Nahazo tanjaka mihoatra noho ny hery fahita izy ireo

REHEFA mamely ny fahafatesana ao amin’ny fianakaviana anankiray, dia tsy miovaova fa fisedrana mafy izany ho an’ny mpianakavy rehetra, indrindra rehefa zaza no paohiny. Nefa ahoana no ho fihetsikao raha vao avy namoy tsy ela toy izany ny zanakao ianao, dia voampanga ho namono olona noho ny tsirambina ambonin’izany, raha raisina ho toy ny mpamono olona ianao, raha nanapa-kevitra ny handroaka anao ny mpampiasa anao ary raha manohitra anao ireo mpifanolobodirindrina aminao? Hanao ahoana ny fihetseham-ponao? Inona no hataonao? Tsy misy isalasalana kely akory fa amin’ny tarehin-javatra toy izany dia hila tanjaka mihoatra noho ny hery fahita ianao.

Zava-mampangitakitaka tsy nampoizina

Izany no tarehin-javatra tsy maintsy natrehin’i Dennis sy Bernadette Cyrenne tao amin’ny faritra kely iray fiadiana mineral, any avaratr’i Ontario, any Kanada. Nanomboka ny zavatra rehetra rehefa voan’ny aretina momba ny ra tsy fahita firy ny zanak’izy ireo vavy 12 taona, dia i Sara. Tao amin’ny hopitaly teo an-tanàna dia nandidy ny hanaovana fampidiran-dra ny mpitsabo. Kanefa noho ny fanajan’izy ireo ny lalàn’Andriamanitra momba ny aina sy ny ra, ary mifanaraka amin’ny fahalalana ara-pitsaboana azon’izy ireo nandritra ny taona maro dia nanapa-kevitra i Dennis sy Bernadette fa tsy hanaraka io fomba fitsaboana io. — Genesisy 9:4; Asan’ny Apostoly 15:28, 29.

Tamin’ny fanantenana ny hahita fomba fitsaboana ho solon’izany, dia nentiny haingana tany Thunder Bay, any amin’ny 400 kilaometatra avy eo amin-dry zareo i Sara mba handre ireo mpitsabo tao amin’io toerana io nanome valinteny mitovy amin’ilay teo. Nanohy ny fikarohany izy ireo ary dia nanatsoaka an’i Sara tao amin’ny hopitaly. Adiny valo taty aoriana dia nifarana ny ady nataon’i Sara kely mba ho velona. Tamin’ireo ray aman-dreniny kosa anefa dia vao fiandohana izany.

Fanerena nitombo hatrany

Marina tokoa fa voampanga avy hatrany ho tsy malina izy ireo satria nanala ny zanany vavy tao amin’ny hopitaly ary koa ho namono olona noho ny tsirambina, tamin’ny nahafatesany. Tsy maintsy nody tany aminy àry izy ireo niandry ny andro fitsarana.

Tamin’ny fahatongavan’izy ireo dia niely tao amin’ilay tanàna kely toa vanja atao tety afo ny nahafatesan’i Sara sy ny fiampangana nitambesatra tamin’izy ireo. Namoaka sary sy fitantarana momba ilay raharaha ireo gazety teo an-toerana ary tsy ela ny olon-drehetra dia niresaka ny amin’ny ‘asa nanafintohina’ nahadiso azy ireo. Nanjary sarotra tokoa ny fiainana tamin-dry Cyrenne.

Tao anatin’ny tapa-bolana, dia nisy vehivavy vitsivitsy tao an-tanàna nanao sonia fangatahana iray tamin’ny mpampiasa an’i Bernadette mba handroaka azy, amin’ny fandrahonana azy fa tsy hisy hividy zavatra ao amin’ny magazainy. Namoy ny asany àry i Bernadette. Hatraiza hatraiza dia nahita olona nanaratsy azy ireo i Dennis sy Bernadette, nitondra azy ireo ho toa mpamono olona, ary nilaza taminy fa tsy misy na inona na inona tokony hataony teo fa tokony horoahina hiala ny tanàna ry zareo.

