“Tsy anareo ny ady, fa an’Andriamanitra”
“Minoa an’i Jehovah (...) dia hambinina hianareo”. — II TANTARA 20:20.
1. Amin’ny lafiny inona avy Josafata no mahaforona sary tsara dia tsaran’i Jesosy Kristy nahazo fiandrianana?
JOSAFATA dia mpanjaka tsaran’i Joda. “Nandeha tamin’ny làlana nalehan’i Asa rainy izy ka tsy niala tamin’izany, fa nanao izay mahitsy eo imason’i Jehovah”. (II Tantara 20:32). Ny hevitry ny anarany dia hoe “Jehovah no mpitsara”. Io mpanjaka io dia nanandratra ny anaran’i Jehovah. Nitady ny fitarihan’Andriamanitra izy mba hanaovana ny rariny sy hitsarana ny vahoakany. Niahy ny amin’ny ianaran’ireo Jodiana ny làlan’Andriamanitra izy. Niharo tamin’izy ireo izy mba hamporisika azy hiverina amin’ny fanompoam-pivavahana marina ary nandamina indray ny fanjakana tamin’ny fomba teokratika izy ho fikendrena izany. Amin’izany rehetra izany dia mahaforona sary tsaran’i Jesosy Kristy izy, ilay Mpanjaka nipetraka teo amin’ny seza fiandrianany tamin’ny 1914 ary mamory ankehitriny ireo mpanompon’i Jehovah ho amin’ny fahatafitany velona, raha mbola manangona ireo firenena ho amin’ny adin’i Hara-Magedona ireo hery araka ny demonia. — Matio 25:31-34; Apokalypsy 16:13, 14, 16.
2. a) Zava-manahirana lehibe inona no tsy maintsy natrehan’ny Jodiana? b) Tarehin-javatra mitovy amin’izany inona no misy ireo Vavolombelon’i Jehovah ankehitriny? d) Inona avy ireo mahaforona izao tontolo izaon’i Satana mifanitsy amin’i Amona, Moaba ary ireo mponina tao amin’ny tendrombohitry Seira?
2 Rehefa avy niasa mba hampiverenana ny filaminana teokratika tao Joda i Josafata dia tsy maintsy niatrika zava-manahirana iray lehibe. Nisy “olona betsaka” fahavalo avy any amin’ny faritry Amona, Moaba ary tendrombohitr’i Seira nandrahona ny hamongotra ireo mpanompon’Andriamanitra (II Tantara 20:1, 2, 22). Ankehitriny dia ao amin’ny tarehin-javatra azo ampitahaina amin’izany isika. Ireo vavolombelon’i Jehovah tsy “naman’izao tontolo izao” dia iharam-pahavoazana noho ny fankahalan’ny fandehan-javatry Satana, ary ireo fahavalon’ny Andriamaniny dia mampihatra fanenjehana feno halozana amin’izy ireo (Jaona 15:19; I Jaona 5:19). Tamin’ny andron’i Josafata, ny ady nandindona dia nanana ho loka ny fanapahana ny tanin’i Joda (“Fiderana”), izay nonenan’ny vahoakan’i Jehovah. Fa raha ny amin’ireo hery ara-politika sy ara-barotra amin’izao androntsika izao (tafiditra amin’izany ireo mpanao fitaovam-piadiana apokalyptika), izay manaraka ny ohatr’i Amona sy Moaba, dia ny fanapahana izao tontolo izao no iadiany. Raha manao izany izy ireo dia manitsaka faritany iray izay hatramin’ny 1914 dia ananan’ny Fanjakana mesianikan’Andriamanitra zo (Apokalypsy 11:15, 18). Ny tendrombohitra Seira dia nanjary tanin’ny firenena mpivadik’i Edoma, izay voaforon’ny taranak’i Esao, rahalahin’i Jakoba kambana aminy. Noho izany ireo mponina tao aminy dia sary tandindona tsaran’ireo mpivadika miavonavona anisan’ny fivavahana lazaina fa kristiana ankehitriny. — Genesisy 32:3.
3. Amin’ny ahoana ny fihetsik’i Josafata sy ireo Jodiana no mitovy amin’izay arahin’ny Vavolombelona mahatoky ankehitriny?
