Mitantara ireo mpitory ilay Fanjakana
Ny fitarana teokratika any Venezuela
NAHAVALAKA indrindra ny hafanana nandritra ny andro maromaro. Gaga àry ny mpandalo nahita ireo mpiasa teo amin’ny hainandro nigaingaina kanefa naleon’ny olona rehetra niala sasatra teo amin’ny alokaloka na tao amin’ny efitrano iray misy fanaovana izay hahantonony ny hafanana. Nanomboka niakatra tsikelikely anefa ny rafitra hazo amin’ny trano vao naorina iray. Tao anatin’ny telo volana sy tapany ireo mpiasa ireo dia nahavita trano misy rihana telo, fanitarana vaovao ireo tranon’ny sampan’ny Fikambanana Watch Tower tany La Victoria, any Venezuela.
Fanindroany izao no nanitarana ireo biraon’ny sampana any Venezuela hatramin’ny nanorenana azy io tamin’ny 1946, raha mbola 13 monja ny mpitory ilay Fanjakana tao amin’io tany io. Tamin’ny 1977, ny isany dia nihoatra ny 13 000. Noho izany antony izany, tamin’io taona io, ny trano vaovao iray ho an’ny sampana dia naorina sy nitokanana tany La Victoria. Hatramin’izay dia nihoatra ny avo roa heny ny isan’ny Vavolombelona tao amin’io tany io. Nilaina àry ny fanitarana vaovao.
Ny fanitarana vaovao (ery andamosina havanana eo amin’ny sary) dia 1 900 metatra toradroa mahery ny velarany eo amin’ny tany, ka izany dia mampitombo avo roa heny fara fahakeliny ny halehiben’ny toerana azon’ny sampana ampiasaina. Eo amin’ny farany ankavanana, dia misy lalana fidirana mitarika ho any amin’ny garazy ambany tany mahalany fiarakodia 15. Ny fanontam-pirinty dia nafindra avy ao amin’ny trano naorina tamin’ny 1977 (ny tapany manaraka ny lavany eo afovoany) ho ao amin’ny efitra ambany rihana amin’ilay trano vaovao misy koa ireo fitehirizana sy fandrafetana ary birao vitsivitsy. Ny sisa amin’ireo trano vaovao dia fonenan’ny mpianakavin’ny Betela.
Naorina ao amin’ilay trano vaovao ny siniben-drano sy ny “groupe électrogène”, satria matetika no misy tsy fahampian-drano sy fahatapahan’ny herimbaratra ao amin’io faritra eo amin’izao tontolo izao io. Mba hanararaotana amin’ny fomba feno ny masoandro mibaliaka foana sy ny rivotra malefaka, dia namboarina any ambonin’ny trano ny fikarakarana ny lamba.
Ahoana no fiheveran’ny olona teny amin’ny manodidina an’io trano vaovao naorina io? Marina fa ny sasany dia nalahelo ny zaridaina kanto teo taloha, nefa betsaka no mihevitra fa mampitombo ny hajan’ilay faritany ny trano. Nahare firesahana betsaka ny amin’io fanorenana io ny mpanao maritrano iray ka tonga mba hijery izany. Izao no nambarany tamin’ireo rahalahy: “Tsy isalasalana mihitsy fa ity no trano tsara orina indrindra eto La Victoria.” Nanaitra ny sain’ny injenieran’ny tanàna izay nanome azy an-tsitrapo ny taratasy fanamarinana ny maha-ara-dalàna ny asa koa izany ka nilaza mazava toy izao izy: “Voninahitra ho ahy ny manome anareo fahazoan-dalana hampiasa trano sahala amin’io.”
Ny 21 aprily 1985, andro fitokanana, dia nanana antony tokony hifaliana ireo Vavolombelona tany Venezuela. 15 802 tamin’izy ireny tokoa no nivory tany akaiky, tany Valencia, ary mpanatrika 38 059 hafa tafavory tany amin’ny tanàna dimy samy hafa no afaka nandre ny fandaharana tamin’ny fifandraisana an-telefaonina. Maro lavitra noho ny tontalin’ny isan’ny mpitory ao amin’io tany io àry ny isan’ny mpanatrika. Velom-pankasitrahana sy faly izy ireo noho ireo fandaharana nataon’Andriamanitra mba hahampy fitaovana azy kokoa hahafahana hitory amin’ny fomba feno ny vaovao tsaran’ny Fanjakana alohan’ny hahatongavan’ny faran’izao fandehan-javatra izao. — Matio 24:14.