Ny Kilasin’i Gileada Faha-101 — Mazoto Indrindra Amin’ny Asa Tsara
MAZOTO indrindra amin’ny asa tsara i Jehovah Andriamanitra, Mpamorona antsika, ary toy izany koa i Jesosy Kristy Zanany. Amin’ny maha-modelintsika azy, i Jesosy dia nampiseho zotom-po tamin’ny fanatontosana ny fanendrena nomen’Andriamanitra azy, izay nahafaoka fanolorana “ny tenany hamonjy antsika, mba (...) hanadiovany izay olona ho an’ny tenany, sady ho mazoto indrindra amin’ny asa tsara izany”. (Titosy 2:14). Azo antoka fa nampiseho ny zotom-pony tamin’ny asa tsara ireo 48 mianadahy anisan’ny kilasy faha-101-n’ny Sekoly Ara-baibolin’i Gileada An’ny Watchtower. Natao ny 7 Septambra 1996 tao amin’ny Foibem-pampianarana An’ny Watchtower any Patterson, New York, ny fandaharana fizarana diplaoma ho an’ireo misionera ireo.
Torohevitra azo ampiharina mba hitoerana hazoto
I Carey Barber, mpikambana ao amin’ny Fitambara-mpitantana, izay tao amin’ny fanompoana manontolo andro hatramin’ny 70 taona mahery, no mpitari-draharaha tamin’ilay fandaharana fizarana diplaoma. Tao amin’ny fanazavana fanokafana nataony, ny Rahalahy Barber dia nisarika ny saina ho amin’ny asa fitoriana sy fampianarana nataon’i Jesosy, izay “fahazavan’izao tontolo izao”. (Jaona 8:12). Nomarihiny fa tsy nitana io anjara asa mendri-kaja io ho an’ny tenany ihany i Jesosy, fa nampirisika mafy an’ireo mpianany mba hamela ny fahazavan’izy ireo hazava koa. (Matio 5:14-16). Mampisy heviny kokoa ny fiainan’ny Kristiana iray io tombontsoam-panompoana io, ary mametraka andraikitra mavesatra eo an-tsorok’izay rehetra ‘mandeha tahaka ny zanaky ny mazava’. — Efesiana 5:8.
Taorian’ireo fanamarihana fanokafana ireo, dia naroso hanao ny anjarany i Don Adams, avy ao amin’ny Birao Mpanatanteraka ao amin’ny foibe any Brooklyn. Niresaka momba ilay foto-kevitra hoe “Mandeha Mandroso, fa Tsy Mihemotra”, izy. Nisarika ny saina ho amin’ny Sekolin’i Gileada mihitsy sy ny zava-kendren’izy io — ny hanitatra ny fitoriana ny vaovao tsara any amin’ny tany hafa — ny Rahalahy Adams. Noresahiny ny amin’ny fandrosoan’ny fandaminan’Andriamanitra, izay namoaka zavatra vita an-tsoratra ara-baiboly manerana ny tany manontolo tamin’ny fiteny maherin’ny 300. Natao ho azo ampiasaina amin’ny fiteny 111 ilay boky hoe Fahalalana Izay Mitarika ho Amin’ny Fiainana Mandrakizay, navoaka tamin’ny 1995, ary ao anatin’ny fandaharam-potoana ny hanaovam-pirinty azy io amin’ny fiteny maro kokoa. Efa nampiasaina sahady ho fitaovana nanampiana mpianatra vaovaon’i Jesosy mba ho tonga hatramin’ny fanoloran-tena sy ny batisa, tao anatin’ny volana vitsivitsy monja, izy io. Koa hanana ny fitaovana fampianarana Baiboly nivoaka farany indrindra izay ho azo ampiasaina amin’ny asany, ireo misionera vaovao.
Avy eo i Lyman Swingle, mpikambana ao amin’ny Fitambara-mpitantana, dia niresaka ny amin’ilay foto-kevitra hoe “Aza Mitsahatra Manao ny Fanompoanao Masina ho An’i Jehovah”, miorina amin’ny Apokalypsy 7:15 (NW ). Koa satria ny tenan’i Jehovah mihitsy dia Andriamanitra sambatra, dia mahatonga ny olona iray ho sambatra ny fanompoana azy tsy an-kijanona. (1 Timoty 1:11, NW ). Vokatr’io fanompoana mahafaly io, dia misy vahoaka be voaforon’ny olona avy any amin’ny faritra rehetra amin’ny tany, tonga mba hanolotra fanompoam-pivavahana aminy. Nandritra ny taona maro, ireo izay nampiofanina tao amin’ny Sekolin’i Gileada dia nandray anjara tamin’ny fanampiana ny maro tamin’ireo olona ireo ho tonga amin’ny fahalalana araka ny marina ny fahamarinana. Manana ny antony rehetra àry isika mba hinoana fa hanohy hitahy an’ireo izay irahina ankehitriny mba hanangona mpikambana maro kokoa ho ao amin’ilay vahoaka be mihamaro isa, i Jehovah.
