Nisahirana fatratra tamin’ny vaovao tsara
NY APOSTOLY Paoly dia tao anatin’ny toe-javatra sarotra izay tsy takona afenina amin’ireo Vavolombelon’i Jehovah minisitra manontolo andro — tsy dia mba nanana izy teo amin’ny ara-bola. Noho izany, tany Korinto izy dia nanao ny asa tsotra fanamboarana lay izay nianarany fony izy mbola tanora. Mafy ilay asa, ary nety ho nandeha ra ny tanany indraindray tamin’ny fikirakirana ilay fahan-day nahery. Zara raha nahazo ny sakafo sy ny fitafiany ny vola azo, nefa afa-po izy satria rehefa vita ny asany ara-nofo isan’andro, dia nametraka ireo fitaovam-piasany izy ary nanome ny toerana voalohany ho an’ilay asa fototry ny nahatongavany tany Korinto — nitory ny vaovao tsara izy! — Filipiana 4:11, 12.
Rehefa Sabata, dia nizotra ho any amin’ny synagoga i Paoly. Marina fa nanatona ireo Korintiana mpihaino azy “tamin’ny fahalemena sy ny fahatahorana ary ny fangovitana be” i Paoly teo am-boalohany. (1 Korintiana 2:1, 3). Nefa natosiky ny fihetsika nasehon’ny sasany nanoloana ny hafatra nentiny i Paoly ka nanohy “nanao lahateny tao amin’ny synagoga isan-tsabata ary nandresy lahatra ny Jiosy sy ny Grika.” — Asan’ny apostoly 18:1-4, MN.
Nandritra ny fotoana sasany anefa i Paoly dia afaka nanao nihoatra noho ny fitoriana tapak’andro. Avy eo dia tonga avy any Makedonia ry Silasy sy Timoty nitondra fandraisana anjara tamin-kalalahan-tanana ary ‘nanome azy izay nilainy’. (2 Korintiana 11:9; Filipiana 4:15). Nampahery koa ny vaovao nilaza fa niorina mafy ny rahalahy tany Tesalonika na dia teo aza ny fanenjehana. — 1 Tesaloniana 3:6.
Ny vokany teo amin’i Paoly? “Nanomboka nisahirana fatratra tamin’ny teny i Paoly [“nanokana ny fotoanany rehetra hitoriana”, La Bible de Jérusalem; Today’s English Version], ary nitory tamin’ny Jiosy mba hanaporofoana fa i Jesosy no Kristy.” (Asan’ny apostoly 18:5). Nony afaka tamin’ny fanerena ara-bola nandritra ny fotoana sasany i Paoly, dia tsy nandry ny eritreriny raha tsy niverina ho amin’ny fitoriana manontolo andro izy. Niverina tamim-pahavitrihana ho amin’io asa io izy, tsy tamin’ny fitoriana tamin’ny Jiosy ihany fa tamin’ny fakana fotoana hanoratana ny voalohany tamin’ireo epistiliny ara-tsindrimandry koa aza, dia ny taratasy ho an’ny Tesaloniana izany!
Ohatra ho antsika amin’izao andro izao
Notahirizina ny fitantarana ny asa mafy nataon’i Paoly tany Korinto mba hampirisihana ny kristiana rehetra hisahirana fatratra amin’ny vaovao tsara. Takatr’i Paoly fa i Jesosy Tompo mihitsy no namindra tamin’ny mpianany ny voninahitra ambony amin’ny maha-“fahazavan’izao tontolo izao”. Tsy tokony hafenin’izy ireo izany fahazavana izany. Hoy i Jesosy tamin’izy ireo: “Aoka hazava eo imason’ny olona toy izany koa ny fahazavanareo, mba hahitany ny asa soa ataonareo ka hankalazany ny Rainareo Izay any an-danitra.” (Matio 5:14-16). Izany dia midika fandraisana anjara amin’ny fomba feno amin’ny asa fitoriana nambaran’i Jesosy mialoha. (Matio 24:14; 28:19, 20; Asan’ny apostoly 1:6-8). Ny fitoriana io vaovao tsaran’ny Fanjakana io dia antony iray lehibe indrindra nisian’ny kongregasiona kristiana.
Ireo kristiana voalohany, sahala amin’i Paoly, dia nandray an’io asa fitoriana io ho zava-dehibe. Araka izany, rehefa nihevitra ireo fahavalon’Andriamanitra fa nahavono ilay fahazavana marina tamin’ny fanaovana izay hahafaty “ny Tompon’ny aina” tamin’ny fomba tsy nifaditrovana, dia nanohy niaina tamin’ny naha-fahazavan’izao tontolo izao azy kosa ireo mpanara-dia azy, ary nitory tamin-kerimpo. (Asa 3:15). Na ny fanenjehana aza dia tsy nahafoana ny fiezahan’izy ireo. Hoy ny fitantaran’ny Baiboly: “Tsy nitsahatra nampianatra sy nitory an’i Jesosy ho Kristy [ny vaovao tsara momba an’i Kristy Jesosy, MN] isan-andro teo an-kianjan’ny tempoly sy tao an-trano izy.” (Asan’ny apostoly 5:42). Tsy nisy na inona na inona afaka nitana azy ireo!
