kaikan (ny Efitrano Fanjakana iray), ny anankiray amin’ireo trano maro any Japon ivorian’ny Vavolombelon’i Jehovah.” Nanao izao fanamarihana hafa izao koa izy: “Misy zavatra iray manaitra: ny olona mivory ao amin’ny efitrano intelo isan-kerinandro dia mpanaraka ny kristianisma amin-kafanam-po daholo. Tsy misy aminy mihitsy manatrika an’ireo fivoriana amin’ny anarany fotsiny na noho ny fahazarana fotsiny. Ny herin’ny finoana dia manakambana an’ireny lehilahy sy vehivavy ary ankizy ireny izay mifampiantso hoe ‘kyodai’ (rahalahy na anadahy) na ‘shimai’ (anabavy na rahavavy). Ary ny herin’ny finoana dia nanintona olona betsaka kokoa ihany ho amin’ny fandaminan’izy ireo tao anatin’ireo taona.”
Ho famaranana, io mpandahatra tantara io dia niresaka ny amin’ny fitsidihana hafa iray natao tany amin’ny Efitrano Fanjakana ka nanao hoe: “Nadiva handeha aho taorian’ny fivoriana, rehefa nanatona ahy ny zazalahy iray eo amin’ny folo taona eo ka niteny tamiko hoe: ‘Faly izahay noho ny nahatongavanao androny. Miverena indray any aoriana, raha sitrakao.’ Nohazavain’ilay fitsikiana ihany koa ny endriny. Faly aho satria vao voalohany no nisy zazalahy mitovy taona amin’io tsy fantatro, nitsiky tamiko sy niresaka tamiko toy izany.”