“Fanomezana Taratry ny Fifalian’i Jehovah”, izany no foto-kevitra nasongadin’i Daniel Sydlik, mpikambana ao amin’ny Fitambara-mpitantana koa. Nasehony fa manana tombontsoa mampianatra ny olona ny lalan’ny fiainana mandrakizay sy ny lalana hahazoana ny tsara indrindra avy amin’ny fiainana ankehitriny, ny mpanompon’Andriamanitra rehetra, anisan’izany ireo misionera vaovao. “Anton’asa mitondra valisoa ho an’ny tena ny fampianarana”, hoy ny nambaran’ny Rahalahy Sydlik. “Hita taratra eo amin’ny endriky ny olona manao ilay fampianarana sy eo amin’ny endriky ny olona mianatra izy io.” (Salamo 16:8-11). Namerina ny tenin’ny misionera iray any Estonia izay niteny toy izao izy: “Manana ny hafatra lehibe indrindra eto an-tany isika, ary ny endritsika no mampiseho taratr’izy io.” Mety hampisokatra varavarana maro sy hamelona fahalianana ny fomba fisehon’ny endritsika. Tian’ny olona ho fantatra ny mahatonga ny mpanompon’i Jehovah ho falifaly. “Koa tandremo ny endrikareo”, hoy ny torohevitra nomen’ny Rahalahy Sydlik. “Tian’ny olona ny mahita olona falifaly.”
Niresaka tamin’ny mpanatrika momba ilay foto-kevitra hoe “Ambeno Amim-paharetana ny Fanahinareo”, i Ulysses Glass, izay nandray anjara tamin’ny fanomezana toromarika ho an’ireo mpianatra tao Gileada nanomboka tamin’ny kilasy faha-12 tamin’ny 1949. Inona moa ny faharetana? Izy io dia mampita ilay hevitra hoe miandry zavatra amim-pahatoniana, maneho faharetana rehefa ilana vaniny na ao anatin’ny fihenjanana. Ny olona manam-paharetana dia mitoetra ho tony; ny olona tsy manam-paharetana dia manjary maimaika sy mora sosotra. “Olona maro no mihevitra fa manondro fahalemena na tsy fahatapahan-kevitra ny faharetana”, hoy ny fanamarihan’ny Rahalahy Glass, kanefa “amin’i Jehovah, izy io dia mitondra ny mariky ny tanjaka sy ny fananana zava-kendrena.” (Ohabolana 16:32). Inona avy ireo valisoa entin’ny faharetana? “Hitsimbina anao amin’ny zato andro mampahory ny faharetana ao anatin’ny fotoana fohy dia fohy mahatezitra”, hoy ny ohabolana sinoa iray. “Manatsara ny toetran’ny olona iray ny faharetana”, hoy ny fanazavan’ny Rahalahy Glass. “Raha ny marina, dia manisy varinesy mampahateza an’ireo toetra tsara dia tsara hafa izy io. Mahatonga ny finoana ho faniry izy io, ny fihavanana haharitra, sy ny fitiavana ho tsy azo hozongozonina.”
“Tombontsoa ny mahazo fanendrena avy amin’i Jehovah Andriamanitra amin’ny alalan’ny fandaminany”, hoy ny nambaran’i Mark Noumair, izay nanompo tamin’ny naha-misionera tatsy Kenya nandritra ny 11 taona ary mpampianatra ao Gileada ankehitriny. Rehefa namelabelatra ilay foto-kevitra hoe “Raha Tsy Manam-pinoana Ianao, dia Tsy ho Tafatoetra” ny Rahalahy Noumair, dia nisarika ny saina ho amin’ny ohatra ny amin’ny Mpanjaka Ahaza tany Joda. Nanome toky an’ilay mpanjaka ny amin’ny fanohanan’i Jehovah tamin’ny fanendrena azy i Isaia, kanefa mbola tsy nitoky tamin’i Jehovah ihany i Ahaza. (Isaia 7:2-9). Avy eo ny Rahalahy Noumair dia nanazava fa mila manam-pinoana an’i Jehovah ireo misionera — raha ny marina, isika rehetra — mba ho tafatoetra amin’ny asa teokratika nanendrena azy. Mitaky finoana matanjaka ireo zava-tsarotra manokana ao amin’ny fanendrena ho misionera. “Tsarovy mandrakariva fa tsy misy tarehin-javatra tonga lafatra eto amin’itỳ fandehan-javatra itỳ”, hoy ny nambaran’ny Rahalahy Noumair.
