Manao Izay Rehetra Azonao Atao ve Ianao?

“HANAO ny faran’izay mety ho vitako aho.” Impiry impiry moa ireo teny ireo no arahin’ny hoe “kanefa” sy ny lisitra lava ben’ireo fialan-tsiny mba tsy hikelezana aina! Ahoana ny amin’ny fanolorantsika tena ho an’i Jehovah? Moa ve isika mitana ny teny nataontsika mba hanao izay rehetra azontsika atao ho azy?

Ny hevitry ny hoe manolo-tena dia hoe ‘manokana ny tena mba tsy hanolotra fanompoana na fanompoam-pivavahana afa-tsy ho an’ny andriamanitra iray na ho an’ny zavatra masina ihany’. I Jesosy dia nampiseho mazava tsara izay tafiditra amin’ny fanoloran-tena ho an’i Jehovah tamin’ny filazana hoe: “Raha misy olona ta-hanaraka Ahy, aoka izy handà ny tenany sy hitondra ny hazofijaliany ka hanaraka Ahy.” (Matio 16:24). Ny olona iray nanda ny tenany ka nanolo-tena ho an’Andriamanitra dia manao ny fanaovana ny sitrapon’Andriamanitra ho ny zavatra lehibe indrindra hokatsahiny eo amin’ny fiainany.

Amin’ny maha-vahoaka vita fanoloran-tena antsika, dia tsy maintsy mandini-tena tsara isika mba hahitana raha miaina mifanaraka amin’ny fanoloran-tenantsika. Nampiseho ny antony tokony handinihantsika tena i Petera rehefa nampirisika ireo Kristiana voahosotra toy izao: “Manaova izay rehetra azonareo atao mba ho azonareo antoka ny fiantsoana sy ny fifidianana anareo; satria raha tsy mitsahatra manao ireo zavatra ireo ianareo, dia tsy ho resy na oviana na oviana.” (2 Petera 1:10, NW ). Eny tokoa, raha manao izay rehetra azontsika atao isika, dia tsy ho voan’ny faharesena eo amin’ny ara-panahy.

Azo hatsaraina ny hoe izay rehetra azontsika atao

Amin’ny heviny miitatra kokoa, dia antenaina amin’ny mpanompon’Andriamanitra vita fanoloran-tena rehetra ny hanaovany izay rehetra azony atao, na ny faran’izay mety ho vitany, mba hanaovana izay sitrak’i Jehovah. Kanefa, mety hitombo ny hoe izay rehetra azontsika atao eo amin’ny fanaovana ny sitrapon’Andriamanitra. Ho an’ny ankizilahy kely telo taona, ny fanaovana raharaha madinika iray dia mety ho ny faran’izay mety ho vitany mba hanampiana an-dreniny, kanefa rehefa mihalehibe izy, dia ho afaka hanao betsaka kokoa. Mitovy amin’izany koa ny fitomboantsika ara-panahy — ny faran’izay nety ho vitantsika teo aloha dia mety ho tsy izany intsony. Voatosika hanao bebe kokoa ho an’i Jehovah isika.

Ny fankasitrahantsika mihamitombo an’i Jehovah dia manome tosika ho an’ny fahavononantsika hanao bebe kokoa. Ny fankasitrahana noho izay nataony ho antsika dia mihamafy noho ny fianarantsika manokana ny Teniny, ny Baiboly. Ohatra, rehefa mamakafaka amim-pitandremana sy misaintsaina momba ny nanirahan’i Jehovah ny Zanany mba hanomezan’io ny fanahiny hanafahana antsika amin’ny ota isika, dia voatosika hanompo ilay Loharanon’io fandaharana momba ny fanavotana io. (Jaona 3:16, 17; 1 Jaona 4:9-11). Arakaraka ny ‘anandramantsika sy izahantsika fa tsara i Jehovah’ no mahavoatosika ny fontsika hanompo azy. — Salamo 34:8.

Nahatakatra izany ny mpitory manontolo andro iray antsoina hoe Jetter. Mba hahafahana hanao fikarohana lalina kokoa momba izay nianarany, dia nanokana efitrano kely iray tao amin’ny tranony izy mba hanaovana izany. Namboariny izy io mba hahafahana hifantoka teo am-panaovana fikarohana. Nataony ho mora raisina teo amin’ny talantalam-boky ireo Index des publications de la Société Watch Tower ary koa ireo Ny Tilikambo Fiambenana sy Mifohaza! “Rehefa manao fikarohana momba ny fahazavana mahaliana iray aho”, hoy izy, “dia tsy andriko izay hizarana izany amin’ny hafa.”

