Atreho ny Fivoriamben’ny Distrika “Tahotra Araka An’Andriamanitra”!
Efa nanao fandaharana ve ianao mba hanatrehana ny Fivoriamben’ny Distrika “Tahotra Araka an’Andriamanitra” alamin’ny Vavolombelon’i Jehovah amin’itỳ taona 1994 itỳ? Azo antoka fa handray soa ianao amin’ny fahatongavana mandritra ireo telo andro rehetra! Koa satria misy fivoriambe 165 mahery halamina any Etazonia fotsiny, dia azo inoana fa hisy fivoriambe hatao any akaikin’ny misy anao.
Misy tahotra sasany afaka mampihena herim-po sy mandrava fanantenana; kanefa dia hamaritra ny atao hoe tahotra araka an’Andriamanitra sady hilazalaza ny soa maro entiny ny lahateny fototra hatao ny zoma maraina. Eny tokoa, fa hanasongadina ireny soa ireny ny fandaharan’ilay fivoriambe manontolo.
Handre ny fomba ahafahan’ny tahotra araka an’Andriamanitra manatanjaka ny fanambadiana sy ny fiainam-pianakaviana ianao ny zoma tolakandro, ary koa ny fomba ahafahan’izy io manampy ireo tanora hitana mafy ny tsy fivadihany eo anatrehan’Andriamanitra. Hifarana amin’ny lahateny mampihetsi-po hoe “Fampiononana ho An’ireo Nidonam-pahoriana” ny fandaharana amin’ny tolakandro. Hankasitrahanao ny fanazavana azo ampiharina, homena mandritra io lahateny io mba hanampiana ireo namoy olon-tiana tamin’ny fahafatesana.
Hampiseho ny fomba ahafahan’ny tahotra araka an’Andriamanitra manatanjaka ny fifikirantsika amin’ny fitarihan’i Jehovah mikasika ny kongregasiona sy ny fanompoantsika, ny fandaharana amin’ny asabotsy. Amin’ilay lahateny hoe “Vakio Isan’andro ny Tenin’Andriamanitra, ny Baiboly Masina”, dia hahazo tolo-kevitra azo ampiharina ireo mpanatrika, ny amin’ny famakiana sy fianarana ny Baiboly. Hifarana amin’ny lahateny manana loha hevitra manaitra ny fahalianana hoe “Akaiky ny Andron’i Jehovah Mahatahotra” ny fandaharana amin’ny asabotsy.
Lafiny hiavaka amin’ny fandaharana ny alahady ny lahateny hoe “Hisy Fitsanganan’ny Marina”. Amin’ny lahateny manaraka hoe “Voatsimbina Nandritra ny Fahoriana Lehibe”, dia hisy fanazavana homena momba ny fampanantenan’i Jesosy mahatalanjona mikasika ireo izay tsy ho faty mihitsy mandrakizay. — Jaona 11:26.
Hifarana amin’ny fampisehoana tantara mampieritreritra haharitra 40 minitra izay mitondra ny lohateny hoe Ireo Safidy Atrehinao, ny fandaharana amin’ny alahady maraina. Hampahatsiahivina ny tamin’ny andron’i Josoa ny mpanatrika ary hahita ny fampisehoana an-tsehatra ny fahatapahan-keviny hentitra hanompo an’i Jehovah. Hatao fampisehoana koa ilay fitsapana tamin’ny alalan’ny afo tamin’ny andron’i Elia, ary hisy lesona hotsoahana avy amin’ireo fisehoan-javatra roa ireo, izay hanampy ireo mpanatrika haneho tahotra araka an’Andriamanitra amin’izao andro izao. Amin’ny tolakandro, dia ho lafin-javatra hisongadina amin’ilay fivoriambe ilay lahateny ampahibemaso hoe: “Ny Antony Atahorana An’ilay Andriamanitra Marina Ankehitriny”.
Manaova fandaharana dieny ankehitriny mba hanatrehana ilay fivoriambe. Mba hahitanao ny toerana hanaovana azy io akaiky anao indrindra, dia mifandraisa amin’ny Vavolombelon’i Jehovah eo amin’ny misy anao na manorata any amin’ny Fikambanan’ny Mpianatra ny Baiboly eto Madagasikara, B.P. 511, 101 Antananarivo. Indreto ny toerana hanaovana ilay fivoriambe eto Madagasikara: Antananarivo, Antsirabe, Antsiranana, Fianarantsoa, sy Toamasina.
[Sary nahazoan-dalana, pejy 32]
T. Rosenthal/SUPERSTOCK