Inona no ho tsapanao raha nitranga taminao izany? Rehefa manohitra anao daholo ny olon-drehetra, aiza no hanovozanao fanampiana? “Tsy mora foana akory ny nandeha teny an-dalana nitraka tsara, hoy ny fiaiken’i Bernadette. Kanefa nanao izany izahay satria nahalala fa nanao fisafidianana tsara sady nino mafy fa niandany taminay Jehovah.” Nahoana izy no niteny toy izany? Azy aiza àry izany fahatokiany izany?

Loharanon-kery

Vao teo am-piandohan’ny fisedrany, dia nitamberina tao an-tsain’izy ireo ny hevitra novakiny tao amin’ny Baiboly ary nanampy azy ireo handray fanapahan-kevitra tsara. Taty aoriana dia nitantara i Dennis fa tany amin’ny hopitaly dia tsapany ilay andalan-teny ao amin’ny Jakoba 2:24 izay milaza hoe: “Hamarinina amin’ny asa ny olona, fa tsy amin’ny finoana ihany. “Nanampy azy hahatakatra izany fa ny zava-dehibe dia tsy ny fahalalana izay voalazan’ny Baiboly momba ny raharaha izao na izao fa ny fanaovan-javatra mifanaraka amin’izany. Noho izany, dia tsy nisy fisalasalana mihitsy tao an-tsainy ny amin’izay fihetsika tokony harahina.

Miharihary fa nitovy fihetsika taminy i Bernadette vadiny. Marina tokoa fa rehefa nilaza aminy ny fanapahan-keviny izy dia namaly tsy nisy fisalasalana kely akory izy hoe: “Afaka miroso ianao; hanaraka anao hatramin’ny farany aho.” Tsy ilaina akory ny milaza fa nampahery azy lalina sy nanome toky azy ny fihetsiny.

Teo anelanelan’izany, ny fitiavana, ireo vavaka sy fanohanan’ireo kristiana tao Thunder Bay dia nahatonga azy ireo hahatsiaro fa “tsy irery na oviana na oviana” izy ireo, na dia lavitra tokoa ny nisy azy aza. “Naneho fitiavana be dia be anay ireo rahalahy, hoy ny nambaran’i Dennisy. Nanolotra ny fanampiany ara-bola sy ara-panahy izy ireo, ary nahatsiaro ho voatohan’ny vavaka nataony izahay.”

Anisan’ireo izay nanolotra ny fanampiany tamin’iznay dia teo i Peter Gramb, loholon’ny kongregasionan’ny Vavolombelon’i Jehovah tao an-tanàna. Tany amin’ny hopitaly izy tamin’ny fotoana nahatongavan-dry Cyrenne tao ary nijanona teo anilan’izy ireo nandritra ny fitsapana rehetra. Fantany tsara fa nety ho voan’ny fitoriana ara-pitsarana izy tamin’izany, nefa tsy nisakana azy tsy nijanona teo anilan’izy ireo izany. Marina tokoa fa nisy fitarainana napetraka ho fanoherana azy koa.

Ny andro nialoha ny fisehoan’izy ireo teo anatrehan’ny tribonaly dia voan’ny fanerena mahery Peter sy Cyrenne ary nahatsiaro fanahiana mafy. Marina fa nampanantena ireo mpianany i Jesosy fa izay tokony holazain’izy ireo dia homena azy ka tsy nila ny ho sahiran-tsaina izy ireo araka izany. Fantatr’ireo voampanga tsara izany, nefa takatr’izy ireo koa fa tsy tokony hiandry ny fitoriana tsy hanao na inona na inona izy ireo na dia izany aza (Marka 13:11). Mifanohitra amin’izany fa nandritra ny herintaona mahery dia nianatra sy namerimberina nianatra ireo fanazavana rehetra mifandray amin’ny fanapahan-keviny izy ireo. Ny fampiononana notovoziny tao amin’ny Soratra Masina, indrindra tao amin’ireo andalan-teny toy ny Hebreo 13:6 sy Salamo 84:11, dia nanampy tamin’ny fampiorenana mafy ny finoany nandritra io fe-potoana sarotra io.