Amin’ny andro ankehitriny, ny kristiana dia misahirana fatratra amin’ny asa fanambarana toy izany koa. Hatramin’ny faran’ny taonjato faha-19, dia nanomboka nahita ny ilàna ny hizarana amin’ny hafa ireo fahamarinana ao amin’ny Baiboly ireo mpianatra ny Tenin’Andriamanitra naniry hanao ny tsara. Niforona ny Zion’s Watch Tower Tract Society, fikambanana iray nanjary niitatra naneran-tany, tamin’ny 1884. Ireo mpianatra ny Baiboly ireo, izay fantatra ho ny Vavolombelon’i Jehovah hatramin’ny 1931, dia nameno ara-bakiteny ny tany tamin’ny fahalalana ny Tenin’Andriamanitra. Ny asa lehibe nataony dia nahatonga fisiana tafika lehibe iray matanjaka misy olona maherin’ny efatra tapitrisa! Ary tsy isalasalana fa hanohy hiitatra ny isan’izy ireo eo ambany fitarihan’i Jehovah. — Isaia 60:22.
Eo am-panaovana ny anjaranao ve ianao?
Hoy i Jesosy: “Be ny vokatra, fa ny mpiasa no vitsy.” (Matio 9:37, 38). Tamin’ny 1990, dia olona efa ho folo tapitrisa no nanatrika ny Fahatsiarovana ny nahafatesan’i Kristy. Hery mahagaga toy inona moa izany ho an’ny fijinjana mitombo maneran-tany! Nefa na dia mifaly amin’izany fitarana mitohy izany aza ny tsirairay dia tsy maintsy manontany tena hoe: ‘Hatraiza aho no mandray anjara amin’io asa lehibe io? Moa ve aho manao izany tsy tapaka — isan-kerinandro raha azo atao?’
Tsy maintsy mandray fitarihana amin’io asa io ireo loholona amin’ny maha-“fianaran’ny ondry” azy ireo. (1 Petera 5:3). Marina fa manana asa tsy ara-pivavahana ny ankamaroan’ireo loholona. Toy izany koa ny apostoly Paoly fony izy tany Korinto. Kanefa nanokana fotoana hanaovana asa fitoriana tsy tapaka izy. Loholona maro be amin’izao andro izao no misahirana mafy amin’ny raharaha ara-panahy toy izany isaky ny faran’ny herinandro. Mety hisy vokany mahery sy mampahery eo amin’ny kongregasiona manontolo izany. Mandritra ny volana vitsivitsy, rehefa misy ezaka manokana atao, dia misy tokoa kongregasiona sasantsasany ahitana ny ankamaroan’ny mpitory ao aminy manao ny asan’ny mpitory maharitra. Ny mahatonga izany ve? Mandray fitarihana ireo loholona eo amin’ny fitoriana sy eo amin’ny fandaminana ireo fandaharana ho amin’ny asa fitoriana.
Afaka ny ho hery mitaona mahasoa eo amin’ny kongregasiona toy izany koa ireo mpikarakara momba ny asa raha toa izy ireo ka mandray anjara tsy tapaka amin’ny asa fitoriana. Tadidio fa takin’ny Soratra masina amin’izy ireo ny ho “maotona, (...) lehilahy manompo amin’ny fomba tsara dia tsara.” (1 Timoty 3:8, 13, MN). Tena ilaina ny fahatokiana eo amin’ny asa fitoriana ho an’ny rahalahy iray mba hahafenoana fepetra ho loholona na ho mpikarakara momba ny asa. — Titosy 1:8, 9.
Sahala amin’i Paoly, ny sasany dia afaka mampihena ny asany tsy ara-pivavahana ary manao ny asan’ny mpitory maharitra. Ny isan’ny mpitory maharitra mandavantaona sy mpanampy ary manokana, avy teo amin’ny 137 861, vao folo taona lasa izay, dia tafakatra ho 536 508 tamin’ny 1990. Azo antoka fa ny fitahiana sy ny fankasitrahan’i Jehovah ihany no afaka mitondra izany. Ireo mpitory maharitra anefa dia tsy maintsy miahy ny amin’ny fampiasana amim-pahendrena ny fotoana fa tsy ny fanisana ora fotsiny. Ry mpitory maharitra, moa ve ianareo miomana tsara sy mamokatra tsara eo amin’ny fanompoana? Moa ve ianareo miezaka mafy mba hanao fihatsarana mitohy mba hahatonga ny fanompoanareo hamokatra tokoa?
