Mitantara Ireo Mpitory Ilay Fanjakana
Fampielezana ny Voan’ilay Fanjakana Amin’ny Toe-javatra Rehetra
MAMPIRISIKA ny olona hazoto hiasa ny Baiboly, Tenin’Andriamanitra. Hoy i Solomona Mpanjaka hoe: “Amin’ny maraina dia afafazo ny voanao, ary amin’ny hariva dia aza atsahatra ny tànanao; fa tsy fantatrao izay ho vanona, na ny teo aloha, na ny teo aoriana, na angamba samy ho vanona avokoa izy roa tonta.” — Mpitoriteny 11:6.
Amin’ny toe-javatra mety rehetra, ny Vavolombelon’i Jehovah dia mamafy “voa” amin’ny alalan’ny fitoriana ny vaovao tsaran’ny Fanjakan’Andriamanitra. Any amin’ny tany sy vondro-nosy maherin’ny 230, izy ireo dia ‘tsy mitsahatra mampianatra sy mitory an’i Jesosy ho Kristy’ hatrany. (Asan’ny Apostoly 5:42). Ireto fanandraman-javatra manaraka ireto dia manazava hoe ahoana no ‘tsy nampitsaharan’ny Vavolombelon’i Jehovah ny tanany’ teo amin’ny asa fitoriana.
◻ Tao amin’ny République du Cap-Vert, dia nandalo teo anilan’ny fonja iray ny Vavolombelon’i Jehovah iray rehefa nanao fanompoana teny amin’ny saha. Tao an-tokotanin’ilay fonja, ny voafonja sasany dia niteronterona teny ambony hazo. Rehefa nahamarika an’ilay Vavolombelona terỳ ambany terỳ ireo voafonja, dia niantsoantso mba hahazo gazety vitsivitsy. Nofatoran’ilay Vavolombelona tamin’ny vato iray ny gazety Ny Tilikambo Fiambenana sy Mifohaza! maromaro ary natorany ho any ambadiky ny rindrin’ny fonja. Ho vokatr’io fahalianana voalohany io, dia fampianarana Baiboly 12 no natomboka. Nanolotra ny fiainany ho an’Andriamanitra ny telo tamin’ireo voafonja ary niseho mba hatao batisa ao anaty rano. Manompo amin’ny maha-evanjelisitra manontolo andro, na mpisava lalana, ny iray amin’ireo voafonja, efa herintaona mahery izao. Ahoana anefa no itarihan’izy ireo ny asa fanompoana eny amin’ny saha any am-ponja? Voalohany aloha, dia nozaraina ho faritany ilay fonja. Avy eo, ny faritany dia nozaraina tamin’ireo Vavolombelona telo ary niasany isaky ny cellule. Manolokolo ny fahalianana amin’ny fomba mitovy be amin’ny ataon’ny Vavolombelon’i Jehovah manerana ny tany, izany hoe amin’ny alalan’ny fanaovana fiverenana mitsidika, ireny mpitory ilay Fanjakana ireny. Ny hany maha-samy hafa azy fotsiny anefa, dia ny hoe impiry no tarihina ilay fampianarana Baiboly. Tsy mianatra Baiboly mandritra ny adiny iray eo ho eo, indray mandeha na indroa isan-kerinandro fotsiny ny voafonja sasany, fa mianatra isan’andro kosa! Fanampin’izany, ireo Vavolombelona dia nomen’ny tale jeneralin’ny fonja lalana mba hitarika ny fivorian’ny kongregasiona rehetra ao am-ponja.
◻ Nanjary fananan’ny vehivavy iray tany Portogaly ny boky maromaro an’ny Watch Tower taorian’ny nahafatesan’ny renibeny. Koa satria tsy Vavolombelon’i Jehovah izy, dia tsy nahaliana azy ny hihazona an’ireo boky ireo. Kanefa, tsy ta hanapotika azy ireo izy. Indray andro izy dia niresaka momba ilay fitambaram-boky tamin’ny Vavolombelon’i Jehovah iray nitsidika azy tamin’ny fanompoana isam-baravarana. Nanontany azy ilay Vavolombelona raha mba fantany ny tena hasarobidin’ilay fitambaram-boky. Namaly toy izao ilay vehivavy: “Raha ny marina, dia tsy mahalala izay tena hasarobidin’izy ireo aho, ahoana anefa no ahafahako mahalala izany?” Nanaiky fampianarana Baiboly ilay vehivavy, ary tsy ela dia nanjary nankamamy an’ilay fitambaram-bokin-drenibeny izy. Vavolombelon’i Jehovah vita batisa koa izy ankehitriny. Ambonin’izany, dia mianatra Baiboly koa ny zanany vavy sy ny namana akaiky iray. Hita ho lova sarobidy toy inona moa io fitambaram-boky io!