Fanaovana Fanomezana — Ampoizina ve Izany?
METY ho fantatrao tsara fa matetika dia didian’ny fanao ny fanaovana fanomezana. Any amin’ny ankamaroan’ny kolontsaina dia misy fotoana anampoizana fanomezana. Mety hatao ho mari-panajana na fanehoam-pitiavana ny fanomezana toy ireny. Maro amin’izy ireny no tsy ampiasain’ilay mpandray mihitsy; ny hafa manampy mba hanomezana fahafaham-po izay tena ilaina ary ankasitrahana lalina.
Any Danemark, rehefa teraka ny zaza iray, ireo namana sy havana dia mitsidika ka mitondra fanomezana izay antenainy fa hahasoa an’ilay zazakely. Any amin’ny tany hafa, ireo namana dia mety hanao fiaraha-mikorana izay anaovana fanomezana toy ireny ho fiandrasana amim-pifaliana an’ilay fahaterahana.
Amin’ny toe-javatra maro dia raharaha isan-taona ireo fotoana anampoizana fanomezana. Na dia tsy fahazarana teo amin’ireo Kristiana tany am-boalohany aza ny fankalazana toy ireny, dia nanjary be mpanaraka izy ireny teo amin’ny ankamaroan’ireo nihambo ho Kristiana sy teo amin’ireo tsy Kristiana koa. Mety hihalefy ny fahazarana manao fanomezana amin’ny fitsingerenan’ny andro nahaterahana any amin’ny kolontsaina hafa, rehefa mihalehibe ny ankizy, kanefa hafa noho izany no didian’ny fanao eo amin’ireo Grika. Any Gresy dia anehoana fiheverana be dia be ny fitsingerenan’ny andro nahaterahana. Manao fanomezana ho an’ny olona iray koa izy ireo amin’ny ‘andron’ny anaran’izy io’. Inona izany? Ny fanao ara-pivavahana dia mampifandray “olo-masina” samy hafa amin’ny andro tsirairay ao anatin’ny taona, ary olona maro no ampitondraina ny anaran’ireo “olo-masina”. Rehefa tonga ny andron’ilay “olo-masina”, dia mahazo fanomezana ireo olona mitondra ilay anarana.
Ho fanampin’ny fankalazana ny fitsingerenan’ny andro nahaterahan’ny zanany, dia manana fety ara-pirenena fantatra hoe Andron’ny Ankizy ny Koreana. Fotoana anaovan’ny fianakaviana fitsangantsanganana amin’izay sady fotoana anaovana fanomezana ho an’ny ankizy na oviana na oviana ny daty nahaterahany. Ireo Koreana dia manana koa Andron’ny Ray Aman-dreny, izay anaovan’ny ankizy fanomezana ho an’ny ray aman-dreniny, sy Andron’ny Mpampianatra, izay anomezan’ny mpianatra voninahitra ny mpampianatra azy sy anaovany fanomezana ho azy ireo. Araka ny fanao koreana, rehefa mahatratra 60 taona ny olona iray, dia misy fiaraha-mikorana lehibe atao. Miaraka ny fianakaviana sy ireo namana amin’ny fanolorana firariana fahelana velona sy fahasambarana, ary misy fanomezana atolotra an’ilay nahatratra io fotoana eo amin’ny fiainana io.
Fotoana hafa izay mety hitakian’ny fanaon’ny besinimaro fanaovana fanomezana koa ny fampakaram-bady. Rehefa mivady ny olon-droa atsy Kenya, dia ampoizina hanolotra fanomezana ho an’ny fianakavian’ilay ampakarina ny fianakavian’ilay mpampakatra. Mitondra fanomezana koa ireo olona nasaina. Raha manaraka izay didian’ny fanao ilay ampakarina sy ilay mpampakatra, dia hipetraka eo amin’ny lampihazo iray izy ireo, raha mbola hampiseho ny fanomezany ireo olona nasaina. Arakaraka ny ampahafantarana ny olona tsirairay, dia atao ny filazana hoe “Ranona dia nitondra fanomezana ho azy mivady”. Tsy ho faly mihitsy ny maro amin’ireo mpanome raha tsy nahazo fankasitrahana toy izany izy ireo.
Eo amin’ireo Libanais, rehefa hanambady ny olona iray, dia manomboka tonga andro maro alohan’ny fampakaram-bady ireo namana sy mpiara-monina, na dia ny olona tsy mahafantatra tsara azy roa aza, ka mitondra fanomezana. Hatramin’ny fahazazany dia ampianarina izy ireo fa andraikitra, toy ny fandoavana trosa, ny fanaovana fanomezana. “Raha tsy manao izany ianao, dia tsy azoazonao ny ainao”, hoy ny lehilahy libanais iray. “Izany no fomba.”
Amin’ireo fotoana rehetra anampoizana fanaovana fanomezana anefa, dia ny Krismasy no loha laharana any amin’ny tany maro. Tsy izany ve no izy any amin’izay misy anao? Vao tsy ela izay, tamin’ny 1990, dia notombanana fa mandany mihoatra ny $40 000 tapitrisa (184 tapitrisa tapitrisa FMG eo ho eo) amin’ny fanomezana amin’ny Krismasy ny Amerikana isan-taona. Amin-kafanam-po lehibe, dia ankalazain’ny Bodista sy ny Shintoista any Japon koa io fety io, ary hita any Eoropa sy Amerika Atsimo ary any amin’ny tapany atsy Afrika ny endriny maro samihafa amin’io fankalazana io.
Fe-potoana izay anampoizan’ny olona ny tenany ho sambatra ny Krismasy, kanefa maro no tsy sambatra. Ary tsy vitsy no mahita fa ny fiantsenana amim-pahataitairana hividy fanomezana sy ny tebiteby amin’ny fandoavana faktiora voaray dia manamaloka izay mety ho fotoam-pahafinaretana hitany.
Kanefa, milaza ny Baiboly fa mahasambatra ny manome. Mahasambatra tokoa izany, miankina amin’ny antony manosika hanaovana ilay fanomezana. — Asan’ny Apostoly 20:35.