3 Inona no handeha hataon’i Josafata mpanjaka eo anoloan’ireo andiana mpanafika ireo? Izay ataon’i mpanompon’i Jehovah mahatoky foana rehefa mahatandindomin-doza ny fiainany ny fanenjehana na tarehin-javatra sarotra iray hafa. “Nanatrika tsara hitady an’i Jehovah” i Josafata. “Avy tamin’ny tanànan’ny Joda rehetra, hitady an’i Jehovah” tao amin’ny trano natokana ho amin’ny fanompoam-pivavahany ny olona. — II Tantara 20:3-5.
4. a) Tokony hanampo inona ireo mpanompon’i Jehovah? b) Aiza no itadiavan’ny “olona betsaka” famonjena azy?
4 Endrey izany ohatra tsara ho an’ireo rehetra manompo an’Andriamanitra amin’izao androntsika izao! Ny andron’ny herisetra diavintsika dia mizotra ho amin’ny fara-tampony izay ho tratrany ao Hara-Magedona. Mandra-pahatongan’izay, ny herisetra manjaka eo amin’izao tontolo izaon’i Satana àry dia tsy hihena (II Timoty 3:1, 13). Mety ho tandindomin-doza matetika aza ny fiainan’ireo mpanompon’i Jehovah. Amin’ny manodidina toy izany, aiza no hahitantsika fiarovana? Ao amin’ny firaisan-tsaina eo amin’ny fanompoam-pivavahantsika. Any amin’ny Efitrano Fanjakana sy toeran-kafa rehetra ivoriantsika mba hianatra Baiboly dia mizara sakafo ara-panahy sarobidy isika ary mifandamina mba hidera ampahibemaso an’i Jehovah. Sambatra isika mahatsapa fa misy “olona betsaka” mivoaka hatrany avy amin’ny firenena rehetra mba handray anjara amin’ny “fanompoana masina” eo anilan’ireo mpanompon’Andriamanitra. Ireny vaovao vao tonga ireny dia mitanjozotra ho any ‘an-tendrombohitry ny trano fanompoam-pivavahana amin’i Jehovah’, ka izany dia hahazoany famonjena. — Apokalypsy 7:9, 15; Isaia 2:3.
5. Raha ny momba ny fandaminan’i Jehovah, mahatonga antsika hieritreritra ny amin’inona moa ny “kianja vaovaon’i” Josafata?
5 Josafata, tetsy andaniny, dia nitsangana “tao amin’ny tranon’i Jehovah, teo anoloan’ny kianja vaovao”. Araka ny tokony ho marina, ny fandaharam-panorenana nataon’ny mpanjaka tao Joda dia nisy fanalehibeazana ireo toerana natokana ho an’ny fanompoam-pivavahana natao ao amin’ny tempolin’i Jerosalema. Toy izany koa, eo ambany fitarihan’i Jesosy Kristy, ilay Mpanjaka manam-piandrianana, dia nisy fandaharam-panorenana ara-panahy notontosaina hany ka ankehitriny dia misy toerana ampy tsara ho an’ireo mpivavaka an-tapitrisany maro anisan’ny “olona betsaka” tsy manana asa fisoronana iandraiketana ao amin’ny kianjan’ny tempolin’i Jehovah ety an-tany. Endrey, fa tsara ery ny ao amin’io toerana io! — Salamo 27:1-5.
Aoka isika hitodika amin’i Jehovah
6. a) Inona no noresahin’i Josafata tao amin’ny vavaka nataony? b) Aiza no hanovozantsika hery raha tojo fisedrana?