Fahafaham-po betsaka

Na dia olona maro teo an-toerana aza no naneho fihetsika ratsy, ny tarehin-javatra sasantsasany izay nanahirana tokoa dia hita niharihary tamin’ny farany fa nampahery tokoa. Araka izany dia nitantara izao manaraka izao Bernadette momba ny vehivavy anankiray izay niasa tao amin’ny hotely fisakafoana tao an-tanàna. “Noheveriny ho adidy ny nitatata tao amin’ny trano fiasany, nitondra ahy ho toy ny mpamono olona, tamin’ny filazana fa mendrika ny hatsipy ho an’ny alika aho ary tsy nisy olona tia ahy mihitsy, hoy ny fitantaran’i Bernadette. Nolazainy marina tokoa izay rehetra tao an-tsainy.” Tamin’izany fotoana izany, ny zanakalahin’io vehivavy io 18 taona dia nosamborina, notsaraina ary natao an-tranomaizina satria nanapoaka fiarakodian’ny pôlisy anankiray.

Indray andro, raha nitory isam-baravarana i Bernadette sy Helen vadin’ny mpiandraikitra mpitety faritany, dia tonga teo anoloan’ny tranon’io vehivavy io. “Raha mba afaka miresaka aminy fotsiny mantsy aho dia handry ny fieritreretako, hoy Bernadette.” Noho izany dia nandondona teo am-baravarana izy ireo.

Raha vao fantany ireo mpitsidika dia namaly tamin’ny feo feno fianjonanjonana ilay vehivavy hoe: “Tsia, tsy mahaliana ahy izany”, sady vonona ny hanidy varavarana izy.

Kanefa tapa-kevitra ny tsy hamela ilay fihaonana ho tapaka i Bernadette ka namaly tamim-pahamalinana hoe: “Ramatoa M — a, tena nieritreritra anao tokoa aho, ary malahelo noho ireo zava-manahirana hitanao.”

“Hay ve?, hoy ny navalin’ilay vehivavy, sanganehana. Mandrosoa àry, aza fady.”

Nandritra ireo roapolo minitra nanaraka dia namboraka ny tao am-pony izy; tsy niato niresaka ny amin’ny zanany lahy izy. Nahatakatra ilay tarehin-javatra i Helen ary nanapaka ny teniny ka nilaza taminy tamim-pahalemem-panahy hoe: “Hevero ange, Ramatoa M — , fa ianao fara faharatsiny mbola manana ny zanakao lahy, fa ity namako ity kosa dia tsy manana ny zanany vavy intsony.”

Taorian’io fanamarihana io dia nivily ho amin’ny fampanantenana ao amin’ny Baiboly momba ny fahafatesana sy ny fitsanganana amin’ny maty izay nanampy an’i Bernadette tokoa handresy ireo fanerena rehetra sy fahasahiranana hitany ny resaka. Io resaka io, ary ny fitiavana tsy nitady valiny nasehon’i Bernadette tamin’io vehivavy io na teo aza ny zavatra nataony, dia nanova tanteraka ny fihetsiny.

Taty aoriana, tamin’ny andro fitsarana an-dry Cyrenne, dia nandeha tany amin’ny Lapan’ny fitsarana io vehivavy io. Voaheloka teo amin’io toerana io ihany koa ny zanany lahy nefa izy sy ny vadiny ihany no nanatrika ny fitsarana. Tamin’ity indray mandeha ity kosa, dia olona maherin’ny 260 samy sahiran-tsaina ny amin’ny anjaran-dry Cyrenne no nifanety tao amin’ny tribonaly. Ho an’io vehivavy io, dia fanambarana nahery tokoa izany. Ankoatr’izany, dia nihetsi-po loatra izy ka lasa nanoroka an’i Bernadette.

