Mitantara Ireo Mpitory Ilay Fanjakana
Ireo Tanora dia Manambara ny Vaovao Tsara Atsy Afrika
TSY ela taorian’ny nitsanganan’i Jesosy tamin’ny maty, dia nitsidika an’i Jerosalema ny lehilahy afrikana iray. Tsy manome ny anarany ny Baiboly. Fantatra fotsiny hoe “lehilahy (...) tandapan’i Kandasy, mpanjakavavin’ny Etiopiana, sady mpitahiry ny hareny rehetra” izy io. Nahoana izy no resahina ao amin’ny Baiboly? Satria ny anjely iray dia nitarika an’i Filipo evanjelisitra kristiana hanambara taminy “[ny vaovao tsara momba, NW ] an’i Jesosy”. Io lehilahy etiopiana io no Afrikana voalohany voarakitra an-tsoratra ho tonga mpikambana tamin’ny kongregasiona kristiana. — Asan’ny Apostoly 8:26-39.
Amin’izao andro izao, dia misy Vavolombelon’i Jehovah ana hetsiny maro atsy Afrika. Manararaotra ny fahafahana rehetra izy ireo mba hizarana amin’ny hafa ny vaovao tsara momba an’i Jesosy. Ny fitantarana manaraka dia mampiseho fa na dia ny tanora aza atsy Afrika dia mandray anjara amin’izany.
◻ I Sandy sy i Priya, atsy Nairobi, Kenya, dia ankizivavy roa 11 taona mpifanila trano. Mahafinaritra azy roa vavy ny miara-milalao sy mifampindrana boky misy tantara. Nanomboka nianatra ny Baiboly tamin’ny Vavolombelon’i Jehovah ny ray aman-drenin’i Priya. Ankehitriny i Priya dia nanana boky vaovao voafantina nanampy ny fitambaram-bokiny, anisan’izany ny boky iray niavaka, izay nanjary ny tiany indrindra, Écoutez le Grand Enseignant, navoakan’ny Watchtower Bible and Tract Society. Nomeny hovakin’i Sandy namany ny bokiny Grand Enseignant, ary nanomboka nianatra azy io tsy tapaka izy mirahavavy.
I Una, renin’i Sandy anefa dia niangona tany amin’ny Eglizy Anglikana, ka tsy tiany hamaky ireo boky avy amin’ny Vavolombelon’i Jehovah ny zanany vavy. Na dia teo aza ny fanoheran’ilay reny, dia nitohy ny fianarana. Indray andro i Sandy dia niangavy ny reniny mba hihaino indray mandeha monja ny fiaraha-midinika nataon’izy ireo. Ny toko novakin’ireo ankizivavy tamin’io andro io dia nitondra ny lohateny hoe “Lehilahy Roa Nankalaza ny Andro Nahaterahana”. Nihaino i Una ary tena tohina. Nanatona haingana ny renin’i Priya izy mba hanao fanontaniana maro taminy momba ny Baiboly.
Nanao fandaminana ny renin’i Pryia mba hisian’ny Vavolombelona iray hiara-mianatra ny Baiboly amin’i Una. Tsy ela ny tenan’i Una dia nizara tamin’i Dolly mpiara-miasa aminy izay nianarany. Tao anatin’izany fotoana izany dia nanohy nandroso i Pryia, ilay zazavavy 11 taona ary nanapa-kevitra ny hanamarika ny fanoloran-tenany ho an’i Jehovah Andriamanitra amin’ny alalan’ny batisa ao anaty rano amin’ny fivoriamben’ny distrikan’ny Vavolombelon’i Jehovah. Tamin’io fivoriambe io ihany, ary naharavoravo indrindra an’i Priya izany, dia natao batisa koa i Una sy i Dolly!
◻ Misy tany afrikana sasantsasany izay tsy maha-voasoratra ara-dalàna ny asan’ny Vavolombelon’i Jehovah. Ao amin’ny iray amin’ny tany toy izany, dia misy fileferana amin’ny ankapobeny amin’ny asa ara-pivavahana sy ny zavatra ara-pivavahana inoan’ny Vavolombelona. Tao amin’ny sekoly iray tao amin’izany tany izany, dia navela tsy hanatrika ny fotoam-pivavahana tao an-dakilasy ny ankizilahy iray fito taona sy ny rahalahiny enin-taona — samy zanaka Vavolombelona.
Indray andro, dia nitaky tamin’izy roa lahy ny mpampianatra vaovao iray mba hiarahany mivavaka amin’ireo ankizy hafa. Nanda ilay zokiny ary voakapok’ilay mpampianatra. Ny zandriny lahy enin-taona atao hoe Shadrack, dia nanizingizina mba horaisin’ny tale tao amin’ny biraony. Nanontany azy ny antony tsy netezany hiaraka tamin’ny hafa ilay tale sy ilay mpampianatra vaovao. Nanontany azy izy ireo raha toa ka natahotra izy sao ho voakapoky ny ray aman-dreniny. Namaly tamin’ny fiteny arabo mazava tsara toy izao izy: “Tsia, ilay Andriamanitra ivavahako dia tsy Andriamanitry ny fikorontanana fa Andriamanitry ny filaminana. Tsy afaka ny ho Vavolombelon’i Jehovah aho any an-trano ary hanaraka fivavahana hafa atỳ an-tsekoly!” Vokatr’izany, dia nomena fahafahana tsy hanatrika ny fotoam-pivavahana izy.
Taorian’ny batisany, ilay lehilahy etiopiana voalaza ao amin’ny bokin’ny Asan’ny Apostoly dia “nandeha tamin’ny nalehany (...) sady nifaly”. (Asan’ny Apostoly 8:39). Tahaka izany koa amin’izao andro izao, ireo mpitory ilay Fanjakana ao amin’io kontinenta midadasik’i Afrika io dia mifaly amin’ny tombontsoa ananany ‘hanambara ny vaovao tsara momba an’i Jesosy’. — Asan’ny Apostoly 8:35, NW.