6 Tany amin’ny tranon’i Jehovah dia novelabelarin’i Josafata teo anatrehan’Andriamaniny ny toe-javatra. Nanandratra ny fanjakana, ny hery ary ny tanjak’i Jehovah izy sady nandinika nisesy ireo asa notanterahiny ho tombontsoan’ny vahoakany. Nanisy firesahana ny amin’ny vavaka feno hafanam-po notononin’i Solomona tamin’ny fitokanana ilay tempoly izy ary namarana ny teniny tamin’ny fanambarana tamim-panetren-tena hoe: “Koa tsy hitanay izay hataonay; fa Hianao no andrandrain’ny masonay”. (II Tantara 20:5-12; 6:12-14, 34, 35). Moa ve ianao efa nandalo tarehin-javatra toa tsy nisy nivoahana toy izany? Taty aoriana ny apostoly Paoly dia namakivaky fisedrana toy izany izay tsy maintsy nametrahany tanteraka ny fitokisany tamin’i Jehovah. Na izany aza dia afaka nanao foana ity fanamarihana ity izy: “Fa ny fahalemeko no fahatanjahako”. Marina tokoa fa rehefa nahatsiaro tena ho tsy nahavita na inona na inona izy, ny fitokisany tanteraka an’i Jehovah dia nanjary loharanon-tanjaka tsy manam-petra. Ianao koa dia afaka miseho ho mahery! — II Korintiana 12:10; Ohabolana 18:10.
7. Toromarik’i Mosesy inona no nankatoavin’ireo mponin’i Joda?
7 Andramo alaina sary an-tsaina izay niseho teo amin’ny kianjaben’ny tempolin’i Jerosalema. “Ary ny Joda rehetra mbamin’ny vadiny aman-janany koa dia samy nitsangana teo anatrehan’i Jehovah”. (II Tantara 20:13). Tsy isalasalana fa izy ireo dia nahatsiaro ireo toromarika hentitra nomen’i Mosesy tao amin’ny Deoteronomia 31:12 momba ny anton’ny fivorian-dehibe toy izany. Tao amin’io fivoriambe goavana io dia tsy nisy toerana nipetrahana ho an’ireo fianakaviana ireo izay niandry tamim-panajana an’i Jehovah sady vonona hanatanteraka ny didiny.
Ny lalana fampitohizana nofidin’i Jehovah
8. a) Tamin’ny lalana fampitohizana inona no nifandraisan’i Jehovah tamin’ny vahoakany tamin’ny andron’i Josafata? b) Ahoana no anaovany izany amin’izao androntsika izao?
8 Ahoana no andeha hamalian’i Jehovah Tompom-piandrianana io vavak’i Josafata io? Mba hanaovana izany dia niahy ny amin’ny lalana fampitohizana tamin’ny tenan’i Jahaziela izy, lehilahy iray avy amin’ny fokon’i Levy. Tsy mpisorona i Jahaziela, nefa izany tsy nanakana an’i Jehovah hametraka ny safidiny taminy mba hampitany ny anankiray amin’ireo hafatra fampaherezana mampihetsi-po indrindra ao amin’ny Soratra masina. Marina tokoa fa “voatsindrin’ny Fanahin’i Jehovah teo amin’ny fiangonana [kongregasiona, MN]” izy. (II Tantara 20:14). Amin’izao androntsika izao, moa ve Jehovah nametraka lalana fampitohizana toy izany mba hifandraisana amin’ny vahoakany? Izany tokoa. Jesosy aza dia niresaka ny amin’izany tao amin’ny faminaniany momba ny “fiafaran’ny fandehan-javatra”, rehefa nilazalaza ny amin’ny kilasy voahosotry ny “mpanompo mahatoky sady malina” izay nametrahan’ny Tompony ny “fananany” rehetra eto an-tany. — Matio 24:3, 45-47.
9. a) Nahoana ny anaran’i Jahaziela no nety tamin’ny asa nanirahana azy? b) Inona no votoatin’ny hafatr’i Jehovah? b) Amin’ny ahoana izany no manome fampaherezana antsika amin’izao andro izao?
