Manontany ny Tanora Hoe . . .

Ahoana no Ifandraisako Akaiky Kokoa Amin’i Dadabe sy i Bebe?

“Samy tia mitantara zavatra i Dadabe sy i Bebe. Manampy ahy hahatakatra ny fihetseham-poko ny tantara ataon’izy ireo.”—Josoa.

NIARA-NIPETRAKA foana ny fianakaviambe maro taloha, ary matetika aza no niray trano mihitsy. Nahazatra ny fiarahana akaiky tamin’ny raibe sy renibe.

Mety ho lavitra ny dadabe sy bebeny anefa ny tanora amin’izao andro izao. Mihamaro koa ny fianakaviana naparitaky ny fisaraham-panambadiana. Milaza ny The Toronto Star fa “mety hiharan’ny vokatry ny fisaraham-panambadiana koa ny raibe sy renibe, ka tsy afaka mifankahita amin’ny zafikeliny tiany”. Manana fomba fijery ratsy momba ny zokiolona koa indraindray ny tanora maro, ka mihevitra azy ireny ho tsy maharaka, manana fomba fisaina sy zavatra tiana ary zava-mahaliana hafa dia hafa noho ny azy. Inona no vokany? Tsy mifandray araka ny tokony ho izy amin’ny dadabe sy bebeny, ny tanora maro.

Mampalahelo izany. Nasehon’ilay lahatsoratra teo aloha amin’ity andian-dahatsoratra ity fa mahasoa sy mahafaly ny mifandray akaiky amin’ny raibe sy renibe, indrindra fa raha manompo an’Andriamanitra izy ireo.a Izao no nolazain-dRebeka, momba ny dadabe sy bebeny: “Afaka miara-mihomehy foana izahay.” Nilaza toy izao koa i Petera, tovolahy iray: “Tsy matahotra aho milaza amin’izy ireo izay tsapako sy ny fikasako. Indraindray dia mahazo aina kokoa aho miaraka amin’izy ireo, noho ny miaraka amin’ny ray aman-dreniko. Toa afa-miresaka ny zava-drehetra amin’ny dadabe sy bebeko aho.”

Ary ianao? Mety ho nifandray akaiky tamin’ny dadabe sy bebenao ianao tamin’ny mbola kely. Izao ianao zatovo izao anefa, dia mety ho tsy dia nifandray tamin’izy ireo loatra tato ho ato. Raha izany no izy, dia tena azo ampiharina eto ny torohevitry ny Baiboly ao amin’ny 2 Korintiana 6:11-13, momba ny tokony ‘hanalalahana’ ny fitiavanao azy ireo. Amin’ny fomba ahoana anefa?

Manaova ny dingana voalohany

Mitaky ny hanaovana ny dingana voalohany ny hoe ‘mihamalalaka’. Milaza toy izao mihitsy ny Baiboly: “Aza mamihina ny soa amin’izay tokony homena azy, raha azon’ny tananao atao ihany”. (Ohabolana 3:27) Mety ho tsy dia nisy ‘azonao’ natao momba ny fifandraisanao tamin’ny dadabe sy bebenao, tamin’ny ianao mbola kely. Izao ianao zatovo, na efa olon-dehibe izao anefa, dia mety ho hitanao fa misy zavatra maro azonao atao tsara.

Anisan’izany ny mitsidika tsy tapaka ny dadabe sy bebenao, raha tsy lavitra anao ny misy azy ireo. Mahakamo ve izany? Mety ho izay raha mipetraka fotsiny tsy miteny ianao. Ampiresaho àry izy ireo! Inona no azonao resahina? Manampy ny Filipiana 2:4. Milaza amintsika izy io mba tsy ‘hihevitra ny azy ihany, fa samy ny an’ny namany koa’. Izany hoe: hevero izay hahasoa ny dadabe sy bebenao. Asao izy ireo hilaza ny zavatra mampanahy azy. Inona no tsapany? Inona no zavatra ataony? Mety ho tiany ny miresaka momba ny lasa, koa asao izy ireo hitantara ny fiainany tamin’izy mbola tanora. Na, anontanio azy ireo ny momba ny dadanao na ny neninao tamin’izy ireo mbola tanora. Raha kristianina ny dadabe sy bebenao, dia anontanio azy izay nisarika azy ho amin’ny fahamarinana.

Matetika ny dadabe sy bebe no mitahiry ny tantaram-pianakaviana rehetra, ary angamba tena te hitantara ny zava-mahaliana aminao izy. Azonao avadika ho fotoana mahafinaritra mihitsy aza izany. Andramo adinadinina ny dadabe sy bebenao, ka angamba handray naoty na feo na sary ianao. Raha tsy fantatrao izay hanontaniana, dia asao hanampy anao hitady fanontaniana mety ny ray aman-dreninao. Azo inoana fa hahafantatra zavatra maro hanampy anao hahatakatra kokoa ny dadabe sy bebe sy ny ray aman-dreninao ary ny tenanao mihitsy aza, ianao. “Samy tia mitantara zavatra i Dadabe sy i Bebe”, hoy i Josoa. “Manampy ahy hahatakatra ny fihetseham-poko ny tantara ataon’izy ireo.”

