Mitantara Ireo Mpitory Ilay Fanjakana

“Ny Olonao dia Mazoto Manolo-tena”

VOAN’NY habokana i Namàna, ilay komandin’ny miaramila syriana nahery. Raha tsy tsaboina io aretina maharikoriko io, dia afaka miteraka fahasimban’ny endrika sy fahafatesana. Inona no hataon’i Namàna? Tao amin’ny ankohonan’i Namàna dia nisy zazavavy kely iray “babo avy tany amin’ny tanin’ny Isiraely”. Niresaka tamim-pahasahiana izy, ary nampahafantatra an’i Elisa mpaminany, ho ilay olona afaka nanasitrana an’i Namàna. — 2 Mpanjaka 5:1-3.

Noho ny fijoroan’ilay zazavavy kely tamin-kerim-po, dia nitady an’i Elisa i Namàna, ka sitrana. Ankoatra izany, dia tonga mpivavaka tamin’i Jehovah i Namàna! Io fitantarana voarakitra ao amin’ny Baiboly io, dia nitranga tamin’ny taonjato fahafolo al.f.i. (2 Mpanjaka 5:4-15). Amin’izao andro izao, dia tanora maro no mampiseho herim-po mitovy amin’izany, mba hiresahana amim-pahasahiana, ho tombontsoan’ilay Fanjakana. Manamarina izany izao fanandraman-javatra avy atsy Mozambika izao.

Mpitory ny vaovao tsara tsy vita batisa i Nuno, enin-taona. Na dia talohan’ny nahatongavany ho mpitory tsy vita batisa aza, dia nanangona ireo ankizy teo amin’ny manodidina azy i Nuno, nivavaka, ary nampianatra Baiboly azy ireo, tamin’ny alalan’ilay boky hoe Ny Bokiko Misy Fitantarana avy ao Amin’ny Baiboly.

Imbetsaka i Nuno no mifoha aloha be ny asabotsy maraina, ary mampahatsiahy ny fianakaviany hoe: “Handeha any amin’ny saha fanompoana isika anio.” Miseho amin’ny fomba hafa koa ny zotom-pony ho an’ny fanompoana. Rehefa miaraka amin’ny ray aman-dreniny eo amin’ny fanompoana eny amin’ny araben’i Maputo i Nuno, dia matetika izy no manatona irery ny olona. Indray mandeha, dia nanatona azy ny mpandraharaha iray, ary nanontany hoe: “Nahoana ialahy no mivarotra ireny gazety ireny?” Hoy i Nuno: “Tsy mivarotra gazety aho, fa manaiky ny fanomezana avy amin’ny olona, mba hanohanana ny asa fitoriana.” Namaly ilay mpandraharaha hoe: “Na dia tsy liana aza aho, dia talanjona aho noho ny fihetsik’ialahy sy ny fahaizan’ialahy. Tiako ny hanome fanomezana ho an’io asa io.”

Indray mandeha koa, i Nuno, dia nanatona lehilahy iray teny an-dalana, ary nanolotra azy ny boky La paix et la sécurité véritables: comment est-ce possible? Nanontany ilay lehilahy hoe: “Tsy mianatra arỳ amin’irỳ sekoly irỳ ve ialahy?” “Ia”, hoy ny navalin’i Nuno, “Mianatra ao aho, fa androany aho mampiseho hafatra iray lehibe avy ato amin’itỳ boky itỳ. Hasehon’izy itỳ anao fa ho afaka ny hiaina ao amin’ny tontolo vaovao izay haorin’Andriamanitra ianao, araka ny asehon’ilay sary eto amin’itỳ boky itỳ.” Tsy nahatakatra i Nuno fa mpampianatra tao amin’ilay sekoly nianarany ilay lehilahy niresahany. Tsy vitan’ny hoe nanaiky ilay boky fotsiny ilay mpampianatra, fa mandray tsy tapaka ny gazety Ny Tilikambo Fiambenana sy Mifohaza! avy amin’i Nuno koa izy izao.

Hoy ny lazain’i Nuno, rehefa anontaniana ny antony itiavany manao ny asa fitoriana izy: “Tiako ny hiresaka amin’ny olona sy ny hampianatra azy ireo momba an’i Jehovah sy ny Zanany, Jesosy Kristy.” Hoy ny teny nanampiny: “Ary raha tsy te hihaino ny olona, dia tsy misy antony tokony hahasosotra.”

Maneran-tany, dia tanora an’arivony maro sahala amin’i Nuno no “mazoto manolo-tena” hampianatra sy hitory momba ny Fanjakan’Andriamanitra. (Salamo 110:3). Tsy mitranga noho ny kisendrasendra anefa izany. Hovalian-tsoa be dia be ny ray aman-dreny izay mampianatra ny zanany momba an’i Jehovah hatramin’ny fahazazany, ka manome ohatra tsara eo amin’ny fanompoana, ary mikatsaka amin-jotom-po ny tombontsoan’ilay Fanjakana.