Ny valisoa Entin’ny Fanajana ny Ray Aman-dreny Zokiolona

IREO mpivavaka marina amin’Andriamanitra dia manaja sy manome voninahitra ary mikarakara ireo ray aman-dreniny zokiolona satria tiany izy ireo. Anisan’ny fanompoam-pivavahany izany. Hoy ny ambaran’ny Baiboly: “Aoka [ny zanaka na ny zafy] aloha hianatra haneho toe-panahy araka an’Andriamanitra amin’ny fianakaviany ka hamaly babena ny ray aman-dreniny na ny raibe aman-drenibeny, fa izany no ankasitrahin’Andriamanitra.” (1 Timoty 5:4, DIEM, izahay no manao sora-mandry.) Na tanora isika na antitra, dia mety ny anolorantsika ‘valim-babena’ ho an’ireo ray aman-drenintsika sy raibe aman-drenibentsika. Amin’izany fomba izany no anehoantsika fankasitrahana ny fitiavan’izy ireo sy ny asa mafy nataony ary ny fikarakarany antsika nandritra ny taona maro dia maro. Ireo ray aman-drenintsika rahateo moa no nahitantsika masoandro!

Mariho fa ‘ankasitrahan’Andriamanitra’ ny valim-babena atao amin’ireo ray aman-drenintsika sy raibe aman-drenibentsika. Ampifandraisina amin’ny “toe-panahy araka an’Andriamanitra” ananantsika izy io. Noho izany, amin’ny fampiharana an’io torohevitra io, dia hovalian-tsoa isika, noho ny fahafantarana fa manao izay mampifaly an’Andriamanitra isika. Mitondra fifaliana ho antsika izany.

Ahitana fifaliana ny manome ho an’ny hafa, indrindra rehefa manome ho an’ireo izay nanome antsika tamim-pahalalahan-tanana isika. (Asan’ny Apostoly 20:35). Misy valisoa tokoa lahy amin’ny fanaovan-javatra mifanaraka amin’ilay fotopoto-pitsipiky ny Baiboly manao hoe: “Manomeza antony ifaliana ho an’ny rainao sy ny reninao, aoka hifaly izay niteraka anao”! — Ohabolana 23:25, The New English Bible.

Ahoana no ahafahantsika mamaly babena ireo ray aman-drenintsika sy raibe aman-drenibentsika? Amin’ny fomba telo: ara-nofo sy ara-pihetseham-po ary ara-panahy. Samy mitondra valisoa ny tsirairay amin’ireo.

Fanomezana eo amin’ny lafiny ara-nofo

Fantatr’ireo manompo an’Andriamanitra fa zava-dehibe ny hanohanana ara-nofo ireo mpianakavin’ny tena akaiky. Nananatra toy izao ny apostoly Paoly: “Raha misy tsy mamelona ny azy, indrindra fa ny ankohonany, dia efa nandà ny finoana izy ka ratsy noho ny tsy mino aza.” — 1 Timoty 5:8.

Mipetraka atsy Afrika Andrefana i Tunji sy i Joy. Na dia tena sahirana ara-bola aza izy mivady, dia nanasa ireo ray aman-drenin’i Joy efa zokiolona mba hifindra tao aminy izy ireo. Narary ilay rain’i Joy ary maty tamin’ny farany. Nihevitra toy izao i Tunji: “Rehefa maty i Papa, dia namihina ny vadiko i Mama sady nilaza hoe: ‘Efa nanao izay rehetra azon’olombelona natao ianao. Tsy tokony hahatsiaro tena ho meloka mihitsy ianao noho ny nahafatesan’i Papa.’ Na dia malahelo an’i Papa aza izahay, dia fantatray fa nividy ny fanafody tsara indrindra ho azy izahay ary niezaka foana mba hahatsapany ho irina sy ilaina; nanao izay farany azonay natao izahay mba hiantsorohana ny andraikitra nomen’Andriamanitra anay. Manana izany fahafaham-po izany izahay.”

Mazava ho azy fa tsy ny rehetra akory no afaka manampy ny hafa eo amin’ny lafiny ara-nofo. Hoy ny lehilahy iray mipetraka atsy Nizeria: “Raha tsy mahavelon-tena ny lehilahy iray, dia ahoana no ahafahany mamelona olon-kafa?” Any amin’ny tany maro, dia mety ho vao mainka hiharatsy ny tarehin-javatra amin’ireo taona ho avy. Araka ny faminavinana nataon’ny Firenena Mikambana, dia tsy ho ela ny antsasaky ny mponina any atsimon’i Sahara, atsy Afrika, dia hiaina ao anatin’ny fahantrana tanteraka.

