Ny fanasitranana mahagaga: Inona no soa azo avy amin’izany?
Anakoakoan’ny feon-gitara, trompetra, vely amponga sy ampongatapaka kely ary ny kipantsona ny aty trano fiangonana. Azon’ny hery tsy hita maso ny lehilahy sy ny vehivavy ary ny ankizy ka mandihy sy mihira. Izany no fotoana tsara hanaovana fanasitranana.
Miakanjo fotsy malalaka ilay mpanasitrana ary manomboka mametra-tanana eo amin’ny kilemaina iray izay mandadilady. Avy eo dia tonga ny anjaran’ny jamba iray, izay manafina ny masony maty ao ambadiky ny solomaso mainty. “Fahagagana!” hoy ny fihiakan’ny mpanatrika raha mbola manomboka mandeha ilay mandringa ary mahita indray ilay jamba...
FAHITA ny fisehoan-javatra toy izany any Afrika ao amin’ny Fiangonana be dia be izay manao fanasitranana. Ao amin’io kontinanta io tokoa, toy ny any amin’ny tany hafa, dia mahazo olona maro ny mpanasitrana satria izy ireny manantitrantitra fa afaka manala fahasahiranana isan-karazany noho ny vavaka sy ny finoana an’Andriamanitra. Mitodika any amin’ny mpanasitrana àry ny olona sasany satria manana fahasahiranana ara-bola; ny hafa mba ho sitrana satria momba, noho izany heverina matetika ho fahafaham-baraka teo anivon’ny vahoaka afrikana.
Matetika anefa dia noho ny fahasahiranana ara-pahasalamana no anatonana mpanasitrana. Na dia tondraka aza ny fanafody eo amin’izao tontolo izao ka manao fiezahana mendrika hoderaina ny fitsaboana mba hitondrana fanamaivanana ho an’ny marary, dia mbola lavitra ny olombelona ny fahitana fanafodin’ny aretina ara-batana rehetra. Ny olona sasany dia nandany harena nikatsahana fahasitranana, nefa tsy nisy vokany. Amin’izany, dia tsy mahagaga raha mitodika any amin’ny mpanasitrana ny maro, rehefa tsy hitany intsony izay hatao.
Misy manantitrantitra fa nanaovana fanasitranana mahagaga ny tenany ary tsy hitany izay ifanoheran’izany fahagagana izany amin’ny kristianisma. Noho ireo mpanasitrana milaza matetika ho manao zavatra amin’ny anaran’i Jesosy tokoa, dia tsy mahalana ireo mpianany no sady anisan’ny fivavahana lehibe sy ny Fiangonana iray manao fanasitranana koa. Mety anefa ve ny hitadiavan’ny tena mpivavaka amin’Andriamanitra fanampiana avy amin’ny mpanasitrana iray (Jaona 4:23)? Ary azo atao tokoa ve ny milaza fa avy amin’Andriamanitra ireo fanasitranana ataon’ny mpanasitrana?