Fanafoanana ny Fandotoana — Avy ao Am-po sy avy ao An-tsaina
TSY nataon’i Jehovah ho tia loto na korontana ny olombelona. Ny planeta fonenany dia natao ho paradisan’ny fahadiovana sy ny filaminana ary ny hakanton-javatra. Tsy fikasan’Andriamanitra ny hivadihan’izy io ho toeram-panariam-pako tsy maha-te hijery. — Genesisy 2:8, 9.
Rehefa nanda ny fitarihan’Andriamanitra anefa ny olombelona, dia nanomboka nanorina ny karazana fandehan-javatra eo amin’izao tontolo izao ho an’ny tenany manokana izy ireo. Noho izy ireo tsy nandray soa avy tamin’ny fahendren’Andriamanitra sy noho ny tsy fahampian’ny fanandraman-javatra hitany, dia voatery nianatra tamin’ny fanandranandramana izy ireo. Ny tantara tsy ara-pivavahana dia manamafy ilay fahamarinana ao amin’ny Baiboly hoe: tsy afaka manapa-tena amim-pahombiazana ny olombelona. Efa an’arivony taona maro no ‘nanapahan’olona ny namany ka nampidirany loza taminy’. (Mpitoriteny 8:9; Jeremia 10:23). Ny zava-manahirana ankehitriny momba ny fandotoana amin’ny endriny rehetra, dia vokatry ny tsy fahaizan’ny olombelona manapaka.
Fanarahana ny fomba fihevitr’Andriamanitra
Ny olona maniry ny hampifaly an’Andriamanitra dia miezaka mafy mba hiaina mifanaraka amin’ireo fari-pitsipika momba ny fahadiovana nomen’ny Mpamorona. Noho izany, dia niatrika zava-nanahirana ireo Vavolombelon’i Jehovah rehefa nisy fivoriambe iraisam-pirenena nokasaina hatao tany Prague, any Tsekoslovakia, teo antenatenan’ny taona 1991.a Olona sahabo ho 75 000 no hanatrika, dia vahoaka iray izay antonona tsara tao amin’ny Kianjan’i Strahov. Tsy nampiasaina efa hatramin’ny dimy taona anefa ilay kianja. Nila fanamboarana be izy io, tsy naha-te hijery noho ny fanimbana nataon’ny toetr’andro. Nisy Vavolombelon’i Jehovah sahabo ho 1 500 nandany 65 000 ora mahery mba hanavaozana sy handokoana azy io indray. Tamin’ny fotoan’ny fivoriambe, io ezaka manokana ho fanadiovana io dia nahatonga ilay kianja ho toerana mendrika hanaovana fanompoam-pivavahana tamin’i Jehovah, ilay Andriamanitra marina.
Inona no manosika ny Vavolombelon’i Jehovah hiavaka amin’ny hafa, kanefa izao tontolo izao amin’ny ankapobeny dia tsy mampiseho fahalianana firy amin’ny fahadiovana sy ny filaminana? Izany dia ny fahafantarana ny hasarobidin’ilay torohevitry ny Baiboly hoe: ireo Kristiana dia tokony hanafoana ireo lafin-toetra tsy manorina, toy ny fitiavan-tena, ny tsy fanehoam-piheverana, ny faniriana mihoa-pampana, ary ny tsy fahampiam-pitiavana. ‘Ario ny toetra taloha mbamin’ny asany’, hoy ny Baiboly. Soloy “toetra vaovao izay havaozina ho amin’ny fahalalana tsara araka ny endrik’Izay nahary azy” izy io. Ny toetra maha-izy ny olona iray izay miavaka noho ny fitiavana fahadiovana sy filaminana ary hakanton-javatra dia tsy manan-toerana ho an’ny fironana handoto. — Kolosiana 3:9, 10; 2 Korintiana 7:1; Filipiana 4:8; Titosy 2:14.