Ireo valisoa azo amin’ny fanompoana voalanjalanja
Moa ve ianao mankasitraka ny fanazavana iankinan’ny aina atolotra isam-bolana ao amin’ny Ny Tilikambo Fiambenana sy ny Mifohaza!? Tsy isalasalana fa izany no izy. Moa ve ny fankasitrahanao nanosika anao handray anjara amin’ny fizarana ireo gazety ireo? Nanao toy izany ny anabavy iray any Botswana. Nanohitra ny fahamarinana izy taloha, nefa namaky zavatra avy ao amin’ireo gazety ireo taminy ny vadiny. Tamin’ny farany, dia niova fo izy ka tonga Vavolombelona. Na dia tsy mahay mamaky teny aza izy, dia tena mahita fahombiazana amin’ny fametrahana gazety, amin’ny fitenenana hoe: “Tsy mahay mamaky teny aho, nefa vakin’ny vadiko amiko ireto gazety ireto. Tiako tokoa izy ireto, ary azoko antoka fa ho toy izany koa aminao.”
Nahoana raha mandray anjara isan-kerinandro amin’io asa famonjena aina io? Raha vao manana ireo toetra ara-panahy takina ianao, dia ho faly ny kongregasiona kristiana hanampy anao hanomboka hanao izany. Mbola lafiny iray monja amin’ny asa anefa ny fametrahana gazety. Na iza na iza misahirana fatratra amin’ny vaovao tsara dia miezaka hanana fanompoana voalanjalanja. Ohatra, ny Fikambanana Watch Tower dia mamoaka boky an-tapitrisany maro, ary atolotra ny vahoaka ireo ho toy ny loharanon-tsakafo ara-panahy maharitra. Efa tonga ampy fahaizana ve ianao eo amin’ny fanompoanao mba hametraka boky, toy ny Azonao atao ny hiaina mandrakizay ao amin’ny paradisa eto an-tany?
Ary ahoana ny amin’ny olona maneho fahalianana? Moa ve ianao mandray an-tsoratra tsara mba hiverenana mitsidika azy ireny? Ny fitsidihana toy izany dia mety hitarika ho amin’ilay lafiny amin’ny asa izay mitondra ny fifaliana lehibe indrindra amin’ny zavatra rehetra, dia ny fampianarana Baiboly any an-tokantrano. Tadidio fa nandidy antsika i Jesosy ao amin’ny Matio 28:19, 20 mba ‘hanao mpianatra, hanao batisa azy ireny’. Milaza fiarahana mianatra ny Baiboly amin’izy ireny izany. Marina fa mitaky faharetana mazàna ny fanombohana fampianarana iray. Nisy Vavolombelona iray tojo mpivady efa bebe taona nanaiky tamim-pahatsorana fampianarana Baiboly any an-tokantrano. Nefa nanemotra ny fianarana telo herinandro nisesy izy ireo. Tamin’ny farany dia natomboka ny fampianarana. Avy eo, dia nisy fotoana tsy nianaran’ilay mpivady, saika isaky ny herinandro fianarana. Tamin’ny farany anefa dia nandroso hatramin’ny batisa ilay ramatoa. “Taorian’ny nahavita batisa azy”, hoy ny fitadidian’ilay rahalahy, “dia vonton-dranomasom-pifaliana ny masony, ka nahatonga ahy sy ny vadiko hitomany noho ny hafaliana koa.” Eny, mitondra hafaliana tsy hay lazaina ny fisahiranana fatratra amin’ny vaovao tsara!
Ataovy izay hahafahanao
Nanorina ohatra tsara dia tsara hotahafintsika ny amin’ny fandavan-tena i Jesosy Kristy sy ny apostoly Paoly. Ary manana ohatra maro dia maro harahina isika eo anivon’ny Vavolombelon’i Jehovah amin’ny andro ankehitriny. Tonga ny fotoana ho an’izay rehetra mahalala ny vaovao tsara mba hahatongavana ho marisika tanteraka eo amin’ny fampahafantarana izany amin’ny hafa. Manome antoka antsika ny Baiboly fa “tsy foana tsy akory” ny asa mafy rehetra toy izany. — 1 Korintiana 15:58.
Toa an’i Paoly, ny ankamaroany dia manana adidy atrehina eo amin’ny ara-bola. Noho izany, dia maro no mety tsy ho afaka hanao ny asan’ny mpitory maharitra. Nefa noho ny fanampian’i Jehovah, dia afaka manaraka ity torohevitra tsara omena ao amin’ny Romana 12:11 ity avokoa ny rehetra: “Mazotoa, fa aza malaina, ary aoka hafana fo amin’ny fanompoana ny Tompo [Jehovah, MN].” Ary raha miova ny toe-javatra ka mamela hisian’ny fotoana misimisy kokoa holanina amin’ny asan’i Jehovah, izay rehetra tia marina ny sitrapon’i Jehovah, sahala amin’i Paoly, dia hanararaotra ny fahafahana. Aoka ianao hisahirana fatratra amin’ny vaovao tsara! Ny fanaovana toy izany dia tsy hoe hitondra fitahiana ankehitriny fotsiny fa amin’ny hoavy dia hitondra ho amin’ny fiainana mandrakizay hisian’ny fifaliana sy fahasambarana tsy hanam-pahataperana! — Matio 19:28, 29.