Tadidinao Ve?
Nankafy ny famakiana ireo nomerao vao haingana amin’ny Ny Tilikambo Fiambenana ve ianao? Raha izany no izy, dia hahaliana anao ny hahatsiaro ireto manaraka ireto:
▫ Mety ho hita ve ny fahamarinana ara-pivavahana? Hoy i Jesosy Kristy: “Ho fantatrareo ny marina, ary ny marina hahafaka anareo tsy ho andevo.” (Jaona 8:32). I Jesosy dia tsy vitan’ny hoe nisarika ny saina ho amin’ny hoe mety ho hita ny fahamarinana, fa nampiseho koa izy fa takina ny fahitana azy io eo amin’ny fanompoam-pivavahantsika amin’Andriamanitra. Hoy izy tamin’ny vehivavy samaritana iray: “Ny tena mpivavaka hivavaka amin’ny Ray amin’ny fanahy sy ny fahamarinana”. (Jaona 4:23). — 15/4, pejy faha-5.
▫ Iza moa i Robert Estienne, ary ahoana no namelany marika tamin’ny asany? I Robert Estienne dia mpanao pirinty izay niaina tamin’ny taonjato faha-16. Nanokana ny fiainany ho an’ny famoahana ny Soratra Masina izy ary nikely aina mba hampahafantatra ireo teny ao amin’ny Baiboly araka izay nosoratana tany am-boalohany. Ny rafitra fizarany ny soratra ao amin’ny Baiboly ho andininy misy nomerao no rafitra ampiasaina hatraiza hatraiza amin’izao andro izao. — 15/4, pejy faha-10, 14.
▫ Ahoana no andraisantsika soa avy amin’ny famakiana Baiboly isan’andro? Ny Soratra Masina dia manana heviny fanampiny foana hatrany ho antsika, ary manjary manaitra ny saina kokoa ireo faminaniana mikasika ny andro farany, rehefa hazavain’izay hitantsika sy rentsika ary tsapan’ny tenantsika manokana. Arakaraka ny itomboan’ny fanandraman-javatra hitantsika manokana eo amin’ny fiainana sy iezahantsika mandresy ireo zava-manahirana, no hahatakarantsika amin’ny fomba feno kokoa ny torohevitry ny Baiboly. (Ohabolana 4:18). — 1/5, pejy faha-14.
▫ Ahoana no ahafahana mitadidy andinin-teny ao amin’ny Baiboly? Rehefa mamaky ny Baiboly ianao, dia mariho ireo andinin-teny nofidina izay tianao hotadidina, na adikao eo amin’ny taratasy matevina iray izy ireny ka apetraho eo amin’ny toerana izay hahitanao azy isan’andro. Rehefa miezaka manao tsy an-jery ireo andininy ianao, dia saintsaino izy ireny ary ampiasao. Aza manandrana ny hanao tsy an-jery andininy maro loatra indray mandeha, fa angamba iray na roa monja isan-kerinandro. — 1/5, pejy faha-16, 17.
▫ Fanazavana inona no raketin’ny Filazantsaran’i Lioka, ho fanampin’izay nomen’ireo mpanoratra Filazantsara hafa? Na dia mitovy amin’izay ao amin’ny fitantaran’i Matio aza ny ankamaroan’izay noraketin’i Lioka an-tsoratra, dia tsy mitovy ny 59 isan-jato aminy. I Lioka dia nandrakitra an-tsoratra fahagagana enina mampiavaka ny bokiny ary izy dia nanao tatitra avo roa heny noho io isa io ny amin’ireo fanoharana nataon’i Jesosy, izay tsy notononin’ireo mpanoratra Filazantsara hafa. — 15/5, pejy faha-12.
▫ Tsela-pahazavana momba ny fahamarinana niavaka inona avy no naharihary tamin’ny 1935? Tamin’io taona io ny vahoakan’i Jehovah dia nanjary nahatakatra fa ny olona betsaka voalaza ao amin’ny Apokalypsy 7:9, 14, dia tsy nanondro kilasy faharoa amin’ireo izay ho any an-danitra akory, fa ireo izay manana fanantenana ny ho eto an-tany. (Jaona 10:16). — 15/5, pejy faha-20.
▫ Amin’ny fomba azo ampiharina ahoana avy no azontsika ampiononana ireo nidonam-pahoriana? Mihainoa. Manolora fanomezan-toky indray. Aoka ianao ho vonona hanao zavatra. Manomboha manao zavatra rehefa mifanentana izany. Manorata taratasy na mandefasa carte. Miaraha mivavaka aminy. (Jakoba 5:16). Manohiza manampy azy. — 1/6, pejy faha-13, 14.