9 Ny anarana hoe Jahaziela dia midika hoe “mahita Andriamanitra.” Tsy amim-pisalasalana fa Andriamanitra dia afaka mahita ny antsipiriany rehetra amin’ilay zava-manahirana. Azony natao koa ny nanampo ny fihetsika tsy maintsy narahin’ireo mpanompony ary koa ny fiafaran’ny fifandonana. Araka izany, toromarika inona no nampitainy tamin’izy ireo tamin’ny alalan’i Jahaziela? Aoka henointsika ny mpitondra teniny: “Mihainoa hianareo, ry Joda rehetra sy ny mponina any Jerosalema, ary hianao, ry Josafata mpanjaka: Izao no lazain’i Jehovah aminareo: aza matahotra na mivadi-po ny amin’ireo olona betsaka ireo, fa tsy anareo ny ady, fa an’Andriamanitra”. (II Tantara 20:15). Alao sary an-tsaina ny fifaliana lehibe nanentana ny vahoaka! Raha ny momba antsika, tsy mampaninona ireo famelezana halefan’i Satana sy ireo tafiny hamelezana antsika sy ireo fisedrana tsy maintsy hiaretan’ny finoantsika sy ny tsy fivadihantsika, isika dia faly mahalala fa afaka mametraka miaraka ny fitokisantsika rehetra amin’i Jehovah, noho ny finoana mafy fa hiady ho antsika izy. — Eksodosy 15:2, 3; Salamo 24:8; 37:3-7; Zakaria 14:3.
Ny maha-zava-dehibe ny fanaovan-javatra amim-piraisankina
10. a) Nanao ahoana no nisedrana ny tsy fivadihan’ireo Jodiana? b) Inona ny asa izay hifarana amin’ny “tsy ilay fanao mandrakariva” avy amin’i Jehovah?
10 Kanefa ireo Jodiana dia tsy afaka niandry fotsiny ny hanafahan’Andriamanitra azy ireo tamin’ny fomba iray na hafa. Tsy maintsy nanao zavatra izy ireo. Tsy maintsy nanaporofo ny fankatoavany an’i Jehovah izy ireo ary nanatanteraka ny sitrapony mba hahatafitana velona. Tsy isalasalana fa maro no nahita ireo toromarik’i Jehovah ho mahazendana fara-faharatsiny. Izany dia nisedra ny tsy fivadihan’izy ireo. Toy izany koa, alohan’ny hanatanterahan’i Jehovah ny asany “tsy ilay fanaony mandrakariva anefa” ary “tsy ilay vitainy mandrakariva anefa” amin’ny fandevonana ny fivavahana lazaina fa kristiana eo am-piandohan’ny “fahoriana lehibe”, dia mitaky amin’ireo vavolombelony izy ny handraisany anjara amim-piraisankina amin’ny asa iray izay mety hahagaga olona mihoatra ny iray. Izany dia fanompoana masina mitarika azy ireo ho any amin’ireo mpiarabelona aminy imbetsaka tokoa mba hampiomana azy ireo ny amin’ny fandringanana manakaiky. — Isaia 28:21; Matio 24:14, 21.
11, 12. a) Baiko “tsy ilay vitaina mandrakariva” inona no nampitain’i Jahaziela? Nanao ahoana ny fihetsik’ireo Jodiana? b) Raha ny momba antsika, ahoana no ahafahantsika manaporofo ny fitokisantsika an’i Jehovah?
11 Io asa io dia misy fitoviana sasany amin’ny didy nampitain’i Jahaziela tamin’ireo Jodiana. Momba ireo fahavalony dia nilaza tamin’izy ireo izy hoe: “Rahampitso dia midina hiady aminy hianareo (...). Tsy hianareo anefa no hiady amin’ity; mijanona tsara, fa ho hitanareo ny hamonjen’i Jehovah anareo, ry Joda sy Jerosalema. Aza matahotra na mivadi-po, fa rahampitso dia mivoaha hiady aminy; fa Jehovah no momba anareo”. (II Tantara 20:16, 17). Tsapanao ve izany: io vahoaka tsy manam-piarovana voaforon’ny lehilahy, vehivavy ary ankizy io, dia tsy maintsy nivoaka hiady amin’ny tafika mitambatr’ireo fahavalo! — Jereo Salamo 148:12, 13.