Mitantara ny amin’ny nampaharezan’i Jehovah azy indraindray tamin’ny fomba tsy tena nampoizina i Dennis. Nandritra ireo volana nialoha ny fitsarana dia nanontany tena matetika ny amin’izay hiafaran’ny asany sy ny tranony novidiny tamin’ny alalan’ny fikambanana momba ny mineraly nampiasa azy raha tsy maintsy ho any an-tranomaizina izy. Rehefa niresaka tamin’ny taleny ny amin’ny fanahiany izy dia izao fotsiny no navalin’io azy: “Aza sahiran-tsaina ny amin’izany ianao, ry Dennis. Tsy ilaina akory ny hieritreretana izany. Tsy mandeha any an-tranomaizina ny olona tahaka anao.”

Ny anankiray amin’ireo tanora mpiara-miasa taminy dia nilaza taminy indray andro hoe tokony ho fisedrana lehibe ny miaina eo anivon’ny olona feno fankahalana fatratra. “Ny sasany aza dia nilaza fa hamono anao izy raha afaka nanao izany.”, hoy ny nanampiny. Rehefa avy nanome fanazavana vitsivitsy azy Dennis dia nanasa azy hamaky ireo teny voarakitra ao amin’ny Isaia 50:7, 9 rehefa tonga any an-tranony izy. Vokatr’izany, dia nanaiky hianatra tsy tapaka ny Baiboly io tovolahy io sy ny fianakaviany ary nanomboka nanatrika ireo fivoriana kristiana tany amin’ny Efitrano Fanjakana teo an-toerana.

Fa raha ny amin’i Peter Cramb izay, na dia Vavolombelon’i Jehovah hatramin’ny 25 taona aza, io fanandraman-javatra io dia nanampy azy hahatakatra tsara kokoa izay rehetra tafiditra amin’ny fahatokiana eo anatrehan’i Jehovah. Nahafahany nahatsapa tsara kokoa ireto tenin’ny mpanao salamo ireto izany: “Jehovah no nitarainako tamin’ny fahoriako dia namaly ahy Izy, Jehovah ô, vonjeo ny fanahiko amin’ny molotra mandainga, eny, amin’ny lela mamitaka.” — Salamo 120:1, 2.

Ny didim-pitsarana

Telo volana taorian’izay, ny fitsaran’ny distrika tao Thunder Bay dia namoaka ny didim-pitsarany. Nafahana madiodio sy afa-tsiny tamin’ireo fiampangana rehetra nitambesatra taminy izy telo mianadahy. Na dia tsy nanaiky ny fomba fijerin’izy ireo mahakasika ny raharaha momba ny ra aza ilay mpitsara, dia niaiky fa ny fanapahan-kevitr’izy ireo dia “tsy hoe tsy misy antony na feno firehetana tsy amin’antony, fa nifototra kosa tamin’ny finoana mendrika izany anarana izany.”

Ankoatr’izany, dia nihevitra ilay mpitsara fa tsy azo nohamarinina ny fihetsika feno fanamavoan’ny sasany tamin’ny mpiara-monina aminy. Naneho ny heviny tamin’ireto teny ireto izy: “Toa reny be fandavan-tena i Bernadette Cyrenne no fahitako azy, be fitiavana sady mangoraka, ary tsara sy mandroso ny fiainam-pianakaviany. Ankoatr’izany, raha ny amin’ny fiainam-pianakaviana, dia afaka ny ho ohatra azo tahafina ara-dalàna na ho an’iza na ho an’iza fianakaviana kristiana, ry Cyrenne.”

Tafavoaka avy amin’io nofy ratsy io ny fianakaviana Cyrenne, natanjaka tao amin’ny finoany tamin’ny fahafantarana fa “tsy hiaro zava-tsoa amin’izay mandeha amin’ny fahitsiana Izy [Jehovah]” (Salamo 84:11.) Ny tenan’izy ireo mihitsy no nahita ny fitiavana, ny hery ary ny fahendren’Andriamanitra miasa noho ny fanantenana sy ny fampiononana avy amin’ny Teniny, ny Baiboly, ary nahatsapa ny fanohanana tsy nety sasatra avy amin’ireo rahalahy kristiana. Tamin’izany, ambonin’ny zavatra rehetra, no nahafahan’izy ireo nanovo tanjaka izay nihoatra ny hery ara-dalàna. — II korintiana 4:7.