Mitantara Ireo Mpitory Ilay Fanjakana
Manatona ny Vahoaka ny Vavolombelona any Frantsa
NANOMBOKA tamin’ny zoma vao mangiran-dratsin’ny 29 Janoary 1999, ary nitohy hatramin’ny faran’ny herinandro, ny Vavolombelon’i Jehovah tany Frantsa dia nizara tamin-kafanam-po teny amin’ny arabe, ary avy eo dia isan-trano, taratasy mivalona niisa 12 tapitrisa, izay nitondra ny lohateny hoe Ry Mponin’i Frantsa, Voafitaka Ianareo! Nahoana no natao io ezaka manokana io?
Nomena tao amin’ny valandresaka iray ho an’ny mpanao gazety tao Paris, tamin’io zoma maraina io, ny anton’ilay ezaka manokana. Nanazava toy izao ny mpitondra tenin’ny Vavolombelona iray: “Ny irinay hatao amin’izao fotoana izao, dia ny hampahafantatra hoe iza marina izahay, sy ny hampangina ny fanambarana fanosoram-potaka natao taminay. Vonona hanaiky fanakianana izahay, nefa tsy hihaino intsony an’ireo lainga sy fanamarihana izay manimba ny lazanay.”
Na dia ny fahatelo amin’ireo fivavahana kristianina lehibe indrindra any Frantsa aza ny Vavolombelon’i Jehovah, dia ankizy Vavolombelona maro no notenenin-dratsy sy nenjehina tany an-tsekoly. Namoy ny asany sy norahonana noho ny fivavahany ireo olon-dehibe. Sarotra inoana fa na dia ireo fanomezana ara-pivavahana noraisin’izy ireo aza dia notombanana handoavana hetra 60 isan-jato. Ahoana no niatrehana io fanavakavahana io tamin’ny alalan’ilay ezaka manokana?
Manambara toy izao ilay taratasy mivalona: “Ireo Vavolombelon’i Jehovah sy mpiaraka aminy 250 000 monina eto Frantsa, dia MANOHITRA ny fomba tsy marina nampifangaroana ny fivavahany kristianina izay nisy teto Frantsa efa hatramin’ny 1900, tamin’ireo sekta mampidi-doza, nanomboka tamin’ny 1995. (...) MANOHITRA ilay fanenjehana tsy an-kijanona nampiharina taminy izy ireo.” Nalana sarona ireo fiampangana feno endrikendrika namelezana ny Vavolombelona tany Frantsa, sy ireo fomba feno hafetsen-dratsy izay nampiasain’ireo mpanaratsy mba hanimbana ny lazany. Nifarana toy izao ilay taratasy mivalona: “Ankehitriny, dia maherin’ny roa tapitrisa ireo Vavolombelon’i Jehovah sy ny mpiaraka aminy mipetraka eto Eoropa. Olom-pirenena manaja ireo lalàn’ny Fitondrana izy ireo, amin’ny fanohanana ireo fari-pitsipika ambony ao amin’ny Filazantsara. Ry mponin’i Frantsa, izany no zava-misy. Andraikitray ny mampiseho azy ireo araka ny tena izy!”
Vokatra tsara sy haingana
Taratasy mivalona an-tapitrisany maro no voazara tamin’ny andro voalohany. Tao Paris fotsiny, tamin’ny mitataovovonana dia Vavolombelona maherin’ny 7 000 no nahapetraka taratasy mivalona maherin’ny 1,3 tapitrisa teny an-tanan’ny olona. Azo antoka fa sambany ny olona vao nahita Vavolombelona maro be aoka izany nizara taratasy mivalona teny amin’ny arabe. Nankasitraka ilay ezaka manokana ireo fampitam-baovao, anisan’izany ny gazety sy ny televiziona teo an-toerana sy nanerana ilay tany. Nanamarika toy izao ilay gazety hoe Le Progrès de Lyon: “Io ezaka io (...) dia mampiharihary tsy fahazoan-kevitra momba ny teny iray. Tao anatin’ireo folo taona farany, ilay teny hoe ‘sekta’ (...) dia noraisina tamin’ny heviny ratsy sy mampidi-doza ary manimba. (...) Ny Vavolombelon’i Jehovah dia tsy azo inoana ho karazan’olona mampidi-doza izay manozongozona ny fiaraha-monina.”
Ireo mahafantatra ny Vavolombelon’i Jehovah, dia mankasitraka ny toetrany tia fihavanana sy ny fanajany lalina ny filaminam-bahoaka miorina. Araka izany, dia olona maro teny amin’ny arabe no naneho ny fankasitrahany sy ny fanohanany an’ireo Vavolombelona an’aliny maro, izay nandray anjara tamin’ilay ezaka manokana. Nisy antso an-telefaonina sy fax ary taratasy avy tamin’ny olona izay naneho ny fisaorany noho ilay taratasy mivalona, voaray saika teo no ho eo. Ambonin’izany rehetra izany, dia nisy olona tso-po nomena ny fahafahana handre ny zava-misy momba ny Vavolombelon’i Jehovah, izay nifanohitra tamin’ny fanamarihana noforomporonina sy tsy nisy dikany, ary ireo izay notenenin-dratsy ny finoany dia afaka nampiseho ny fihetseham-pony momba izay ankamaminy fatratra.