Ilay toetra vaovao dia mitaky ny hanisian’ny Kristiana fiheverana ny amin’ny fandotoana: tsy handoto tsy amim-piheverana izy ireo na tsy hiraharaha ka tsy hankatò ireo lalàna avoakan’ny fanjakana mba hiadiana amin’ny fandotoana. Izy io dia manampy azy ireo hanalavitra fihetsika tia manarinary fako eny rehetra eny, fihetsika tia tena sy kamo izay mitarika ho amin’ny loto miparitaka eny rehetra eny. Noho izy io mampirisika ny fanajana ny fananan’ny hafa, ilay toetra vaovao dia misakana ny fampiasana soratsoratra na sarisary eny amin’ny rindrina ho toy ny fomba filazana ny hevitry ny tena, na ho toy ny sangisangy tsy natao hanaovan-dratsy, na ho toy ny endri-javakanto iray azo isafidianana. Izy io dia mitaky ny hitanana ho madio ny trano, ny fiarakodia, ny akanjo ary ny vatana. — Ampitahao amin’ny Jakoba 1:21.
Raha ny amin’ireo olona tsy vonona ny hitafy io toetra vaovao io, dia ho fahadisoan’Andriamanitra ve ny hisakanana azy ireo tsy hahazo fiainana ao amin’ilay Paradisany ho avy? Tsia dia tsia. Na iza na iza mbola hanana fironana handoto miafina ao am-pony na ao an-tsainy dia hahatandindomin-doza ny hakanton’ny planeta Tany tafaverina ho paradisa, ka hahatonga alahelo ho an’izay maniry hitana izany hakanto izany. Sady ara-drariny no mampiseho fitiavana ilay fanapahan-kevitr’Andriamanitra ‘hanimba izay manimba ny tany’. — Apokalypsy 11:18; 21:8.
Tokony ho mpandray anjara mafana fo ve isika?
Milaza ve anefa izany fa takina amin’ny Kristiana ny hampirisihany amin-kafanam-po ny fanaovana ady amin’ny fandotoana na fandaharam-panadiovana?
Miharihary fa manimba ny fahasalamana sy ny tsy fananan’ny vahoaka ahiahy ny fandotoana. Manisy fiheverana mety ny amin’ny raharaha toy izany i Jehovah, araka ny hitantsika amin’ireo lalàna nomeny ny Isiraelita. (Eksodosy 21:28-34; Deoteronomia 22:8; 23:12-14). Tsy nisy mihitsy anefa fotoana nanomezany azy ireo toromarika handresy lahatra firenen-kafa tamin’ny raharaha nahakasika ny tsy fananan’ny vahoaka ahiahy; na dia ireo Kristiana tamin’ny taonjato voalohany koa aza dia tsy nasaina hanao izany.
Amin’izao andro izao, ireo raharaha momba ny tontolo iainana dia mety ho tonga raharaha ara-politika mora foana. Raha ny marina, dia misy antoko politika sasany naorina manokana indrindra mba handamina ireo zava-manahirana momba ny tontolo iainana. Ny Kristiana izay mamela ny tenany ho voataona hiandany amin’ireo laharana ara-politika dia tsy hialanalana amin’ny politika intsony. Nanorina izao fotopoto-pitsipika izao ho an’ny mpianany i Jesosy: “Tsy naman’izao tontolo izao izy, tahaka Ahy tsy naman’izao tontolo izao.” Ny Kristiana izay tsy miraharaha izany fepetra izany dia mampidi-doza ny tenany amin’ny fiandaniana amin’ireo “mpanapaka izao tontolo izao, izay olona mihalevona”. — Jaona 17:16; 1 Korintiana 2:6.
Tsy nanandrana nandamina ireo zava-nanahirana ara-tsosialy rehetra tamin’ny androny i Jesosy; ary tsy nilaza tamin’ny mpianany mba hanao izany koa izy. Toy izao ny baikony tamin’izy ireo: “Koa mandehana hianareo, dia ataovy mpianatra ny firenena rehetra, manao batisa azy (...) sady mampianatra azy hitandrina izay rehetra nandidiako anareo”. Tsy nandidy azy ireo hanao tetik’asa momba ny tontolo iainana izy. — Matio 28:19, 20.
Rehefa nanazava ny amin’izay tokony hitana ny toerana voalohany eo amin’ny fiainan’ny Kristiana i Kristy, dia nilaza hoe: “Aza mitsahatra àry ny mikatsaka voalohany indrindra ilay fanjakana sy ny fahamarinany”. (Matio 6:33, NW ). Rehefa hampiharin’i Jehovah amin’ny ambaratonga maneran-tany ny fotopoto-pitsipiny marina, amin’ny alalan’ilay Fanjakana Mesianika, dia ho voalaminy ireo zava-manahirana momba ny tontolo iainana, amin’ny fomba raikitra sy amin’ny fomba mahafa-po ny rehetra.