12 Nahatsiaro fankasitrahana lehibe anefa Josafata sy ireo Jodiana noho ireo toromarika nomen’i Jehovah azy ireo tamin’ny alalan’i Jahaziela. “Dia niankohoka tamin’ny tany Josafata; ary ny Joda sy ny mponina rehetra tany Jerosalema niankohoka teo anatrehan’i Jehovah koa ka nivavaka.” (II Tantara 20:18). Jesosy Kristy, ilay Josafata Lehibe, dia nanaporofo fitokisana sy fanekena mitovy amin’izany fony izy tety an-tany. Araka izany dia afaka mahazo antoka isika fa hihaino ny didy homen’i Jehovah azy izy rehefa ‘eo an-kavanany ka handripaka ny mpanjaka maro amin’ny andron’ny fahatezerany’. (Salamo 110:5, 6). Manahaka azy, ireo Vavolombelon’i Jehovah dia faly “hisaotra” an’Andriamanitra izay nametrahany ny fitokisany, sady manompo azy eo an-kianjany. — Salamo 84:10-12; 122:1-4.
13. Amin’izao androntsika izao, iza no midera an’i Jehovah amin’ny “feo mahery indrindra”? Inona no vokatr’izany?
13 Araka ny II Tantara 20:19, ireo mpihira tao amin’ny tempoly dia “nitsangana (...) mba hidera an’i Jehovah, Andriamanitry ny Isiraely, tamin’ny feo mahery indrindra”. Amin’izao andro izao, iza moa, eo ambany fitarihan’ny sisa amin’ny kristiana voahosotra no midera an’i Jehovah eo anoloan’ny fahavalony amin’ny “feo mahery indrindra”? Eo amin’ny laharana voalohany amin’ireo mpanompon’i Jehovah dia ahitana miharihary ny fitambaran’ireo mpitory maharitra izay tsy mitsahatra mitombo. Marina tokoa fa ny isan’ny misionera, sy ny mpitory maharitra mpanampy, mandavan-taona ary manokana, izay mialoha lalana raha ny amin’ny fiderana an’i Jehovah amin’ny fitoriana, dia nitombo 19 isan-jato tamin’ny 1983. Ny ‘hiran’izy ireo’ dia mahaforona tapany lehibe amin’ireo 436 720 991 ora natokana tamin’ny taon-dasa ho amin’ny fanompoana kristiana, tarehimarika manaitra izay mampiseho ihany koa fitomboana 13,5 isan-jato raha ampitahaina amin’ny taona teo aloha.
14. Mitovy amin’ireo Jodiana, amin’ny asa inona no anehoan’ny maro ny finoany ankehitriny?
14 Rehefa niseho tany Jerosalema ireo zava-nitranga mahaliana antsika dia tsy fotoana natoriana tamin’izany. Noho izany ireo Jodiana nankato dia “nifoha maraina koa (...), dia niainga nankany an-efitr’i Tekoa”. (II Tantara 20:20). Niahy ny hanaporofo ny finoany tamin’ny asa izy ireo (jereo Jakoba 2:14). Mitovy amin’izany koa, amin’izao androntsika izao ireo minisitr’Andriamanitra dia tsy maintsy miasa matetika vao maraina be. Ny vehivavy mitondra tokantrano sasany izay manao ny asan’ny mpitory maharitra ohatra, dia mifoha vao maraina be mba hikarakara-tokantrano mba hanokanana ny ambiny amin’ny maraina ho amin’ny fanompoana an’i Jehovah. Mbola misy foana olona “misento sy mitaraina” eo amin’izao tontolo izaon’i Satana ary tsy maintsy ‘marihana’ izy ireny mba ho tafita velona amin’ny “fahoriana lehibe”. Tapa-kevitra ny hitady azy ireny ny Vavolombelon’i Jehovah. — Jereo Ezekiela 9:4.
Mandrosoa hatrany!
15. a) Iza no tokony ninoan’ireo Jodiana? b) Ahoana no mety ‘ahazoantsika fanambinana’ amin’izao andro izao?
