Fiangonana Misaratsaraka — Ho Afaka ny Haharitra ve Izy Io?
“IZAY rehetra mihambo ho mino ny fahamarinana mahavonjy ny amin’i Kristy dia anisan’ny Fiangonana hita maso. Ny fisaratsarahana eo amin’ny Tontolon’ireo Fivavahana Lazaina fa Kristiana — eo amin’ny [Fiangonana Ortodoksa] Tatsinanana sy Tandrefana, ary eo amin’i Roma sy ireo fiangonan’ny Réforme [Fanavaozana] — dia fisaratsarahana ao anatin’ny Fiangonana iray.” (Christians in Communion). Izany no fiheveran’ny mpanoratra iray ny amin’ny Kristianisma — toy ny fianakaviam-pivavahana miparitaka hatraiza hatraiza, ka izy rehetra dia mihambo ho manana karazam-pinoana an’i Jesosy Kristy.
Kanefa, dia fianakaviana misaratsaraka izy io, manana zavatra inoana sy fari-pitsipi-pitondran-tena mifanohitra. “Ny Kristianisma amin’izao andro izao (...) dia manana fari-pitsipika takina amin’izay anisan’ny fiangonana, ambany kokoa noho ireo [fari-pitsipika] hidirana ao anatin’ny aotobisy”, hoy ny mpandinika iray. Ahoana àry no tokony hamantarantsika ny toetoetrany ara-panahy? Nanatsoaka hevitra toy izao ilay eveka katolika atao hoe Basil Butler: “Tena marary tokoa ny Kristianisma misaratsaraka iray.” (The Church and Unity). Ahoana no nanombohan’ilay aretina? Misy fanantenana hahazoana fahasalamana indray ve?
“Ilay lehilahin’ota”
Nampitandrina ny apostoly Paoly fa hiseho ny tsy firaisan-tsaina. Ho an’ireo Kristiana tany Tesalonika izay nihevitra fa antomotra ny fanatrehan’i Kristy, dia nanoratra izy hoe: “Aza mety hofitahin’olona akory hianareo; fa tsy ho avy izany [ny andron’i Jehovah], raha tsy efa tonga aloha ny fihemorana, ka hiseho ilay lehilahin’ota, dia ilay zanaky ny fahaverezana”. — 2 Tesaloniana 2:3.
Io “lehilahin’ota” io dia nampiditra fivadiham-pinoana sy fikomiana tao anatin’ny kongregasiona kristiana. Iza moa izy io? Tsy olon-tokana akory, fa ny kilasin’ny klerjy ao amin’ny Tontolon’ireo Fivavahana Lazaina fa Kristiana kosa. Io kilasy io dia nanandratra ny tenany teo ambonin’ny kongregasiona nivadi-pinoana, fotoana fohy ihany taorian’ny nahafatesan’ireo apostolin’i Jesosy, ary tamin’ny farany dia nanjary nampianatra filozofian’ny mpanompo sampy, toy ny Trinite sy ny tsy fahafatesan’ny fanahy (âme). (Asan’ny Apostoly 20:29, 30; 2 Petera 2:1-3). Tahaka ny virosy mahafaty iray, izy io dia namindra aretina tamin’ny kongregasiona kristiana anarana tamin’ny hevitra avy amin’ny demonia izay nitarika tamin’ny fomba tsy azo ihodivirana ho amin’ny tsy firaisan-tsaina. — Galatiana 5:7-10.
Ilay fifindran’ny aretina dia efa nanomboka sahady tamin’ny andron’ny apostoly Paoly. Hoy ny nosoratany: “Fa miasa sahady ny zava-miafina, dia ny tsi-fankatoavan-dalàna, kanefa mandra-panaisotra ilay misakana ankehitriny ihany.” (2 Tesaloniana 2:7). Niasa toy ny fisakanana ny poizin’ny fivadiham-pinoana ireo apostoly. Rehefa nesorina ny fitaomany nampiray, dia niitatra tahaka ny gangrena ilay fivadiham-pinoana tsy voasakana. — 1 Timoty 4:1-3; 2 Timoty 2:16-18, fanamarihana ambany pejy.
Ny asan’io “lehilahin’ota” io dia mitohy tsy mety mihena. Tao amin’ny tatitra iray vao haingana momba ny “fiangonana iray ao anatin’ny fijalijaliana ny amin’ny raharaha mikasika ny lahy sy ny vavy sy ara-teolojia”, dia voalaza fa nitaraina toy izao ny arsidiakra iray ao amin’ny Eglizy Anglikanina: “Lavina ireo fanoloran-kevitra angatahana ny klerjy mba tsy hanaram-po amin’ny firaisana ivelan’ny fanambadiana. Misy lehilahy mpandry amin’ny lehilahy hamasinina ho pretra. Manao ny ratsy ho tsara sy ny tsara ho ratsy izy ireo.” — The Sunday Times Magazine, Londres, 22 Novambra 1992.