Aza hadinoina anefa fa tena mahaliana ny dadabe sy bebenao ny fiainanao sy ny zavatra ataonao. Manjary mahafantatra anao izy ireo, rehefa mitantara aminy ny zavatra ataonao ianao. Vao mainka hampifamatotra anareo kokoa izany. Izao no nolazain’i Igor, tanora iray any Frantsa: “Miara-misotro dite any amin’ny toeram-pisakafoana foana izahay sy i Bebe, ary miresaka momba ny zavatra nataonay vao haingana.”

Inona no azonay iaraha-manao?

Rehefa avy nanomboka niresaka ianareo, dia angamba ho afaka hiaraka hanao zavatra. Raha mieritreritra kely fotsiny ianao, dia mety hahita zavatra maro azonareo iaraha-manao. Izao no tsaroan’i Dara: “Samy nampianatra ahy hahandro sy hitahiry sakafo, hanao mofo sy hamboly ary hanao zaridaina, ireo bebeko avy amin’i Dada sy i Neny.” Niaraka tamin’ny dadabe sy bebeny i Amy rehefa nisy fivoriam-pianakaviana, sy nanao vakansy. Arakaraka ny taonan’ireo ray aman-drenibe, dia mety ho tia manao zavatra ny sasany aminy. Tia miara-milalao golf amin’ny bebeny i Arona. Miara-manjono sy mikarakara tanàna miaraka amin’ny dadabeny i Josoa.

Raha mpanompon’i Jehovah ny dadabe sy bebenao, dia mety ho tena hahafaly ny hiresaka aminy momba ireo lafiny amin’ny fanompoantsika, toy ny firesahana amin’ny hafa momba ny Baiboly, ohatra. Niara-nandeha tany Polonina mba hanatrika fivoriambe iraisam-pirenen’ny Vavolombelon’i Jehovah, i Igor sy ny bebeny. “Tsy hohadinoiko mihitsy ny fiarahanay tany, ary mbola mahafinaritra anay foana ny miresaka momba azy io”, hoy izy. Marina fa tsy ny dadabe sy bebe rehetra no afaka mandehandeha toy izany. Tsara anefa ny miara-mandany fotoana amin’izy ireo.

Lova ara-panahy

Nanampy betsaka an’i Timoty zafikeliny ho tonga olon’Andriamanitra niavaka i Loisa, vehivavy tamin’ny andron’ny Baiboly. (2 Timoty 1:5) Tsy mahagaga raha manana anjara toy izany koa ny raibe sy renibe kristianina ankehitriny. Hoy i Josoa momba ny dadabe sy bebeny: “Mbola tsy teraka akory aho dia efa nanompo an’i Jehovah izy ireo, hany ka tena manaja azy ireo aho, tsy noho izy ireo dadabe sy bebeko fotsiny, fa noho izy ireo tsy mivadika koa.” Hoy i Amy: “Milaza foana i Dadabe sy i Bebe fa mampahery sy mahafaly azy ireo ny mahita ahy tsy mivadika eo amin’ny fanompoana an’i Jehovah. Ny ohatra tsara sy ny zotom-pon’izy ireo teo amin’ny fanompoan’ny mpisava lalana [mpitory manontolo andro] anefa no mampirisika ahy hanohy ny asan’ny mpisava lalana.”

Lazain’i Chris hoe “ilay olona voalohany nampirisika azy hianatra sy handroso”, ny bebeny. Hoy koa izy: “Tsy hohadinoiko mandrakizay ilay teniny hoe ‘mila manao izay tsara indrindra ho an’i Jehovah isika’.” Anisan’ny nanampy be indrindra an’i Pedro mba handroso ara-panahy ny dadabe sy bebeny. Hoy izy: “Nanampy betsaka ahy ny traikefan’izy ireo. Nentin’i Dadabe sy i Bebe nitory foana aho, ary tena tiako be izany.” Tena afaka manampy anao hanompo an’Andriamanitra amin’ny fomba feno kokoa ny fifankahazoanao amin’ny raibe sy renibe manompo an’Andriamanitra.

Raha lavitra anao ny misy azy ireo

Ahoana raha lavitra anao ny misy azy ireo? Miezaha hitsidika azy ireo tsy tapaka, raha mety. Miezaha koa hifampita vaovao, rehefa tsy mankany ianao. Intelo isan-taona ihany i Hornan no mahita ny dadabe sy bebeny, nefa hoy izy: “Mitelefaonina amin’izy ireo aho isaky ny alahady.” Hoy koa i Dara: “Mahaliana azy ireo ny fiainako, ka mifampitelefaonina saika isan-kerinandro izahay.” Tsara ny mitelefaonina, nefa zava-dehibe kokoa ny taratasy. Gaga ny tanora maro fa notahirizin’ny dadabe sy bebeny ny taratasy rehetra nalefan’izy ireo hatramin’ny fahazazany. Azo vakina sy averina vakina ny taratasy, ary tena tian’izy ireo. Aza hadinoina àry ny manoratra!

Mazàna ny raibe sy renibe no manam-pitiavana manokana ny zafikeliny. (Ohabolana 17:6) Misy fomba maro anorenana sy ihazonana fifandraisana akaiky amin’ny dadabe sy bebenao, na lavitra izy ireo na akaiky. Na ahoana na ahoana, dia ataovy ilay ezaka.

[Fanamarihana ambany pejy]