Famantarana ny andro farany ve ny aretina?

MANAO fandrosoana haingana ireo manam-pahaizana ara-tsiansa eo amin’ny famakiana ny “gènes” ao amin’ny olombelona. Mino ny sasany fa kely sisa dia hahay hamantatra ny fifandraisana misy eo amin’ny maha-mora andairan’aretina anao sy ny firafitry ny “genes” ao aminao izy ireo. Nambara fa amin’ny ho avy tsy ho ela dia ho azo atao ny hanasitrana aretina sasantsasany amin’ny fanovana ny “genes” ao amin’ny tenanao.

“Raha vao misy fahafahana hampiditra “genes” mba hanasitranana aretina, dia hisy fahafahana avy hatrany koa hampiditra “genes” mba hanovana ny endriky ny tena etỳ ivelany”, hoy ny nambaran’ny dokotera W. French Anderson ao amin’ny “National Institutes of Health”. Nanampy toy izao izy: “Ho azo atao ny hilalao amin’ny maha-olombelona antsika”. Fanambarana feno fahasahiana tokoa izany. Milaza ve izany fa maharesy ny siansa eo amin’ny ady atao amin’ny faharariana sy ny aretina?

Mahaliana fa, 1900 taona lasa izay, i Jesosy Kristy dia nanamarika fa ny fisian’ny faharariana sy ny aretina mihoa-pampana dia ho anisan’ny “famantarana” manondro ny “andro farany”, vanim-potoana antsoiny hoe “fifaranan’ny fandehan-javatra”. Hoy Jesosy: “Hisy (...) areti-mandringana any amin’ny tany samy hafa”. Izany dia ho “aretina mamely mafy sy mifindra”, araka ny filazan’ilay mpandinika Baiboly atao hoe Albert Barnes.​—Matio 24:3-7, MN; II Timoty 3:1; Lioka 21:10, 11.

‘Kanefa nisy areti-mandringana sy aretina foana anie”, hoy angamba ianao. Marina izany. Kanefa, misy zavatra roa tokony homarihina momba ny faminanian’i Jesosy.

Voalohany indrindra, dia tsy nilaza i Jesosy fa ny faharariana na ny aretina irery ihany no hahaforona ilay “famantarana”. Nanome famantarana mitambatra kosa izy, tamin’ny fanononana zavatra maromaro. Vakio kely ny faminaniany misy antsipiriany voambara ao amin’ny Matio 24 sy 25, Marka 13 ary Lioka 21. Ilay “famantarana” àry izany dia azo oharina amin’ny “piozila” (kilalao atao hahazoana sary iray amin’ny fanambarana kojakojany maro be). Ny kojakojany iray monja dia tsy mahaforona ilay sary iray manontolo. Toy izany koa, ny zava-mitranga iray dia tsy mahaforona ilay “famantarana”. Io “famantarana” io kosa dia tsy ho hita raha tsy efa mahakasika taranaka iray ireo zavatra rehetra nambaran’i Jesosy mialoha.​—Matio 24:32-34.

Faharoa manaraka izany, dia toa tsy hety mihitsy ny hahatanterahan’ireo tenin’i Jesosy ny amin’ny areti-mandringana, na ny aretina, amin’izao andro izao. Fa nahoana? Satria mbola tsy lehibe toy izao mihitsy ny fandrosoana eo amin’ny ara-tsiansa. Mbola tsy tsara toy izao mihitsy ny fahafahana mitsabo tena. Mbola tsy miely toy izao mihitsy ny fahalalana eo amin’ny ara-pitsaboana.

Inona àry no asehon’ny zava-misy? Tanteraka tokoa ve ireo tenin’i Jesosy? Zava-dehibe ny hahafantarantsika izany, satria ny fahatanterahan’ny faminanian’i Jesosy dia hanamarika fa isika dia miaina amin’ny vanim-potoana tandindomin-doza indrindra eo amin’ny tantaran’olombelona.