Noho izany, ny Vavolombelon’i Jehovah dia mitana toerana voalanjalanja. Raha jerena araka ny Romana 13:1-7, dia tsy maintsy atao ny fankatoavan’izy ireo amim-pitandremana ireo lalàm-panjakana izay mifehy ny tontolo iainana. Fanampin’izany, ny fitiavana ny namana araka ny fomban’Andriamanitra, dia manosika azy ireo haneho fanajana ny fananan’ny hafa — na fananam-bahoaka izany na fananan’olona manokana — amin’ny tsy fanimbana ny endriny sy amin’ny tsy fanipatsipazana fako eny rehetra eny. Kanefa dia mazava fa tsy ampirisihina mba hitarika eo amin’ireo fandaharam-panadiovana ataon’izao tontolo izao izy ireo. Mametraka ara-drariny ny fitoriana ny hafatra momba ny Fanjakan’Andriamanitra eo amin’ny toerana voalohany izy ireo, amin’ny fahatakarana fa izany no fomba anaovan-tsoa maharitra indrindra.
Fanadiovana ara-panahy
Ireo Isiraelita fahiny dia nampitandremana imbetsaka ny amin’izay ho vokany, raha toa izy ireo ka mandoto ny tany amin’ny fandatsahan-dra, na amin’ny fananana fomba fiaina maloto ara-pitondran-tena, na amin’ny tsy fanajana ireo zava-masina. (Nomery 35:33; Jeremia 3:1, 2; Malakia 1:7, 8). Tamin’ny fomba nisy heviny dia nomelohina izy ireo noho io fandotoana ara-panahy io, fa tsy noho ny fandotoana ara-batana izay nety ho nahameloka azy ireo koa.b
Ny fandotoana na ny tsy fahadiovana ara-panahy àry izao no iezahan’ny Kristiana mafy hohalavirina. Manao izany izy amin’ny fitafiana ny “toetra vaovao”, izay manafoana ireo fironana mandoto avy ao am-po sy avy ao an-tsaina. Misy Vavolombelon’i Jehovah maherin’ny efatra tapitrisa mandray soa avy amin’io fanadiovana ara-panahy io, ka nahavita fanadiovana ara-pivavahana sy ara-pitondran-tena ary koa fahadiovana miavaka ara-batana tao amin’ny laharan’izy ireo. — Efesiana 4:22-24.
Izao andro izao no fotoana ho an’ny ezaka manokana ho amin’ny fanadiovana ara-panahy. Ny asa fanadiovana ara-batana maneran-tany dia hanaraka izany amin’ny fotoana mety, ka hamonjy ny fonenantsika tsy hanjary toeram-panariam-pako maneran-tany iray, amin’ny fanomezana azy ilay tontolo iainana tsy misy fandotoana mendrika azy. — Mpitoriteny 3:1.
[Fanamarihana ambany pejy]
a Mba hahazoana tatitra amin’ny antsipiriany momba io fitohitohizana fivoriambe tany Eoropa Atsinanana io, dia jereo ny Réveillez-vous! tamin’ny 22 Desambra 1991.
b Nahafantatra ny fomba fanao amin’ny fandrendrehana metaly ny Isiraelita. Nisy sisan-javatra avy tamin’ny toeram-pitrandrahany varahina sasany hita, ary narendrika ny varahina mba hanaovana ireo fitaovana tao amin’ny tempoly. (Ampitahao amin’ny 1 Mpanjaka 7:14-46.) Toa tsy azo inoana ny hoe ho azo natao tsy nisy fandotoana sasany io fandrendrehana io, dia fandotoana tamin’ny endriky ny setroka, sy tain-drendrika ary lavenona miaraka amin’ny voka-dratsiny hafa koa angamba. Na dia izany aza, i Jehovah dia toa vonona ny handefitra tamin’ny tsy fahadiovana kely izay voafetra tamin’ny toerana iray, tany amin’io faritra mitokana sy vitsy mponina mitsitokantokana io.