2000 — Taona Hiavaka Ve?

MISY mampiavaka azy manokana ve ny taona 2000? Mazàna no mihevitra azy io ho ny taona voalohany amin’ny taonarivo fahatelo ny olona miaina any amin’ireo tany tandrefana. Efa an-dalana ireo fiomanana be kojakojany hoenti-mankalaza azy io. Misy famantaranandro elektrônika goavana be efa atsangana mba hanisana tsirairay ireo segondra farany alohan’ny fiposahan’ilay taonarivo vaovao. Efa misy mandamina ireo alim-pandihizana sy korana hatao amin’ilay alina hiarahabana ny Taom-baovao. Efa amidy any amin’ireo magazain’ny tanàna madinika sy any amin’ireo tsena an-tanàn-dehibe ireo tiserta misy teny faneva momba ny faran’ny taonarivo.

Handray anjara amin’ireo fetifety mandritra ilay taona ireo fiangonana lehibe sy kely. Antenaina hankany Israely ny Papa Jean-Paul II amin’ny voalohandohan’ny taona ho avy, mba hitarika ireo Katolika amin’ilay nantsoina hoe “ny fankalazan’ny Eglizy Katolika Rômanina ny jobilin’ny taonarivo”. Tombanana ho eo anelanelan’ny roa tapitrisa sy sasany ka hatramin’ny enina tapitrisa ireo mpizaha tany mikasa hitsidika an’i Israely amin’ny taona ho avy, ka tafiditra amin’izany na ny mpivavaka be, na ireo ta hahafanta-javatra fotsiny.

Nahoana no misy olona maro be toy izany mikasa hitsidika an’i Israely? Raha nisolo vava ny papa ny Kardinaly Roger Etchegaray, olona ambony ao Vatikana, dia nanao hoe: “Fankalazana an’i Kristy sy ny fiainany teto amin’ity firenena ity ny taona 2000. Noho izany dia ara-dalàna tsotra izao raha ho tonga eto ny Papa.” Ahoana no ifandraisan’ny taona 2000 amin’i Kristy? Fiheverana mahazatra ny hoe feno 2 000 taona katroka amin’ny taona 2000 ny nahaterahan’i Kristy. Izany tokoa ve anefa no izy? Ho hitantsika ny amin’izany.

Vao mainka zava-dehibe kokoa ny taona 2000 ho an’ireo mpikambana amin’ny fivavahana sasany. Mino mafy izy ireo fa amin’ny taona ho avy any ho any, dia hiverina any amin’ny Tendrombohitra Oliva i Jesosy, ary hatao any amin’ny lohasahan’i Megido ilay adin’i Haramagedona izay voaresaka ao amin’ny bokin’ny Apokalypsy. (Apokalypsy 16:14-16). Ho fiandrandrana izany fisehoan-javatra izany, dia teratany amerikanina an-jatony maro no mivarotra ny tranony sy ny ankamaroan’ny fananany ary mifindra mankany Israely. Ho tombontsoan’ireo izay tsy afaka mandao ny tanindrazany, dia voalaza fa nisy mpitory teny malaza iray nampanantena fa hampita ny fiverenan’i Kristy amin’ny televiziona — amin’ny sary miloko!

Mihamitombo ireo fandaharana atao mialoha mba hisantarana ny taonarivo fahatelo, any amin’ireo tany tandrefana. Manohy ny fiainany toy ny mahazatra ihany anefa ny olona any amin’ny tany hafa. Ireny olona ireny, izay maro an’isa amin’ny mponina eto an-tany, dia tsy mino an’i Jesosy avy any Nazareta ho Mesia. Tsy voatery koa izy ireny hanaiky ilay fomba famaritana daty hoe al.J.K.—.A.D.a Miozolimanina maro, ohatra, no mampiasa ny kalandrieny manokana, izay milaza ny taona ho avy ho taona 1420, fa tsy taona 2000. Ny daty nandosiran’ny mpaminany Mahometa avy tany Lameka nankany Medina no iaingan’ny Miozolimanina rehefa manisa ny taona izy ireo. Amin’ny fitambarany, ny mponina maneran-tany dia mampiasa kalandrie 40 samy hafa, eo ho eo.

Tokony hifono heviny manokana ho an’ny Kristianina ve ny taona 2000? Andro miavaka tokoa ve ny 1 Janoary 2000? Hovaliana ao amin’ny lahatsoratra manaraka ireo fanontaniana ireo.

[Fanamarihana ambany pejy]