Vary sy tsimparifary
I Jesosy Kristy mihitsy no nampianatra fa ny Kristianisma marina dia hanjavona tsy ho hita mandritra ny fotoana voafetra. Nilaza izy fa ny fanorenana ny kongregasiona kristiana dia tahaka ny lehilahy iray namafy voa tsara teny an-tanimbariny. Kanefa, hoy i Jesosy, “dia avy ny fahavalony ka namafy voan-tsimparifary teny amin’ny vary”. Rehefa nanontany ireo mpanompony raha tokony hanandrana hanongotra ireo tsimparifary izy ireo, dia hoy ilay tompon’ny tanimbary: “Tsia, fandrao, raha manongotra ny tsimparifary hianareo, dia hongotanareo miaraka aminy koa ny vary.” Hafiriana no hitohizan’izany fiarahan’ny vary sy ny tsimparifary izany? Hoy ilay tompon’ny tanimbary: “Aoka ihany hiara-maniry izy roroa ambara-pihavin’ny fararano [“fijinjana”, NW ]”. — Matio 13:25, 29, 30.
Ambara-piavin’ny “fijinjana”, na fotoam-panavahana mandritra ny andro faran’ny “fandehan-javatra”, dia naniry teo anilan’ny Kristiana marina ireo Kristiana sandoka. (Matio 28:20, NW ). Nampiasa ireo mpivadi-pinoana i Satana Devoly mba hamoronana kongregasiona kristiana sandoka mikororosy ara-pitondran-tena sy misaratsaraka. (Matio 13:36-39). Ny fisandohan’izy ireo ho Kristianisma marina dia niteraka Kristianisma sandoka nahamenatra. (2 Korintiana 11:3, 13-15; Kolosiana 2:8). Noho ny fizarazaran’ny fiangonana nandritra ireo taonjato, dia nihasarotra ny hamantarana ireo Kristiana marina.
Fisaratsarahana vao haingana
Amin’ny andro maoderina kokoa, hoy ny The Testing of the Churches — 1932-1982, dia “miseho ireo fisaratsarahana [v]ao haingana, indrindra amin’ny fihetsiketsehana mahay mamabo olona, amin’ny fanantitranterana ny amin’ny finoana sy ny fanandraman-javatra hitan’ny tena manokana”. Mahaliana fa ny sasany dia mahita ireo fihetsiketsehana teraka indray sy mahay mamabo olona ho famantarana ny fahazoana indray fahasalamana ara-panahy fa tsy fisaratsarahana vao haingana. Nahita fifohazana indray toy izany i Irlande Avaratra, ohatra, tamin’ireo taona 1850. Nisy fanantenana lehibe nipoitra. Ny tatitra iray dia niresaka ny amin’ny “firaisan-tsain’ny mpirahalahy (...) teo amin’ireo mpitondra fivavahana presbyteriana sy metodista ary tsy miankina” ka nilaza fa “ny andro tsirairay dia nitondra tatitra vaovao ny amin’ny olona tsindrian-javatra, ny amin’ny fahatorantoranana, fahitana, nofy sy fahagagana”. — Religious Revivals.
Maro no mihevitra ireny fisehoana mampihetsi-po lalina ireny ho toy ny porofon’ny fiasan’ny fanahin’Andriamanitra mba hamohazana indray ny fiangonany. “Ny fiangonan’Andriamanitra”, hoy ny mpandinika iray, “dia mifoha indray amin’ny heviny ambony indrindra any amin’ireny distrika ireny.” Kanefa, na dia nambara ampahibemaso ho toy ny “vanim-potoana be voninahitra sady mbola tsy nisy toa azy teo amin’ny tantara ara-pivavahan’i Ulster”, aza io fifohazana indray manokana io, izy io mbamin’ny fifohazana hafa toa azy dia tsy niteraka firaisan-tsaina ara-pivavahana teo amin’ireo izay manizingizina fahaterahana indray ara-panahy.
Hanome porofo ny olona toy izany fa tafaray amin’ny raharaha fototra tena lehibe indrindra izy ireo. Kanefa dia izany ihany no fanaporofoan-kevitra ampiasain’ny sisa amin’ny Tontolon’ireo Fivavahana Lazaina fa Kristiana, izay manala tsiny fa “izay mampiray ireo Kristiana dia efa zava-dehibe lavitra noho ireo raharaha mbola mampisaraka azy ireo”. (The Church and Unity). Manizingizina toy izao ny Tontolon’ireo Fivavahana Lazaina fa Kristiana: “Ny firaisan-tsaina fototra misy eo amintsika samy isika sy amin’ireo Kristiana namantsika rehetra dia miorim-paka eo amin’ny batisantsika ao amin’i Kristy.” (Christians in Communion). Ny filazana anefa fa, noho ny finoana an’i Jesosy iombonana, dia tsy zava-dehibe ireo fisaratsarahana, dia toy ny milaza fa tsy atahorana ny homamiadana raha mbola matanjaka ny fonao.
