Nanampy Tamin’ny Fampielezana Fahazavana “Hatrany Amin’ny Faran’ny Tany” Izy
NAMPIASAINA tamin’ny fampielezana fahazavana ara-panahy “hatrany amin’ny faran’ny tany”, ny apostoly Paoly. Ho vokany, dia olona maro izay “nirona araka ny mety ho amin’ny fiainana mandrakizay [no] tonga mpino”. — Asan’ny Apostoly 13:47, 48, NW; Isaia 49:6.
Niharihary koa fa naniry fatratra ny hampiely fahazavana ara-panahy i William Lloyd Barry, izay anisan’ny Fitambara-mpitantan’ny Vavolombelon’i Jehovah, rehefa jerena ny fiainany feno fandavan-tena sy ireo ezaka tsy nitandroany hasasarana tamin’ny naha Kristianina azy. Maty tamin’ny 2 Jolay 1999 ny Rahalahy Barry, raha teo am-pandraisana anjara nivantana tamin’ny fivoriamben’ny distrika iray tany Hawaii.
Teraka tany Nouvelle-Zélande tamin’ny 20 Desambra 1916, i Lloyd Barry. Taloha kelin’izay ny ray aman-dreniny dia efa naneho fahalianana fatratra tamin’ireo fahamarinana ara-baiboly tao amin’ny zavatra vita an-tsoratr’i C. T. Russell, nozarain’ny Watch Tower Bible and Tract Society. Noho izany, dia nihalehibe tao amin’ny tokantrano kristianina iray feno fandavan-tena, ny Rahalahy Barry.
Na dia liana tamin’ny fanatanjahan-tena sy ny fianarana aza ny Rahalahy Barry, ary nahazo diplaoma tamin’ny siansa mihitsy aza, dia nifantoka tsara hatrany tamin’ny zavatra ara-panahy izy. Nirotsaka hanao ny fanompoana manontolo andro àry izy ny 1 Janoary 1939, rehefa tonga mpikambana tao amin’ny fianakavian’ny Betela tao amin’ny biraon’ny Fikambanana tany Aostralia. Taorian’ny nandraran’ny fitondram-panjakana ny Fikambanana tamin’ny 1941, dia be natao hatrany tamin’ny asa birao ny Rahalahy Barry, ka indraindray dia notendrena hanoratra lahatsoratra hampaherezana ireo mpiray finoana taminy. Nitari-dalana koa izy teo amin’ny fanompoana ampahibemaso, ka ohatra fakan-tahaka tamin’io lafiny io.
Nanambady mpanompo manontolo andro tahaka azy ny Rahalahy Barry, tamin’ny Febroary 1942. Niara-niasa taminy tamim-pahatokiana i Melba, vady malalany, nandritra ireny taona rehetra ireny, tany amin’ny faritra maro teto an-tany. Nanao dingana lehibe ho amin’ny fanompoana tany ivelan’ny taniny izy ireo, rehefa nanatrika ny kilasy faha-11-n’ny Sekoly Ara-baibolin’i Gileada An’ny Watchtower, tany Etazonia. Voatendry ho any amin’izay noheverin’ny maro ho “faran’ny tany” izy ireo, dia tany Japon. Tonga tany izy ireo tamin’ny Novambra 1949, ary dia nanomboka nanao ny fanompoan’ny misionera tao amin’ny tanàna seranan-tsambo tao Kobe. Olona 12 monja no nitory ny vaovao tsara tany Japon, tamin’izay fotoana izay. Nianatra ny fiteny sy ireo fomba amam-panaon’ilay taniny vaovao ny Rahalahy Barry, ary namboly firaiketam-po lalina tamin’ny Japoney, izay niarahany nanompo nandritra ny 25 taona nanaraka. Niharihary tamin’ilay fianakavian’ny mpirahalahy kristianina tsy nitsaha-nitombo tany Japon ny fitiavany an’ireo “nirona araka ny mety ho amin’ny fiainana mandrakizay”, dia fitiavana nanampy azy hahita vokatra teo amin’ny fiandraiketana ny sampana, nandritra ny am-polony taona maro.
Nafindra nankany Brooklyn, New York, ry Barry mivady, teo antenatenan’ny taona 1975, fony niisa 30 000 teo ho eo ny Vavolombelona tany Japon. Nasaina ho anisan’ny Fitambara-mpitantan’ny Vavolombelon’i Jehovah ny Rahalahy Barry, noho izy Kristianina voahosotry ny fanahy. (Romana 8:16, 17). Hita ho tena nilaina teo amin’ilay anjara asany vaovao tao amin’ny Sampan-draharahan’ny Fanoratana, ny fahazaran-draharahany tamin’ny fanoratana lahatsoratra. Ary ny zavatra be dia be efa niainany tany amin’ny sampana sy tany amin’ny firenena maro, dia nanomana azy hanana anjara lehibe tamin’ny naha anisan’ny Komitin’ny Fampanontana ao amin’ny Fitambara-mpitantana azy.
Nandritra ny taona maro, dia mbola nihazona ihany ny fitiavany an’i Orient sy ny olona any, ny Rahalahy Barry. Nahazo antoka ireo mpianatra tao amin’ny Sekolin’i Gileada sy ireo mpianakavin’ny Betela, fa hanasongadina fitantarana mankahery momba ny olona maro nanao ny asa misionera, ireo lahateniny sy ireo fanazavany. Nanjary toa hitan’ny maso erỳ ireo asa fitoriana ilay Fanjakana “hatrany amin’ny faran’ny tany”, rehefa nitantara tamin-kafanam-po ireo zavatra nodiaviny ny Rahalahy Barry. Voatonona ao amin’ny tantaram-piainany, navoaka tao amin’Ny Tilikambo Fiambenana (anglisy) tamin’ny 15 Septambra 1960, ny sasany tamin’ireny zavatra nodiaviny ireny.
Matoky isika fa amin’ny maha “mpiray lova amin’i Kristy” azy, dia hitohy hatrany ny fanehoan’ny Rahalahy Barry fiheverana an’ireo ‘mirona araka ny mety ho amin’ny fiainana mandrakizay’. Mazava ho azy fa halahelo mafy azy izay rehetra nahafantatra azy sy tia azy, noho izy lehilahy araka ny fanahy, nanda tena tanteraka ho an’i Jehovah sady niraiki-po lalina tamin’ny vahoakan’Andriamanitra. Faly anefa isika fa niaritra tamim-pahatokiana hatramin’ny faran’ny fihazakazahany teto an-tany ny Rahalahy Barry. — Apokalypsy 2:10.
[Sary, pejy 16]
Lloyd Barry sy John Barr, fony navoaka tamin’ny 1988 ny “Étude perspicace des Écritures”
Ireo nahazo diplaoma tamin’ny kilasy faha-11-n’ny Sekolin’i Gileada, nihaona tany Japon, rehefa afaka 40 taona