15 Ny fitantarana voarakitra ao amin’ny II Tantara 20:20 dia mitohy toy izao: “Ary nony nivoaka izy, dia nitsangana teo Josafata ka nanao hoe: Mihainoa ahy, ry Joda, sy hianareo ry mponina eto Jerosalema: Minoa an’i Jehovah Andriamanitrareo, dia ho tafatoetra hianareo; minoa ny mpaminaniny, dia hambinina hianareo.” Amin’ny fomba mitovy amin’izany, ilay filohan’ny kongregasiona kristiana izay Mpanjakatsika ankehitriny dia namporisika ireo mpianany imbetsaka ho amin’ny tsy fivadihana. Vavolombelon’izany ireo andalan-teny ao amin’ny Filazantsara toy ny Matio 10:27, 28; 24:9-13 ary Jaona 16:33. Isika izay ‘mivoaka’ ankehitriny mba hanompo an’Andriamanitra, dia ilaina ny anehoantsika finoana an’i Jehovah sy an’ireo izay nataony ho mpitondra teniny, amin’ny teny tokana ho amin’ny fahombiazana. Marina fa hahita io ‘fanambinana’ io ireo Vavolombelona rehetra nanolotena tamin’Andriamanitra, izay natao batisa maneho finoana an’i Jehovah sy izay rehetra nomaniny ho azy, indrindra ny fanomezana kanton’ny fiainana mandrakizay, izay azony natao noho ny soron’ny Zanany. — Jaona 3:16; 17:3.
16. a) Iza moa matetika ireo “mpihira” mialoha lalana amin’ny fanompoana an’i Jehovah? b) Amin’ny heviny ahoana ireo izay midera an’i Jehovah no mitafy “fihaingoana masina”?
16 Ambonin’izany, Josafata “rehefa niara-nihevitra tamin’ny olona (...), dia nanendry mpihira ho an’i Jehovah hidera amin’ny fihaingoana masina, raha mivoaka eo anoloan’ny olona efa voahomana hiady, ka hanao hoe: Miderà an’i Jehovah, fa mandrakizay ny famindrampony.” (II Tantara 20:21). Araka izany àry dia ireo mpihira tao amin’ny tempoly no nahaforona ny mpialoha lalana mba handeha hiady. Tahaka izany koa, eo ambany fitarihan’ny sisa amin’ireo kristiana voahosotra dia matetika ny mpitory maharitra sy ny misionera, ireo mpiandraikitra mpitety faritany sy ny vadiny, ireo mpianakavin’ny Betela, ireo loholona sy mpikarakara momba ny asa no voalohany amin’ny fanompoana masina ary mandrisika ireo mpikambana hafa ao amin’ny kongregasiona hiasa. Izy rehetra ireo dia “nitafy “fihaingoana masina” mba hidera an’i Jehovah raha nandeha amim-pilaminana teokratika. Ny firavak’izy ireo ara-panahy dia mahaforona ihany koa ‘ny toetra vaovao kristiana izay miseho amin’ny fahitsiana sy ny fahamarinana’. (Efesiana 4:24; Galatiana 5:22, 23). Endrey izany tombontsoa anisan’io fihetsiketsehana iraisam-pirenena io izay manandratra ny anarana sy ny hatsaram-pon’i Jehovah! — Salamo 144:1, 2; 136:1-26.
17. a) Nahoana ny vahoakan’i Jehovah no tsy voatery niady? b) Inona no ‘hevitr’i Jehovah hitarika ny fahalevonan’ny fivavahan-diso?
17 Nilaza tamin’ireo Isiraelita Andriamanitra hoe: “Tsy hianareo anefa no hiady amin’ity.” Tsy hoe tsy hisy vidiny akory io faminaniana io. “Raha vao nanomboka nihoby sy nidera ireo”, dia nalatsak’i Jehovah tao amin’ny otrika ireo mpanafika hany ka “nitsangana ny taranak’i Amona sy Moaba namely ny avy any an-tendrombohitra Seira ka namono sy nandringana azy”. (II Tantara 20:17, 22, 23). Io fitsimbadihan-javatra tampoka io dia mampiseho tsara izay eo an-dalam-pitrangana eo amin’izao tontolo izaon’i Satana. Araka izay asehon’ny Apokalypsy 17:16, 17, Jehovah dia namolavola ‘hevitra’ momba an’i Babylona Lehibe, izay ny fivavahana lazaina fa kristiana no mahaforona ny tapany azo tsinina indrindra. Kanefa izy dia hitarika ireo firenena manan-tafika aseho ao amin’ny O.N.U. hanana io ‘hevitra’ io ary hifototra hamely ny fivavahan-diso mba handringana azy. Amin’izany fomba izany no hahafongotra ny votoatiny lehibe mpivadika mitondra ny anarana hoe fivavahana lazaina fa kristiana, toy ireo Edomita tao amin’ny tendrombohitry Seira.