▫ Inona no azon’ireo rahalahy sy anabavy ara-panahy atao mba hanampiana ireo izay miaina ao anatin’ny fianakaviana voazarazara ara-pivavahana mba hiaritra? Milazà tsy tapaka teny mampahery sy manorina ary mampionona amin’izy ireo. (1 Tesaloniana 5:14). Izany dia miasa ho toy ny famelombelomana ho an’ny sainy sy ny vatany. Rehefa azo atao sy mifanentana izany, dia ampidiro ao amin’ny asa teokratika sy ara-tsosialy ataonao izy ireo. Ampidiro ao amin’ny vavaka ataonao izy ireo. (Romana 1:9; Efesiana 1:16). — 1/6, pejy faha-29.
▫ Valisoa inona avy no azo amin’ny fanehoana faharetana rehefa manao fanompoana eny amin’ny saha? Ny faharetana dia manampy ny mpitory ilay Fanjakana hiaritra izay mety ho tsy firaikana sy fanoherana. Tsy hiady hevitra amin’ny tompon-trano tezitra ny mpanompo manam-paharetana, fa ho afaka hanome valin-teny amim-pahalemem-panahy na hiala moramora kosa, ka hihazona ny fiadanana sy ny fifaliana amin’izany. (Matio 10:12, 13). Ankoatra izany, dia ho voatarika hanaiky ny hafatra momba ilay Fanjakana ireo olona toy ny ondry. — 15/6, pejy faha-12.
▫ Nahoana no sarobidy aoka izany ny fahalalana ny fahamarinana ao amin’ny Baiboly? Ny fahalalana ny fahamarinana dia manafaka antsika amin’ny lainga, ny fahadisoan-kevitra sy ny finoanoam-poana. Rehefa miaina mifanaraka amin’izy io isika, ny fahamarinana dia manatanjaka antsika hiaritra zava-tsarotra sy manome antsika fanantenana izay mahatonga antsika hahafahatra ao anatin’ny fisedrana. — 1/7, pejy faha-8.
▫ Andraikitra lehibe indrindra inona no noraisin’ilay kongregasiona kristiana voahosotra avy tamin’ny Isiraely ara-nofo? Ilay tombontsoa hanao fanambarana momba ny fahalehibiazan’i Jehovah eo amin’ireo firenena (Isaia 43:21; 1 Petera 2:9). — 1/7, pejy faha-19.
▫ Inona no tiana holazaina amin’ny tenin’ny apostoly Petera hoe ny lehilahy dia tokony ‘hanome voninahitra’ ny vadiny? (1 Petera 3:7, NW ). Ny lehilahy izay manome voninahitra ny vadiny dia tsy mampietry azy na manambany azy. Asehony kosa amin’ny teniny sy ny ataony — na manokana na eo imason’olona — fa mihevitra azy ho sarobidy izy. (Ohabolana 31:10-31). — 15/7, pejy faha-19.
▫ Nahoana no azo lazaina fa fampisehoana fitiavana ny fandroahana mpanao ratsy tsy mibebaka tsy ho ao amin’ny kongregasiona kristiana? Ny fandroahana dia fampisehoana fitiavana an’i Jehovah sy ny lalany. (Salamo 97:10). Izy io dia fampisehoana fitiavana an’ireo manaraka lalana marina, satria manaisotra tsy ho eo anivon’izy ireo, olona iray izay afaka mampihatra fitaomana ratsy eo aminy; izy io koa dia miaro ny fahadiovan’ny kongregasiona. (1 Korintiana 5:1-13). — 15/7, pejy faha-25.
▫ Ahoana no ahafahana mamantatra ny “mpanompo mahatoky sy malina” noresahin’i Jesosy ao amin’ny Matio 24:45-47 (NW ), amin’izao andro izao? Fantatra indrindra izy ireo amin’ny asa ataony amin’ny fanomezana zavatra vita an-tsoratra miorina amin’ny Baiboly sy amin’ny fampianarana sy fitoriana ny “vaovao tsaran’ilay fanjakana”, ary amin’ny fifikirany mafy amin’ny Tenin’Andriamanitra, ny Baiboly. (Matio 24:14, NW; 28:19, 20). — 1/8, pejy faha-16.