Raha ao anatin’ny fahasahiranana ara-bola ianao, dia azonao atao ny mahazo fampiononana avy amin’ny tantara tena nisy mahakasika mpitondratena nahantra iray. Fony i Jesosy teto an-tany, dia nahita mpitondratena iray izay nanao fanomezana kely ho an’ny rakitry ny tempoly izy. “Farantsakely roa” monja no nomeny. Na dia izany aza, noho ny fahafantaran’i Jesosy ny toerana nisy azy, dia hoy izy: “Lazaiko aminareo marina tokoa fa io mpitondratena malahelo io no efa nandatsaka be noho izy rehetra. Fa ireo rehetra ireo, dia tamin’ny haben’ny fananany no nandatsahany tao amin’ny rakitra; fa izy kosa tamin’ny fahantrany no nandatsahany ny fivelomany rehetra izay nananany.” — Lioka 21:1-4.

Toy izany koa fa raha manao izay farany azontsika atao isika eo amin’ny fikarakarana ara-nofo ireo ray aman-drenintsika sy raibe aman-drenibentsika, na dia mety ho kely aza ilay izy, dia mahita sy mankasitraka izany i Jehovah. Tsy manantena antsika hanao zavatra mihoatra noho izay azontsika atao izy. Angamba hihevitra toy izany koa ireo ray aman-drenintsika sy raibe aman-drenibentsika.

Fanomezana eo amin’ny lafiny ara-pihetseham-po

Ny fanomezana an’izay ilain’ireo ray aman-drenintsika sy raibe aman-drenibentsika dia mahafaoka zavatra mihoatra noho ny fikarakarana fotsiny izay ilain’izy ireo ara-nofo. Manan-javatra ilaina ara-pihetseham-po isika rehetra. Ny rehetra, anisan’izany ireo be taona, dia manana faniriana ny ho tiana, ny hahatsapa ho ilaina sy irina, ny ho mpikambana ankamamina ao anatin’ny fianakaviana.

I Mary, izay mipetraka atsy Kenya, dia nikarakara ny rafozambaviny zokiolona, nandritra ny telo taona izao. Hoy i Mary: “Ankoatra ny fanomezanay izay ilainy ara-nofo, dia miresaka aminy foana izahay. Tsy afaka manao zavatra firy i Mama ao an-trano, kanefa dia miresaka izahay ary nanjary mpinamana be. Miresaka momba an’Andriamanitra izahay indraindray, ary momba ny olona any an-tanàna indraindray. Tena tsara ny fitadidiany na dia maherin’ny 90 taona aza izy. Tadidiny sy resahiny ny amin’ny fiainana fony izy mbola ankizivavy kely, tamin’ireo andro talohan’ny 1914.”

Manohy ny teniny toy izao i Mary: “Tsy mora ny mikarakara olona be taona, kanefa nitondra valisoa sarobidy ny fitoerany eto aminay. Misy fihavanana sy firindrana ao amin’ny fianakavianay. Ny nanomezako azy zavatra dia nandrisika toe-tsaina tia manome teo amin’ny hafa tao anatin’ny fianakaviana. Manaja ahy kokoa ny vadiko. Ary raha mandre olona miteny an-kasiahana amiko i Mama, dia tonga izy dia miteny ho fiarovana ahy. Tsy misy olona sahy manao teny manindrona ahy raha mbola eo koa izy!”

Fanomezana eo amin’ny lafiny ara-panahy

Tsy misy hafa amin’ny fanomezana ara-nofo sy ara-pihetseham-po, dia mitondra valisoa koa ny zavatra ara-panahy. Nanoratra toy izao ho an’ny kongregasiona kristiana tany Roma ny apostoly Paoly: “Maniry hahita anareo aho hanomezako [fanomezana ara-panahy, NW ] ho anareo, mba hampaherezina hianareo, izany dia ny mba [hisian’ny fifampaherezana eo, NW ] aminareo amin’ny finoantsika, dia ny anareo sy ny ahy.” — Romana 1:11, 12.

Mitovy amin’izany ihany, raha ny fanomezana ara-panahy ho an’ireo zokiolona manompo an’Andriamanitra no asian-teny, dia mazàna no misy fifampaherezana amin’izany. Mitantara toy izao i Osondu, izay mipetraka atsy Nizeria: “Ny mahaliana ahy indrindra amin’ireo raibe aman-drenibeko, dia ny fanomezany ahy fahafahana hanao topy maso ny lasa. Ny raibeko, amin’izato masony manome taratry ny fifaliana, dia hiresaka momba ny faritany niasany tamin’ny naha-mpanompo manontolo andro azy tamin’ireo taona 1950 sy 1960. Mampitaha ny firafitry ny kongregasiona ankehitriny amin’ny zava-nisy tamin’ny fotoana nahatongavany ho Vavolombelona izy. Ireny zavatra niainany ireny dia manampy ahy eo amin’ny fanompoako amin’ny maha-mpisava lalana.”