18. Ahoana no hialan’Andriamanitra amin’ny tarazon’i Amona sy Moaba ankehitriny ao Hara-Magedona?
18 Nefa tsy izany ihany. Marina tokoa fa tsy hanjavona amin’izany akory ny tarazon’i Amona sy Moaba amin’ny andro ankehitriny (Jereo Apokalypsy 18:9, 10, 15-17). Ireny herim-panjakana tsy tia fivavahana ireny dia ho vonona foana hamongotra ireo “Jodiana” amin’izao androntsika izao, izay miezaka midera an’i Jehovah. Amin’izay dia ho avy ny fotoana hanatanterahan’Andriamanitra ny didim-pitsarany. Araka ny filazalazana voatantara ao amin’ny Apokalypsy 19:11-16, Jesosy Kristy Mpanjaka dia hivoaka mba hanitsaka “ny famiazana ny divain’ny firehetan’ny fahatezeran’Andriamanitra Tsitoha” ary handringana izay rehetra ho tavela amin’ny fandehan-javatr’i Satana maneran-tany. Amin’ny fara-herin’io ady io, ny sisa amin’ny firenena sy ireo tafiny, raiki-tahotra dia hifamono, tsy isalasalana fa amin’ireo fiadiany mahafaty. Toy izany no nanjo an’i Amona sy Moaba izay “nifandringana kosa izy samy izy ihany”. Kanefa Jehovah dia tsy hamela na oviana na oviana azy ireo hampiasa ireo baombany noklehary ho tonga hatramin’ny ‘fanimbana’ ny vahoakany na ny tany, izay asany. — Apokalypsy 11:18; Isaia 45:12; Salamo 115:16.
19. a) Rehefa hijery ny sahan’ady ireo “Jodiana” amin’ny andro ankehitriny, hanao ahoana ny fihetsiny? b) Tandindon’ny inona ny fivoriana nisy tao amin’ny “lohasaha Beraka”?
19 “Nony tonga teo amin’ilay fitazanana any an-efitra ny Joda, dia nijery ireo olona betsaka ireo izy, koa, indreo, nisy faty niampatrampatra tamin’ny tany, fa tsy nisy afa-nandositra.” Rehefa hijery manodidina azy ireo “Jodiana” amin’izao androntsika izao sy ireo mivavaka amin’Andriamanitra miaraka aminy, aorian’ny adin’i Hara-Magedona, dia hankalaza an’i Jehovah izy ireo noho ny fandreseny mahatalanjona. Tsy hila ny haka izay mety ho babo, amin’ny ara-bakiteny izy ireo fa ho faly kosa hivory eo amin’ny “lohasaha” ara-panoharan’i “Beraka” (anarana izay midika hoe (“fitahiana”). Ireo mpikambana amin’ny “olona betsaka” izay tsy mba manao asa fisoronana, dia ho faly hiditra ao amin’ny tany nodiovin’ilay Fanjakana. Ho dodona hanao asa vaovao mahasondriana izy ireo dia ny hanova io fonenana io ho saha malalaka, ho Paradisa. Mandritra ny arivo taona ny faritry ny fanjakan’i Jesosy Kristy, ilay Josafata Lehibe dia handry fahizay ary ilay Andriamaniny, Jehovah, dia hanome ho azy hatrany fiadanana amin’ny manodidina. — II Tantara 20:24-30.
II Tantara 20 — famerenana
◻ Mifanitsy amin’ny inona ankehitriny ny tafik’i Amona, Moaba ary ny tendrombohitry Seira?
◻ Tandindon’iza i Josafata, Jahaziela ary ny Jodiana?
◻ Fihetsika tsara inona no narahin’ireo “Jodiana” amin’ny andro ankehitriny?
◻ Inona no manome toky antsika raha ny amin’ny fiafaran’ny “fahoriana lehibe”?
[Sary, pejy 16, 17]