Kanefa, na dia misakafo be indraindray aza ny olona iray, izany akory tsy manafoana ny mbola ilàny hisakafo isan’andro tsy tapaka ihany. Tsy misy hafa amin’izany koa, na dia manao fikarohana lalina nefa indray mandeha ao amin’ny Baiboly aza ny olona iray, izany akory tsy manafoana ny mbola ilàny sakafo ara-panahy isan’andro ihany. Nahatakatra i Ruth fa nila izany, satria hatramin’ny nahatsiarovany saina, ny fianakaviany dia niara-namaky ny Baiboly isa-maraina sy isan-kariva taorian’ny sakafo. Izao izy dia 81 taona, avy nandany maherin’ny 60 taona tamin’ny fanompoana manontolo andro, ary mbola mamaky ny Baiboly tsy tapaka ihany rehefa avy mifoha amin’ny 6 ora isa-maraina. Isaky ny avy maharay ireo gazety Ny Tilikambo Fiambenana sy Mifohaza! i Ruth, dia maka fotoana mba hamakiana azy ireo. Mamaky ny lahatsoratra tsirairay fara faharatsiny intelo na inefatra izy alohan’ny hianarana azy io any amin’ny kongregasiona. “Ny fandraisana ao an-tsaina ny Tenin’Andriamanitra no ilainao mba hitoerana ho matanjaka amin’ny finoana”, hoy izy. Nanampy azy haharitra teo amin’ny asa misionera nandritra ny taona maro koa izany.

Ny fanaovana izay rehetra azontsika atao mba hanampiana ny hafa

Amin’ny alalan’ny fianarana lalina sy tsy tapaka ny Tenin’Andriamanitra, dia mitombo ny zotom-pontsika hanompo an’Andriamanitra, ary misy zavatra ao anatintsika ao mandrisika antsika hanao bebe kokoa. (Ampitahao amin’ny Jeremia 20:9.) Ny zotom-po toy izany no nanosika an’i Hirohisa hanatanteraka ny fanompoany tamin’ny fomba feno. (2 Timoty 4:5, NW ). Niaina tao amin’ny tokantrano iray tsy nisy afa-tsy ny reniny nitaiza azy sy ny zandriny efatra izy. Raha mbola zatovo izy, dia nanampy tamin’ny famelomana ny fianakaviany tamin’ny fifohazana tamin’ny telo maraina mba hanatitra gazety tany an-tranon’olona. Naniry hanao bebe kokoa teo amin’ny firesahana momba an’i Jehovah tamin’ny hafa i Hirohisa, hany ka nangataka ny hanao ny asan’ny mpisava lalana, araka ny fiantsoan’ny Vavolombelon’i Jehovah ny fanompoana manontolo andro ataony. Na dia tanora aza izy, dia faly nanampy ny hafa hiaraka aminy hanao izay rehetra azon’izy ireo atao mba hiderana an’i Jehovah.

Tafiditra amin’ny fanaovana ny faran’izay mety ho vitantsika mba hanampiana ny hafa koa ny fiezahana mba hahita vokatra tsara eo amin’ny fanompoantsika. Nampirisika ny mpianany toy izao i Jesosy indray mandeha: “Raha fantatrareo izany, dia sambatra hianareo, raha manao izany.” (Jaona 13:17). I Naomi dia ohatra tsara dia tsara raha ny amin’ny fampiharana ireo fanoloran-kevitra omen’ny fandaminan’i Jehovah mba hanatsarana ny fanompoantsika. Sarotra be taminy ny niresaka tamin’olon-tsy fantatra teo amin’ny isan-trano, ary matetika dia tsy nahita zavatra holazaina izy rehefa nitsangana teo am-baravaran’ny olona. Nisy loholona nampirisika azy hampihatra ireo fanoloran-kevitra hita ao amin’ny boky Ny Fomba Fanjohian-kevitra avy Amin’ny Soratra Masina, eo amin’ny fizarana hoe “Fampidiran-dresaka Fampiasa eo Amin’ny Asa Fitoriana”.a Nianarany tsianjery ireo fampidiran-dresaka eo ambanin’ny lohateny hoe “Fianakaviana /Ankizy” ary nanaovany famerenana imbetsaka. Ho vokatr’izany, dia afaka nifampiresaka tamin’ny vehivavy mpikarakara tokantrano iray teo amin’ny 30 taona teo ho eo izy. Na dia talohan’ny nahafahan’i Naomi niverina hitsidika azy aza, dia efa tonga tany amin’ny Efitrano Fanjakana io ramatoa io. Nalamina ny hitarihana fampianarana Baiboly taminy. Izao io ramatoa io sy ny vadiny dia Kristiana vita batisa, ary faly manana fiainam-pianakaviana sambatra miaraka amin’ireo zanany.