Ny zava-misy dia izao: Ireo fihetsiketsehana ara-pivavahana maoderina toy ireny dia mampitombo ny fisafotofotoana ary miteraka fanjakan’i Baroa ara-panahy rehefa manangona ireo mpanaraka ho amin’ny tenany ireo mpampianatra mpandresy lahatra. Ohatra vao haingana ny amin’ny mpitarika ara-panahy izay namitaka olona an’arivony maro i Jim Jones sy i David Koresh. (Matio 15:14). Mpitarika ao amin’ny Ku Klux Klan ny mpitondra fivavahana batista iray. Mampifandray ny fampielezan-keviny ho amin’ny fahefana tampon’ny fotsy hoditra amin’ny fifohazana indray ara-panahy izy ary milaza fa ireo izay mandray anjara amin’izy io dia “homena ny herin’ny fitarihan’Andriamanitra, homena ny herim-pon’Ilay maty teo Kalvaria [Jesosy Kristy]”.
Ahoana ny amin’ireo heverina ho fahagagana mbamin’ireo asa lehibe ary ireo famantarana atao amin’ny anaran’i Jesosy? Tadidio ny fampitandremana mahery nataon’i Jesosy Kristy fa tsy ireo izay milaza fotsiny hoe “Tompoko, Tompoko” no mahazo ny fankasitrahany fa ‘ireo izay manao ny sitrapon’ny Rainy’ kosa. Maro amin’izao andro izao no tsy mahafantatra na dia ny anaran’ny Rainy hoe Jehovah aza. I Jesosy dia nampitandrina an’ireo izay ‘hamoaka demonia amin’ny anarany sy hanao asa lehibe amin’ny anarany’ ary anefa ho “mpanao meloka”. — Matio 7:21-23.
“Mialà aminy hianareo, ry oloko”
Inona no fanantenam-pahasitranana ho an’ny Tontolon’ireo Fivavahana Lazaina fa Kristiana marary? Tena kely. Tokony hanaraka ny torohevitra nomen’i Butler, ilay eveka katolika, àry ve isika, dia ny hoe “hiaraka [amin’ny eglizy] tsy misy eritreritra be intsony sy ny hanome avy ao anatiny ny fanampiantsika ho amin’ny ‘fanadiovana’ azy hatrany”? Tsia! Tsy haharitra ny Tontolon’ireo Fivavahana Lazaina fa Kristiana misaratsaraka sy mampisaratsaraka. (Marka 3:24, 25). Anisan’ny empira maneran-tanin’ny fivavahan-diso antsoina hoe Babylona Lehibe izy io. (Apokalypsy 18:2, 3). Io fandehan-javatra ara-pivavahana mivesatra trosan-dra io dia miatrika fanafoanana efa antomotra eo an-tanan’Andriamanitra.
Tsy manolo-kevitra ny Baiboly hoe ireo Kristiana marina dia hitoetra ao anatin’io fandaminana ara-pivavahana mikororosy ara-pitondran-tena io ary hanandrana ny hanavao azy avy ao anatiny. Mampirisika kosa ny Baiboly hoe: “Mialà aminy hianareo, ry oloko, mba tsy hiombonanareo ota aminy, ary mba tsy hisy hahazo anareo ny loza manjo azy. Fa ny fahotany efa nitehika tamin’ny lanitra, ary Andriamanitra efa nahatsiaro ny ratsy nataony.” — Apokalypsy 18:4, 5.
“Mialà” ho aiza? Tadidio fa nampanantena i Jesosy fa amin’ny fotoan’ny fijinjana, dia hangonina miaraka indray ireo Kristiana marina ho amin’ny firaisan-tsaina maneran-tany. Nilaza mialoha ny amin’ny fanangonana indray toy izany koa i Mika mpaminany tamin’izao teny izao: “Hakambako toy ny ondry any amin’ny vala izy”. (Mika 2:12). Nitranga ve izany?
Eny, ireo Kristiana marina dia angonina ankehitriny ao anatin’ny fianakavian’ny mpirahalahy tafaray maneran-tany. Iza moa izy ireo? Izy ireo dia ny kongregasiona kristian’ny Vavolombelon’i Jehovah, izay manambara amim-piraisan-tsaina ny vaovao tsara momba ny Fanjakan’Andriamanitra any amin’ny tany 231. Nanda ny fampianarana mampisaratsaraka an’ny Tontolon’ireo Fivavahana Lazaina fa Kristiana izy ireo ary mitady ny hivavaka amin’Andriamanitra araka ny fahamarinana ao amin’ny Teniny. — Jaona 8:31, 32; 17:17.
Asaina amim-pitiavana ianao mba hiresaka amin’izy ireo. Raha tianao ny hahafantatra bebe kokoa mikasika ny Vavolombelon’i Jehovah, dia mifandraisa amin’izy ireo, raha sitrakao, any amin’ny misy anao na amin’ny alalan’ny iray amin’ireo adiresy eo amin’ny pejy faha-2 amin’itỳ gazety itỳ.
[Sary, pejy 7]
“Andriamanitra efa nahatsiaro ny ratsy nataony”