Ireo Olana Mampiavaka ny Fianakaviana Misy Raikely na Renikely
AZO ATAO NY MANANA FIANAKAVIANA SAMBATRA MISY RAIKELY NA RENIKELY! AMIN’NY AHOANA?
Nanjary karazana ankohonana fahita any amin’ny faritra maro amin’ny tany, ny fianakaviana misy raikely na renikely. Manana olana izay mampiavaka azy anefa ny fianakaviana misy raikely na renikely. Tsy isalasalana fa ny fitaizana zanaka no sarotra indrindra amin’izany. Araka ny hiezahan’ireo lahatsoratra roa manaraka haseho anefa, dia azo atao ny mitaiza zanaka amim-pahombiazana ao anatin’ny fianakaviana misy raikely na renikely.
NAHAZO LAZA RATSY IREO RAIKELY SY RENIKELY, ARAKA NY EFA MAHAZATRA. TAMIN’NY FAHAZAZAntsika dia maro amintsika no nahare fitantarana ny amin’ny anganon’i Cendrillon, izay nitondra faisana noho ilay renikeliny lozabe. Mahafantatra ny amin’ilay angano hoe Blanche-Neige et les sept nains koa ny ankizy any Eoropa. Nanjary mpilalao ody sady ratsy fanahy ny renikelin’i Blanche-Neige!
Manome fomba fijery araka ny marina ny amin’ny fianakaviana misy raikely na renikely ve ny angano toy izany? Tena lozabe avokoa ve ny raikely na ny renikely rehetra? Tsia. Maniry fotsiny izay hahasoa indrindra an’ireo zana-badiny, ny ankamaroan’izy ireo. Voatery miatrika zava-manahirana sarotra sasany, izay tandra vadin-koditra amin’ny fianakaviana misy raikely na renikely anefa, izy ireo.
Ireo zava-manahirana ny amin’ny fitaizan-janaka
Rehefa rava ny fanambadiana voalohany, dia matetika ny tsy fahamatoran’izy mivady no antony. Mety hanasarotra ny fifandraisana ny fifampiraharahana amin’ny ankizy, ao amin’ny fanambadiana faharoa. Asehon’ireo firaketana an-tsoratra sasany fa ao anatin’ny dimy taona voalohany, dia mpivady mihoatra ny 4 isaky ny 10 no miafara amin’ny fisaraham-panambadiana, eo anivon’ny fianakaviana misy raikely na renikely.
Ireo mpivady vao dia mety tsy hahatakatra izay tsapan’ny zana-bady, toy ny fikorontanana ara-pihetseham-po sy ny adin-tsaina ny amin’ny hoe iza marina no ray na reny tokony tsy hivadihana, ny fahasarotam-piaro sy ny fahasosorana, vokatry ny fahatongavan’ny raikely na renikely. Mety hieritreritra ireo zana-bady fa tia kokoa ilay raikely na renikely noho izy ireo, ilay tena rainy (na reniny). Ankoatra izany, dia mety ho sarotra ho an’ilay tena ray (na reny) nilaozam-bady ny hahatakatra ny antony mbola ifikiran’ny zanany hatrany amin’ilay vadiny taloha. Niezaka nanazava ny fifandraisany tsara tamin’ny tena rainy ny zazalahy iray, tamin’ny filazana hoe: “Neny a! fantatro fa nitondra anao tamin’ny fomba ratsy i Dada, nefa tsara fanahy tamiko izy!” Na dia marina aza ny teny toy izany, dia mety hahatonga ny reny iray ho lotika amin’ny rain’ilay zaza.
Niaiky toy izao ny raikely iray: “Tsy tena niomana hisetra ny zava-manahirana rehetra nifandray tamin’ny fitaizana ny zana-badiko aho. Niditra tamin’ilay toe-javatra aho, ka nieritreritra fa rain’izy ireo aho, satria nanambady an-dreniny. Tsotra ilay izy tamiko! Tsy nahatakatra ny fifikiran’ireo ankizy tamin’ny tena rainy aho, ary nanao fahadisoana maro.”
Eo amin’ny fifehezana indrindra indrindra no mety hipoitra ny fihenjanana. Mila fifehezana amim-pitiavana ny ankizy, nefa matetika no mikomy izy ireo, na dia avy amin’ny tena rainy (na reniny) aza izany fifehezana izany. Vao mainka sarotra kokoa ny manaiky ny fifehezana avy amin’ny raikely na renikely! Mazàna, rehefa mahazo fifehezana toy izany ny zana-bady iray, dia hilaza zavatra toy izao: “Tsy tena raiko ianao!” Tena mety hampamoy fo ny raikely na renikely tsara fikasa ny teny toy izany!
Azo tezaina amim-pahombiazana ve ny ankizy ao amin’ny fianakaviana misy raikely na renikely? Afaka ny hanana anjara asa mahasoa ve ny raikely (na renikely) mba hanorenana fianakaviana vanona misy raikely na renikely? Eny no valin’ireo fanontaniana roa ireo raha manaraka ny torohevitra ao amin’ny tenin’Andriamanitra ara-tsindrimandry, dia ny Baiboly ny rehetra.
[Sary, pejy 3]
“Tsy tena raiko ianao!”