Fanaovana fanambarana any amin’ny toeram-piasana araka ny fomba japone
NY FANDIDIAN’I Jesosy Kristy ny amin’ny hanitarana ny asa fanambarana “hatramin’ny faran’ny tany” dia tokony hahakasika ny toeram-piasana. Fihaikana tokoa any Japon, ny fanaovana fanambarana ny amin’ilay Fanjakana amin’ny olona miasa any amin’ny biraom-panjakana sy any amin’ny kompania lehibe. Nahazo lalana hanao fanambarana amin’ny gazety tao amin’ny trano fiasana iray nandritra ny fiatoana amin’ny sakafo antoandro ny mpitory ilay Fanjakana tao amin’ny kongregasiona iray. Tsy vitan’ny hoe nivavaka tamin’i Jehovah mba hanome azy herim-po fotsiny ireo mpitory, fa nitandrina fatratra koa ny amin’ny fitafiany sy ny fitondrantenany ary nanomana mihitsy karatra misy ny anarany sady mampahafantatra azy ho Vavolombelon’i Jehovah.
Nanatona ny mpiasa ny Vavolombelona tamin’ny fitenenana hoe: “Aza fady tompoko, nahazo lalana hiresaka amin’ny olona ato aho. Tsy mampaninona anao ve ny mihaino ahy eto am-pisakafoana?” Tokony haneho fahaiza-mitsara zavatra sy hampiasa teny “mamy sira” ireo Vavolombelona. (Kolosiana 4:6.) Nametraka gazety 39 izy ireo tamin’ny fitsidihany voalohany, nefa voatery niverina inefatra izy ireo mba hahavitana ilay trano misy rihana fito izay iasan’ny olona 1500. Tamin’ny fitambarany dia nametraka gazety maherin’ny zato sady afaka nanomboka lalana fizarana gazety sy fiverenana mitsidika izy ireo.
Niverina nitsidika tale ny iray tamin’ireo mpitory. Rehefa nandre ny Soratra masina novakina tao amin’ny Baiboly Fandikan-tenin’izao tontolo izao vaovao izy dia niteny hoe: “Mora azo ity Baiboly ity. Ilay novakiko teo aloha dia amin’ny fiteny japone tranainy ary tena sarotra vakina.” Nomena Baiboly Fandikan-tenin’izao tontolo izao vaovao izy ny herinandro nanaraka.
Afaka manao bebe kokoa ve ianao amin’ny fitoriana ny vaovao tsara amin’ny ‘karazan’olona rehetra’ ao amin’ny faritanin’ny kongregasiona misy anao, ka anisan’izany ireo faritanàna be toeram-piasana? — Jereo 1 Timoty 2:4, MN.