Aoka Ianao ‘Hisahirana Fatratra’ Amin’ny Fanompoanao
1 Rehefa mamaky isika fa niasa nanao lay ny apostoly Paoly fony izy tany Korinto, dia mety hanatsoaka hevitra isika fa nametra ny fahafahany hitory izany. Milaza toy izao anefa ny Asan’ny Apostoly 18:5: “Dia [nisahirana fatratra tamin’ny teny, NW ] Paoly ka nanambara tamin’ny Jiosy fa Jesosy no Kristy.” Nahoana i Paoly no nisahirana toy izany tamin’ny asa fitoriana? Nanamafy ny Tompo fa mbola nisy olona maro be tokony hampianarina tao Korinto, na dia maro aza no efa tonga mpino tao amin’io tanàna io. (Asa. 18:8-11) Moa ve isika manana antony mitovy amin’izany hisahiranana fatratra amin’ny fanompoantsika? Eny. Olona maro kokoa no mety ho hita ka hampianarina ny fahamarinana.
2 Mandania fotoana bebe kokoa amin’ny fanompoana, mandritra ny Aprily: Azo inoana fa tanjontsika ny ho be atao hatrany eo amin’ny fitoriana ny vaovao tsara isam-bolana. Misy anefa volana sasany manome antsika fahafahana bebe kokoa ‘hisahirana fatratra’ amin’io asa io. Anisan’izany ny volana Aprily, amin’ny fara tampon’ny vanim-potoanan’ny Fahatsiarovana. Moa ve ny tarehin-javatra misy anao mamela anao hanao ny asan’ny mpisava lalana mpanampy na hampitombo ny ezaka ataonao amin’ny fanompoana, mandritra ny Aprily sy May? Nandray fitahiana tondraka ny mpitory maro izay nanao toy izany. (2 Kor. 9:6) Tsarovy fa mampifaly an’i Jehovah ny fanompoana amin’ny fanahy rehetra ataonao, raha manao izay azonao atao ianao. (Lioka 21:2-4) Na toy inona na toy inona toe-javatra misy anao, dia ataovy ho tanjonao ny ‘hisahirana fatratra’ amin’ny fanompoanao mandritra ny Aprily. Ary aza hadinoina ny mamerina ny tatitra momba ny fanompoana amin’ny faran’ny volana mba ho voaisa miaraka amin’ny an’ny vahoakan’i Jehovah hafa ny asanao.
3 Tsidiho ireo vaovao nanatrika ny Fahatsiarovana: Nisy 53 158 ny isan’ny mpanatrika ny Fahatsiarovana tamin’ny taon-dasa. Mbola tsy fantatra ny ho isan’ny mpanatrika azy io amin’ity taona ity. Asehon’ireo tatitra anefa fa tena azo antenaina ho betsaka kokoa ny “vokatra”. (Matio 9:37, 38) Ataovy àry izay hitsidihana haingana araka izay azo atao ireo olona nanatrika ny Fahatsiarovana, mba hanampiana azy amin’ny lafiny ara-panahy. Hamela ‘ilay ratsy hanaisotra izay nafafy tao am-pony’ mantsy ny fanemorana ireny fitsidihana ireny. (Matio 13:19) Ny fanaovana fitsidihana haingana dia hampiseho fa tena ‘misahirana fatratra’ amin’ny fanompoanao ianao.
4 Ampio hatrany ireo tsy mitory intsony: Natomboka tamin’ny Febroary ny ezaka manokana hanampiana ireo tsy mitory intsony. Raha misy amin’izy ireo mbola tsy nahazo fitsidihan’ny mpiandry, dia tokony hanao fandaharana ny anti-panahy mba hitsidihana azy, alohan’ny hifaranan’ny Aprily. Hiezaka mafy ireo anti-panahy hamantatra ny antony fototry ny zava-manahirana an’ilay olona, sy ny fomba tsara indrindra hanampiana azy hanompo an’i Jehovah amim-paharisihana indray. Ny fanampiana feno fitiavana toy izany dia mampiseho fa mihevitra ho zava-dehibe ny andraikiny amin’ny maha mpiandry ny “ondrin’Andriamanitra” ireo anti-panahy. (1 Pet. 5:2; Asa. 20:28) Azony ampiasaina ny fanoloran-kevitra tsara dia tsara ao amin’Ny Tilikambo Fiambenana 15 Septambra 1993, pejy 22 sy 23, rehefa mikarakara iray amin’ireo zava-manahirana iombonana dimy mety hahazo ireo tsy mitory intsony izy ireo. Ny tsara indrindra, dia ny mbola hahafahan’ny sasany hiverina hitory indray mandritra ny Aprily.
5 Manampia olona maro kokoa ho tonga mpitory tsy vita batisa: Vao nahafeno fepetra ho tonga mpitory ny vaovao tsara ve ny zanakao? Ahoana ny amin’ireo miara-mianatra ny Baiboly aminao? Tsy fotoana mety mba hanombohany hitory ve ny Aprily, raha eken’ireo anti-panahy izy? Raha manao fandrosoana ny olona iray ary efa nahavita ny bokikely Takina sy ny boky Fahalalana dia azo tohizina ny fianarana, amin’ny alalan’ny boky faharoa toy Ny Tenin’Andriamanitra na Ny Tena Fiadanana na Tafaray ao Amin’ny Fanompoam-pivavahana. Ny tanjonao dia ny hahatakaran’ilay olona tsara kokoa ny fahamarinana sy ny hahafenoany ny fepetra mba ho tonga mpitory tsy vita batisa ary hahatonga azy ho Vavolombelon’i Jehovah vita fanoloran-tena sy batisa avy eo.—Efes. 3:17-19; 1 Tim. 1:12; 1 Pet. 3:21.
6 Raha tonga tsy tapaka sy miahy amim-pahatsorana ireo olona ampianarinao Baiboly ianao, dia ny tenan’izy ireo mihitsy no hanaiky ny fahamarinana amin’ny farany. Nifankahita tamin’ny mpivady zokiolona izay nanaiky tamim-pahatsorana hianatra Baiboly ny rahalahy iray. Nahemotr’izy mivady intelo nisesy anefa ny fianarana. Natomboka ihany ilay izy tatỳ aoriana. Nataon’izy mivady isaky ny tapa-bolana indray avy eo. Nandroso ihany anefa tamin’ny farany ilay ramatoa ka tonga hatramin’ny batisa. “Vonton-dranomasom-pifaliana ilay ramatoa rehefa vita ny batisany”, hoy ilay rahalahy nahatsiaro, “hany ka latsa-dranomaso noho ny hafaliana koa izahay mivady.” Eny, mitondra fifaliana lehibe ny hoe ‘misahirana fatratra’ amin’ny vaovao tsara!
7 Asehon’ny faminaniana ara-baiboly sy ireo zava-miseho eran-tany fa efa lasa lavitra amin’ny fotoan’ny farany isika ankehitriny. Amin’izao fotoana izao indrindra ny vahoakan’Andriamanitra rehetra no mila ‘misahirana fatratra’ amin’ny fampahafantarana ny hafa ny vaovao tsara. Nanome toky ny apostoly Paoly fa tena “tsy foana tsy akory” ny asa mafy toy izany “ao amin’ny Tompo”.—1 Kor. 15:58.