Fanandraman-javatra izay mampirisika ny hanaovan-javatra amin-jotom-po
Nandritra ilay fampiofanana azy ireo tao Gileada, ireo mpianatra dia nandany fotoana teny amin’ny fanompoana ampahibemaso isaky ny faran’ny herinandro, ary izany koa moa no zavatra hahina voalohany indrindra any amin’ny toerana hanendrena azy ireo ho misionera. Nanadinadina mpianatra 15, izay nitantara ny zavatra niainany, i Wallace Liverance, anisan’ny mpampianatra ao Gileada. Avy eo i Leon Weaver, ao amin’ny Komitin’ny Sampan-draharahan’ny Fanompoana, sy i Lon Schilling, ao amin’ny Komitin’ny Fampandehanana ny Asa ao Amin’ny Betela, dia nanadinadina mpikambana ao amin’ny komitin’ny sampana avy atsy Afrika sy avy any Amerika Latina, izay nitantara fanandraman-javatra avy teny amin’ny saha misionera sady nanana torohevitra tsara dia tsara ho an’ireo misionera nahazo diplaoma. Tatsy Sierra Leone, araka ny fanazavana, dia tokony ho ny 90 isan-jaton’ireo natao batisa nandritra ny taom-panompoana 1995 no nampian’ireo misionera. Filazana tsara dia tsara ny amin’ny asa feno zotom-po re izany!
Farany, i Milton Henschel, prezidàn’ny Fikambanana, dia niresaka tamin’ireo mpanatrika 2 734 momba ilay foto-kevitra hoe “Tsy Manam-paharoa ny Fandaminan’i Jehovah Hita Maso”. Inona no mahatonga ny fandaminan’Andriamanitra ho tsy misy toa azy? Tsy ny habeny na ny heriny fa noho izy io tarihin’ny fitsipika marin’Andriamanitra sy ny fanapahan-keviny ara-pitsarana. Tamin’ny andro fahiny, dia ny vahoakan’i Jehovah, ny firenen’ny Isiraely, no notolorana ny teniny masina ho adidiny, ka nahatonga an’io firenena io ho tsy nanam-paharoa izany. (Romana 3:1, 2). Amin’izao andro izao, ny fandaminan’i Jehovah dia tafaray noho izy io miasa eo ambany fitarihan’i Jesosy Kristy. (Matio 28:19, 20). Miroborobo sy mitombo izy io. Moa ve misy fandaminana hafa eto an-tany manana Fitambara-mpitantana maka hevitra ao amin’ny Tenin’Andriamanitra, ny Baiboly, alohan’ny hanaovana fanapahan-kevitra lehibe? Amin’ireo fomba ireo sy ny hafa, dia tsy manam-paharoa marina tokoa ny fandaminan’i Jehovah hita maso.
Nifarana tamin’ny fanolorana ireo diplaoma sy tamin’ny famakiana taratasy iray avy tamin’ilay kilasy izay naneho fankasitrahana noho ilay fampiofanana manokana, ny fandaharana nahafinaritra iray.
[Efajoro, pejy 22]
Antontan’isa Momba Ilay Kilasy
Isan’ny tany nanana solontena: 9
Isan’ny tany nanendrena: 12
Isan’ny mpianatra: 48
Salanisan’ny taona: 31,7
Salanisan’ny taona naha-tao amin’ny fahamarinana: 13,8
Salanisan’ny taona naha-tao amin’ny fanompoana manontolo andro: 9,8
[Sary, pejy 23]
Ny Kilasy Faha-101 Nahazo Diplaoman’ny Sekoly Ara-baibolin’i Gileada An’ny Watchtower
Eo amin’ny lisitra eto ambany, ireo laharana dia tononina avy eo aloha mankany aoriana, ary ireo anarana tononina avy eo ankavia miankavanana isaky ny laharana.
1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. 2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. 3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. 4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. 5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. 6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.