Afaka manampy koa ny hafa ao amin’ny kongregasiona kristiana, raha ny amin’ny fanomezana ho an’ny be taona. I Tunji, voalaza tetsy aloha, dia nanazava izay nitranga tao amin’ny kongregasionany: “Ny rahalahy mpisava lalana tanora iray izay voatendry hanao lahateny ampahibemaso dia nitondra ilay planina tany amin’i Papa mba hahafahan’izy ireo miara-manomana azy io. Tonga ilay mpitarika ny Fianarana ny Tilikambo Fiambenana ka nilaza tamin’i Papa hoe: ‘Efa za-draharaha ianao ka inona no azonao lazaina mba hanampiana ahy hanao zavatra tsaratsara kokoa.’ Afaka nanome torohevitra azo nampiharina ho an’io loholona io i Papa. Imbetsaka ireo rahalahy no manonona ny anaran’i Papa ao amin’ireo vavaka ataon’ny kongregasiona. Izany rehetra izany dia nahatonga azy hahatsapa ho irina.”

Mitarika ny olona ho amin’Andriamanitra ny fitondran-tena tsara

Indraindray, rehefa mampiseho fanajana sy fitiavana an’ireo ray aman-drenintsika sy raibe aman-drenibentsika isika, dia mitarika olona ho amin’Andriamanitra. Hoy ny nosoratan’ny apostoly Petera: “Ary aoka ho tsara ny fitondrantenanareo eo amin’ny jentilisa, mba hankalazany an’Andriamanitra (...) noho ny ahitany ny asa tsara ataonareo, dia izay anendrikendrehany anareo ho mpanao ratsy.” — 1 Petera 2:12.

I Andrew, loholona kristiana atsy Afrika Andrefana, dia nanao dia 95 kilaometatra indroa isan-kerinandro mba hikarakarana ny rainy narary, izay tsy mpino. Hoy izy mitantara: “Rehefa lasa Vavolombelon’i Jehovah aho, dia nanohitra mafy ny raiko. Kanefa nony hitany ny fomba nikarakarako azy rehefa narary izy, dia tsy nitsahatra nampirisika an’ireo zandriko lahy sy vavy izy hoe: ‘Tsy maintsy miditra ao amin’ny fivavahan’ny zokinareo ianareo!’ Nandrisika azy ireo izany, ary izao dia Vavolombelon’i Jehovah daholo ireo zanaky ny raiko sivy.”

Mety ho zava-tsarotra ny fanajana sy ny fikarakarana ireo ray aman-drenintsika zokiolona, indrindra fa amin’ny fotoam-pahasahiranana mafy ara-bola. Rehefa miezaka mafy ny hanao izany anefa ny Kristiana, dia mijinja valisoa maro. Ambonin’ny zava-drehetra, izy ireo dia manana ilay fifaliana manome, miaraka amin’ny fahafaham-po noho ny fahafantarana fa mampifaly an’i Jehovah Andriamanitra, izay ‘Rain’ny olona rehetra’, ny tenany. — Efesiana 4:6.

[Efajoro, pejy 6]

Torohevitra Tsara ho An’ireo Karakaraina sy Ireo Mpikarakara

Aoka ianao hampahery: “Aoka isika rehetra samy hitady izay hahafaly ny namantsika amin’izay hahasoa sy hampandroso azy.” — Romana 15:2.

Aoka ianao hikikitra hatrany: “Aza mba ketraka amin’ny fanaovan-tsoa isika; fa amin’ny fotoan’andro no hijinjantsika, raha tsy reraka isika.” — Galatiana 6:9.

Aoka ianao hanetry tena: ‘Aza manao na inona na inona amin’ny fifampiandaniana, na mandrani-tena foana fa amin’ny fanetren-tena dia aoka samy hanao ny namany ho mihoatra noho ny tenany.’ — Filipiana 2:3.

Aoka ianao ho mpanao soa: “Aoka tsy hisy olona hitady ny hahasoa ny tenany, fa ny hahasoa ny namany.” — 1 Korintiana 10:24.

Aoka ianao hahalala ny antonona: “Aoka ho fantatry ny olona rehetra ny fahalalanareo ny antonona.” — Filipiana 4:5, NW.

Aoka ianao hiantra: “Aoka samy halemy fanahy amin’ny namany avy hianareo, ka hifampiantra sy hifamela heloka”. — Efesiana 4:32.

[Sary, pejy 7]

Afaka mandray soa avy amin’ny zavatra niainan’ireo be taona kokoa ireo loholona tanora kokoa