Tadidinao Ve?

Nankasitrahanao ve ny famakiana ireo nomeraon’ny Ny Tilikambo Fiambenana sy ny Mifohaza! faramparany? Tsapao àry, raha afaka mamaly ireto fanontaniana manaraka ireto ianao:

▫ Inona no naseho tandindona tamin’ny tombontsoam-panompoana fanampiny nomena ny Netinima sy ny taranaky ny mpanompon’i Solomona tamin’ny fiverenany avy tamin’ny sesitany tany Babylona?

Amin’izao andro izao, raha eo am-pihenana isa hatrany ny sisa amin’ny Isiraely ara-panahy eto an-tany, ny ondry hafa kosa dia mitombo isa hatrany. Ny sasany amin’ireny olona toy ny ondry ireny izao, sahala amin’ireo Netinima sy ny taranaky ny mpanompon’i Solomona, dia nanankinana andraikitra mavesatra eo ambany fanaraha-mason’ny sisa voahosotra. (Isaia 61:5). — 15/5, pejy faha-16-17.

▫ Inona no tian’i Zefania holazaina rehefa niteny izy hoe: “Angamba ho voafina hianareo amin’ny andro fahatezeran’i Jehovah”? (Zefania 2:2, 3).

Na iza na iza te ho voaro amin’ny “fahoriana lehibe” ho avy, dia tsy tokony hihevitra hoe voavonjy indray mandeha dia ho voavonjy mandrakizay. (Matio 24:13, 21). Ny fanafenana ny olona iray amin’izany andro izany dia miankina amin’ny fanohizany manao ireto zavatra telo ireto: Tsy maintsy mitady an’i Jehovah izy, mitady ny fahamarinana, ary mitady ny fandeferana. — 15/5, pejy faha-24-25.

▫ Amin’ny heviny ahoana i Mikaela no “mitsangana” amin’ny “andro farany”? (Daniela 12:1, 4).

Hatramin’ny nametrahana azy ho Mpanjaka tamin’ny 1914, dia “mitsangana” i Mikaela mba hiaro ny vahoakan’i Jehovah. Tsy ho ela anefa, dia tsy maintsy ‘hitsangana’ amin’ny heviny manokana i Mikaela — amin’ny maha-Irak’i Jehovah azy izay hanaisotra ny faharatsiana rehetra eto an-tany sy amin’ny maha-Mpanafaka ny vahoakan’Andriamanitra azy. — 15/5, pejy faha-26.

▫ Miankina amin’inona ny fahasambarana marina?

Ny fahasambarana marina dia miankina amin’ny fifandraisana sarobidy ananantsika amin’i Jehovah, miankina amin’ny fankasitrahany sy ny fitahiany. (Ohabolana 10:22). Noho izany, ny fahasambarana marina dia tsy ho azo ivelan’ny fankatoavana an’i Jehovah sy ny fanekena ny sitrapony amim-pifaliana. (Lioka 11:28). — 1/6, pejy 16, 19.

▫ Rehefa nanao fanasitranana mahagaga i Jesosy, moa ve ny finoana notakina tamin’ny olona iray nositranina?

Nilaina tamin’ny fetrany sasany ny finoana ho an’ny maro izay nanatonana an’i Jesosy mba hositranina. (Matio 8:13). Kanefa, tsy nisy fiekena finoana notakina mba hanatanterahan’i Jesosy ny fahagagana nataony, toy ny tamin’ny nanasitranany ny lehilahy nandringa iray izay tsy nahalala akory hoe iza i Jesosy. (Jaona 5:5-13). Naverin’i Jesosy tamin’ny toerany mihitsy aza ny sofina tapaka an’ny mpanompon’ny mpisoronabe, izay anisan’ny antokon’ny fahavalon’i Jesosy. (Lioka 22:50, 51). Natao tamin’ny herin’ny fanahy masin’Andriamanitra ireny fahagagana ireny fa tsy noho ny finoan’ilay olona narary. Mifohaza! No. 3/1992, pejy faha-20.

▫ Inona no asehon’ilay “harato-tarihina” voaresaka ao amin’ny fanoharana nataon’i Jesosy ao amin’ny Matio 13:47-50?

