Ny Fijalian’olombelona — Hifarana ve Izy Io Indray Andro Any?
SARY mahatsiravina aorian’ny ipoahan’ny bomba eo amin’ny tsena iray feno olona ao Sarajevo; vonoana olona sy herisetra tsy amin’ny antony atsy Rwanda; zaza mosarena miantsoantso hanina atsy Somalia; fianakaviana ankona mamantatra ny nafoiny aorian’ny horohoron-tany iray any Los Angeles; olona iharan-doza tsy afa-manoatra noho ny tondra-drano any Bangladesh. Manafika antsika isan’andro ao amin’ny televiziona sy ny gazety ny sary mampiseho fijalian’olombelona toy izany.
Ny vokatra iray mampalahelon’ny fijalian’olombelona dia noho izy io mahatonga ny olona sasany tsy hino an’Andriamanitra intsony. “Ny fisian’ny ratsy dia ny sakana lehibe indrindra ho an’ny finoana mandrakariva”, hoy ny fanambarana navoakan’ny antokom-pivavahana jiosy iray any Etazonia. Manisy firesahana momba ireo maty tany amin’ireo toby fitanana nazia toa an’i Auschwitz sy ireo matin’ny bomba toy ilay nipoaka tany Hiroshima, ireo mpanoratra ireo. “Manelingelina ny feon’ny fieritreretan’ny mpivavaka sady mahazendana ny saina ilay fanontaniana ny amin’ny fetezan’ny Andriamanitra marina sady mahery iray hamela ny fanafoanana ain’olon-tsy manan-tsiny maro be aoka izany, hisy”, hoy izy ireo.
Mampalahelo fa mety hahatonga ny fihetseham-pon’ny olona tsy hiraika intsony ireo tatitra momba ny loza tsy mety tapitra. Raha mbola tsy voakasika koa ny namany sy ny havany, dia olona maro no zara raha mihontsina noho ny fijalian’ny hafa.
Kanefa, ny fahafahantsika mahatsapa fangoraham-po, fara faharatsiny amin’ireo olona tian’ny tenantsika, dia tokony hilaza zavatra amintsika momba ilay Mpanao antsika. Milaza ny Baiboly fa ny olona dia noforonina “tahaka ny endrik’Andriamanitra” sy “araka ny tarehi[ny]”. (Genesisy 1:26, 27). Izany akory tsy midika hoe mitovy endrika amin’Andriamanitra ny olombelona. Tsia, satria i Jesosy Kristy dia nanazava fa “Andriamanitra dia Fanahy [“Esprit”, NW ]” ary “ny [fanahy (esprit), NW ] tsy mba manana nofo sy taolana”. (Jaona 4:24; Lioka 24:39). Ny hoe natao araka ny tarehin’Andriamanitra isika dia manisy firesahana momba ny fahafahantsika haneho toetra tsara araka an’Andriamanitra. Noho izany, satria mahatsapa fangoraham-po amin’ireo izay mijaly ny olombelona tsotra, dia tsy maintsy manatsoaka hevitra isika fa ilay Mpamorona ny olombelona, i Jehovah Andriamanitra, dia mamindra fo sady mangoraka lalina ny zavaboariny olombelona mijaly. — Ampitahao amin’ny Lioka 11:13.
Ny fomba iray nampisehoan’Andriamanitra ny fangoraham-pony dia tamin’ny fanomezana ho an’ny taranak’olombelona fanazavana an-tsoratra momba ny antony isian’ny fijaliana. Izany dia nataony tao amin’ny Teniny, ny Baiboly. Asehon’ny Baiboly mazava tsara fa Andriamanitra dia namorona ny olona mba hankafy ny fiainana, fa tsy mba hijaly akory. (Genesisy 2:7-9). Aharihariny koa fa ireo olombelona voalohany no nitondra fijaliana ho an’ny tenany ihany tamin’ny fandavana ny fanapahana marin’Andriamanitra. — Deoteronomia 32:4, 5; Romana 5:12.
Na dia teo aza izany, dia mbola mahatsapa fangoraham-po amin’ny fianakavian’olombelona mijaly ihany Andriamanitra. Izany dia miseho mazava tsara amin’ny fampanantenany hamarana ny fijalian’olombelona. “Indro, ny tabernakelin’Andriamanitra dia eo amin’ny olona, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 21:3, 4; jereo koa ny Isaia 25:8; 65:17-25; Romana 8:19-21.
Ireo fampanantenana mahatalanjona ireo dia manaporofo fa Andriamanitra dia mahalala tsara ny fijalian’olombelona ary koa fa tapa-kevitra ny hamarana azy io izy. Inona marina anefa no tena nahatonga ny fijalian’olombelona tany am-boalohany, ary nahoana Andriamanitra no namela azy io hitohy mandrak’ankehitriny?
[Sary nahazoan-dalana, pejy 2]
Fonony sy pejy 32: Alexandra Boulat/Sipa Press
[Sary nahazoan-dalana, pejy 3]
Kevin Frayer/Sipa Press