Ny papa sy ny Apokalypsy
NY FOMBA HANALAVIRANA NY HARA-MAGEDONA. Izany no lohateny nomen’ny mpanao gazety amerikana roa ny bokiny nivoaka amin’ny teny anglisy tamin’ny 1984, momba ny politikan’ny papa tao anatin’ireo taona faramparany. Hatramin’ny 17 taona mahery i Gordon Thomas sy Max Morgan-Witts no manoratra lahatsoratra momba ny asan’ny papa. Inona no azon’izy ireo ampahafantarina antsika ny amin’izay eritreretina momba ny apokalypsy ao amin’ireo faritra ambony amin’ny Eglizy katolika?
Araka ny filazan’ireo mpanao gazety ireo, dia izao no nambaran’i Emery Kabongo, mpitantsoratra manokan’i Jean Paul II: “Ny papa dia sahala amin’ny Hercule (olona matanjaka be) ara-panahy izay miezaka hifehy ireo fanjakana mahery ary manandrana misoroka Haramagedona noklehera iray.”
Hita fa ireo filohan’ny Eglizy dia matahotra lavitra ny fandringanana ny planeta ho vokatry ny ataon’olona noho ny fisalovanan’Andriamanitra hifantina eo amin’ny raharahan’olombelona, izany hoe ny apokalypsy ambaran’ny Baiboly. Araka izany, dia milaza toy izao ilay boky efa voatonona: “Amin’ireo izay miresaka amin’i Kabongo, dia tsy misy na dia iray aza toa manao fiezahana mba hisakanana ny apokalypsy tsapany fa manatona. (...) Miafina ao ambadik’izany tsy firaikana izany anefa ny fihenjanana izay vokatra mivantan’ny synoda iraisam-pirenen’ny eveka. Niafara tamin’ny fanamarihana manjombona ny fiaraha-mandinika: ny rehetra dia samy nitaraina noho ny ‘filana ady, ny herisetra, ny fampihorohoroana, ny fanaovana tahirim-piadiana nifanekena, nefa noklehera indrindra koa, sy ny fivarotana an-tsokosoko maharikoriko izao karazam-pitaovam-piadiana rehetra izao’ ”. Mitana ny sain’ny papa koa aza io raharaha io. Tantarain’i Thomas sy Morgan-Witts fa ireo talantalana fitehirizany boky, ao amin’ny efitrano fiasany, dia mirakitra boky amin’ny teny anglisy toy ny Revion’ny fiarovana iraisam-pirenena, Ireo zava-manahirana amin’ny fiomanana ara-tafika sy ny Famelezana tampoka: fianarana mba hitsinjovana ny fiarovan-tena. Nanampy teny toy izao izy ireo:
“Eo anilan’ny taratasy fandefany ho an’ireo eveka dia ahitana boky mivaofy foto-kevitra mitana mafy ny sain’ny papa amin’izao fotoana izao: ny siansa momba ny tena faran’ny olombelona, ny fianarana fampianarana araka ny Baiboly mampiseho fa Andriamanitra dia hanorina ny Fanjakany eto an-tany amin’ny alalan’ny ‘fitohitohizam-pisehoan-javatra’ izay hanamarika ny faran’ny andro. Mino mafy i Jean-Paul fa (...) alohan’ny hahataperan’ny taonjato, dia mety hisy zavatra “farany” hanova ny endrik’izao tontolo izao. Ho pesta mainty faharoa ve izany? Ho fahamainana sa mosary amin’ny ambaratonga tsy hay saintsainina? Sa ady noklehera? Ankehitriny, dia atahorany indrindra ity fanombantombanana farany; mieritreritra izy fa angamba nanankinana ny fitondrana ny Eglizy izy amin’ny fotoana iainan’izao tontolo izao ny folo taonany farany alohan’ny hahafoanany tanteraka ao amin’ny fandripahana noklehera iray.”
Io boky io ihany koa no manintona ny saina ho amin’ny “famantaranandron’ny Fitsarana farany” ara-panoharana resahina tsy tapaka ao amin’ny Bokin’ny manam-pahaizana ataomista (anglisy). Rehefa noresahina voalohany ny amin’io “famantaranandro” io tamin’ny desambra 1947, dia nasaina nanondro ny misasakalina latsaka fito minitra izy io mba hampiseho fa “akaiky dia akaikin’ny Haramagedona noklehera iray aoka izany izao tontolo izao”. Taorian’ny fanaovana sonia ny fifanekena momba ny famerana ny fiadiana famaharana tamin’ny 1972 (SALT), ireo fanjaitran’ny famantaranandro dia naverina ho amin’ny 12 minitra alohan’ny misasakalina. Tamin’ny 1984, dia nanoratra toy izao Thomas sy Morgan-Witts: “Ankehitriny ilay famantaranandro dia manondro ny misasakalina latsaka telo minitra monja. Mbola tsy nanatona akaiky toy izany ny oran’ny Fitsarana farany mihitsy izy io hatramin’ny 30 taona.”
Na dia tao aza ny fiezahana rehetra nataon’ny papa mba ‘hisakanana Haramagedona noklehera iray’, tamin’ny novambra 1985, dia mbola teo amin’ny telo minitra alohan’ilay ora hitrangan-doza ihany ireo fanjaitra. Aoka anefa isika tsy hanaiky ho voatanan’ny fiahiana izay hahafantarana hoe hanafoana ny olombelona ve sa tsia ireo firenena. Hanao zavatra amim-pahendrena kokoa isika amin’ny fitadiavana ny fomba nomanin’Andriamanitra mba hamonjena antsika toy izay hanandrana hisakana ny apokalypsy, satria tsy maintsy “ho tonga amin’ny tany onenana manontolo izany”. — Apokalypsy 3:10, MN.