Ilay “harato-tarihina” dia mampiseho fitaovana iray eto an-tany izay milaza ho kongregasionan’Andriamanitra ary manangona “hazandrano”. Nahafaoka ny Fitambaran’ireo Firenena Lazaina fa Kristiana ary ny kongregasionan’ireo Kristiana voahosotra izy io, ka ity farany dia nanohy nanangona ‘hazandrano tsara dia tsara’, teo ambany fitarihan’ireo anjely, mifanaraka amin’ny voalaza ao amin’ny Matio 13:49. — 15/6, pejy faha-20.

▫ Inona no fotopoto-pitsipika sasany izay tsy maintsy nampiharin’ireo mpitsara teo amin’ny Isiraely rehefa nanatanteraka ny asa nanendrena azy izy?

Fitsarana mitovy ho an’ny manankarena sy ny mahantra, tsy fizahan-tavan’olona tanteraka, ary tsy fandraisana kolikoly. (Levitikosy 19:15; Deoteronomia 16:19). — 1/7, pejy faha-13.

▫ Inona no tokony hiezahan’ireo loholona hotontosaina amin’ny alalan’ny fihainoana raharaha ara-pitsarana?

Ny tanjona iray dia ny hahitana ireo zava-misy amin’ilay raharaha, ka izany dia atao amim-pitiavana. Rehefa fantatra izany, ireo loholona dia tsy maintsy manao izay rehetra ilaina hatao mba hiarovana ny kongregasiona sy mba hitanana ao anatiny ny fari-pitsipika ambonin’i Jehovah sy ny fiasan’ny fanahiny malalaka. Ny fihainoana dia atao koa mba hamonjena, araka izay azo atao, ilay mpanota tandindomin-doza. (Ampitahao amin’ny Lioka 15:8-10.) — 1/7, pejy faha-18-19.

▫ Nahoana ireo nofinofy mifandray amin’ny firaisan’ny lahy sy ny vavy tsy ara-dalàna no manimba aoka izany?

Raha jerena amin’ny tenin’i Jesosy ao amin’ny Matio 5:27, 28, izay rehetra mikiry manaram-po amin’ny nofinofy momba ny firaisana tsy ara-dalàna dia meloka ho mijangajanga ao am-pony. Tena misy ny loza, dia ny mety hitarihan’ny nofinofy toy izany ho amin’ny fahalotoam-pitondrantena. — 15/7, pejy faha-15.

▫ Amin’ny fomba ahoana avy no azon’i Jehovah anampiana antsika mba hijery ny fisedrana amin’ny fomba mety mba hiaretana azy?

Mety hisy andinin-teny hanintonana ny saintsika, angamba avy amin’ny mpiray finoana izany, na mandritra ny fianarana Baiboly. Mety hanampy antsika hahita ny tokony hataontsika ny zava-mitranga tarihin’Andriamanitra amim-pahakingana. Mety handray anjara amin’ny fanoroana lalana antsika ny anjely, na mety hahazo fitarihana avy amin’ny fanahy masina isika. (Hebreo 1:14). — 15/7, pejy faha-21.

▫ Moa ve ny Konsilin’i Nicée tamin’ny 325 am.f.i. no nanorina na nanamafy ny fampianarana ny amin’ny Trinite?

Tsia, nampitovy fotsiny ny Zanaka tamin’ny Ray ho “mitovy firafitra” ny Konsilin’i Nicée. Ny hevitra fa ny Ray sy ny Zanaka ary ny fanahy masina dia samy Andriamanitra marina sady mitovy raha ny amin’ny maha-mandrakizay, ny hery, ny toerana tanana ary ny fahendrena, ary anefa dia Andriamanitra iray ihany — Andriamanitra telo izay iray — dia tsy avy tamin’io konsily io na avy tamin’ireo Rain’ny Fiangonana talohany. — 1/8, pejy faha-20.

▫ Moa ve i Joba irery no olombelona nahatoky teo anatrehan’i Jehovah nandritra ny fotoana niainy? (Joba 1:8).

Tsia, ny bokin’i Joba ihany dia mampiseho fa i Eliho dia neken’Andriamanitra. Nandritra ny fotoana niainan’i Joba koa, dia nisy Isiraelita maro be nonina tany Egypta, ary tsy misy antony tokony hieritreretana fa izy rehetra ireo dia samy tsy nahatoky avokoa ka hoe tsy azo nekena teo imason’Andriamanitra. — 1/8, pejy faha-31.