Ny fanaovana izay rehetra azontsika atao mba hanehoana fiheverana manokana ny hafa

Azontsika atao koa ny manahaka ny apostoly Paoly, izay nanao hoe: “Izany rehetra izany dia ataoko noho ny filazantsara mba ho tonga mpiombona aminy aho.” — 1 Korintiana 9:22, 23.

Nanome taratr’io fihetsika io i Hatsumi. Teo am-panaovany ny asa fanompoana, dia nisy vehivavy iray niteny tamim-panajana tamin’ny interphone (karazana telefaonina iresahan’ny tompon-trano avy ao an-tranony amin’ny olona iray eo am-baravarany) fa sahirana loatra izy ka tsy afaka ny hiresaka taminy. Feno fahalemem-panahy ny feon’ilay tompon-trano, hany ka nanohy nitsidika azy i Hatsumi. Tsy namaly afa-tsy tamin’ny alalan’ny interphone ilay tompon-trano fa tsy nivoaka hahita an’i Hatsumi mihitsy. Naharitra roa taona sy tapany izany.

Indray andro dia novan’i Hatsumi ny fotoana nanaovany ilay fitsidihana, ka nandeha tany tamin’ny tolakandro izy. Tsy nisy olona namaly azy. Rehefa handeha anefa izy, dia nisy feo fantany tsara avy tao an-damosina nanontany azy hoe: “Iza moa ianao?” Vao tonga avy nivoaka ilay ramatoa. Rehefa nahare ny anaran’i Hatsumi izy, dia namaly avy hatrany hoe: “Hay ianao ilay tonga mitsidika ahy. Misaotra indrindra noho ny fiahianao ny amiko foana.” Satria nanajanona ny fianarany ny Baiboly niaraka tamin’ny Vavolombelon’i Jehovah tany amin’ny toerana hafa iray izy, dia menatra loatra ny hanokatra ny varavarany ho an’i Hatsumi. Natomboka indray ny fianarana Baiboly taminy, ary mandroso tsara izao io ramatoa io. Moa ve isika miahy toy izany ny amin’ireo izay hitantsika eo amin’ny fanompoana isan-trano?

Ataovy izay rehetra azon’ny tenanao atao

I Jehovah dia mankasitraka ny ezaka ataontsika mba hanompoana azy araka izay rehetra mety ho vitantsika. Toy ny ray iray izay hatonin’ny zanany mitondra fanomezana ho azy izy. Arakaraka ny fandehan’ireo taona, dia mety hiova ilay fanomezana, miankina amin’ny taona sy ny fahafahan’ilay zanany. Tsy misy hafa amin’ilay ray izay faly mahazo izay fanomezana amim-pahatsorana rehetra ataon’ny zanany, toy izany koa, i Jehovah dia vonona ny handray ny fanompoana ataontsika amin’ny fontsika rehetra mifanaraka amin’ny fitomboantsika ara-panahy.

Mazava ho azy fa tsy misy ilana ny hampitahana izay rehetra azontsika atao amin’ny an’ny hafa. Araka ny lazain’i Paoly, isika dia hanana hafaliana ny amin’ny tenantsika, “fa tsy ny amin’ny olon-kafa”. (Galatiana 6:4). Enga anie isika ka hanohy hanaraka ity fananaran’ny apostoly Petera ity: “Ataovy izay rehetra azonareo atao mba ho hitany ho tsy manan-tsiny amam-pondro ary ao anatin’ny fiadanana ianareo amin’ny farany.” — 2 Petera 3:14, NW.

[Fanamarihana ambany pejy]

[Sary, pejy 29]

Moa ve ianao manao ny faran’izay mety ho vitanao mba hampiharana ireo fanoloran-kevitra omena momba ny asa fanompoana?