Nanao ny Sitrapon’i Jehovah Izy Ireo

Fanomezana An-tsitrapo mba Hampandrosoana ny Fanompoam-pivavahana Madio

VAVOLOMBELONA nanatri-maso ny hery mahavonjin’i Jehovah, ireo Isiraelita. Hitan’izy ireo ny nisarahan’ny Ranomasina Mena tamin’ny fomba nahagaga, ka nahafahan’izy ireo niampita nandia tany maina, tsy ho azon’ny tafika ejipsianina. Rehefa tody terỳ ampita izy ireo, dia teo amin’ny toerana azo antoka no nitazanany ny fiantontan’ireo rano ireo ihany teo amin’ireo mpanenjika azy. Namonjy ny ain’izy ireo i Jehovah! — Eksodosy 14:21-31.

Nampalahelo anefa fa ny Isiraelita sasany dia tsy nanisy vidiny firy an’izay nataon’Andriamanitra taminy. Raha mbola tany amin’ny Tendrombohitra Sinay i Mosesy, dia natolotr’izy ireo an’i Arona ny firavaka volamena teny aminy ka nasainy nanamboaran’i Arona sampy mba hivavahany. Rehefa niverina i Mosesy dia nahita izany vahoaka mpikomy izany nihinana sy nisotro sy nandihy ary niankohoka tamin’ny ombilahikely volamena iray! Araka izay nasain’i Jehovah natao, dia nisy 3 000 teo ho eo ny novonoina ho faty — azo inoana fa ireo lohandohany tamin’ilay fikomiana. Tamin’io andro io ny vahoakan’Andriamanitra dia naka lesona lehibe momba ny ilana hanehoana fifikirana tsy mizarazara amin’i Jehovah. — Eksodosy 32:1-6, 19-29.

Tsy ela taorian’io zava-nitranga io i Mosesy dia nivonona hanatanteraka ny didin’Andriamanitra hanorenana tabernakely iray, izany hoe trano-lay fanolorana fanompoam-pivavahana izay azo nentina nandehandeha. Nitaky fitaovana lafo vidy sy mpiasa nahay io tetik’asa fanorenana io. Avy aiza no hiavian’izany? Ary inona no azontsika ianarana avy amin’io fitantaran’ny Baiboly io?

Fanomezana fitaovana sy fahaizana

Nandidy ireo Isiraelita toy izao i Jehovah, tamin’ny alalan’i Mosesy: “Manalà (...) fanatitra ho an’i Jehovah: izay rehetra amporisihin’ny fony dia aoka hitondra fanatitra ho an’i Jehovah”. Karazana fanatitra manao ahoana? Anisan’ireo zavatra notanisain’i Mosesy ny volamena, volafotsy, varahina, kofehy, lamba, hodi-biby, hazo, ary vatosoa. — Eksodosy 35:5-9.

Ampy dia ampy tokoa izay nananan’ireo Isiraelita mba hanaovana izany fanomezana maro be izany. Tadidio fa rehefa nandao an’i Ejipta izy ireo dia nitondra firavaka volamena sy volafotsy mbamin’ny fitafiana maro. Eny, ‘nofoanan’izy ireo tokoa ny egyptiana’.a (Eksodosy 12:35, 36). Taloha, ireo Isiraelita dia nanary an-tsitrapo ny firavany mba hanamboarana sampy iray ho amin’ny fanompoam-pivavahana diso. Hiseho ho dodona hanao fanatitra toy izany ve izy ireo izao, mba hampandrosoana ny fanompoam-pivavahana marina?

Mariho fa tsy nametra habetsahan-javatra voafaritra tsara tokony homen’ny tsirairay i Mosesy, ary tsy nataony koa izay hahatonga ny olona hahatsiaro tena ho meloka na menatra mba hanosehana azy hanome. Ny nataony kosa, dia ny niangavy fotsiny “izay rehetra amporisihin’ny fony”. Miharihary fa hitan’i Mosesy hoe tsy nilaina noterena ny vahoakan’Andriamanitra. Natoky izy fa hanome izay rehetra azony nomena ny tsirairay. — Ampitahao amin’ny 2 Korintiana 8:10-12.

Tsy fanomezana ara-pitaovana ihany anefa no notakin’ilay tetik’asa fanorenana. Izao koa no nolazain’i Jehovah tamin’ireo Isiraelita: “Aoka ny hendry rehetra eo aminareo ho avy ka hanao izay rehetra nandidian’i Jehovah”. Eny, nitaky asa mafy nilana fahaizana io tetik’asa fanorenana io. Nilaina mba hamitana io tetik’asa io tokoa mantsy ny fahaizana “tao-zavatra samy hafa” — anisan’izany ny fandrafetana hazo, ny fanefena metaly sy ny fandravahana amin’ny vatosoa. Mazava ho azy fa hitarika ny talentan’ireo mpiasa i Jehovah, ka ara-dalàna raha izy no homem-boninahitra amin’ny fahombiazan’ilay tetik’asa. — Eksodosy 35:10, 30-35; 36:1, 2.

Namaly tamim-pahadodonana ilay fanasana hanome ny fananany sy ny fahaizany ireo Isiraelita. Hoy ny fitantaran’ny Baiboly: “Samy nanatona izy, dia izay rehetra nampahazotoin’ny fony, ary izay rehetra namporisihin’ny fanahiny, ka nitondra ny fanatitra ho an’i Jehovah hanaovana ny trano-lay fihaonana sy ny fanompoana rehetra momba azy ary ny fitafiana masina. Dia nanatona ny lehilahy mbamin’ny vehivavy rehetra izay namporisihin’ny fony”. — Eksodosy 35:21, 22.

Fianarana ho antsika

Amin’izao andro izao, dia tontosaina amin’ny alalan’ny fanomezana an-tsitrapo ilay asa goavana fitoriana ny vaovao tsaran’ny Fanjakan’Andriamanitra. Matetika izany no vola. Amin’ny toe-javatra hafa, dia misy rahalahy sy anabavy kristianina mampiasa ny fananany traikefa be dia be mba hanampiana eo amin’ny fanorenana Efitrano Fanjakana, Efitrano Fivoriambe, ary tranon’ny Sampana. Eo koa ny asa atao any amin’ireo Trano Betela maherin’ny zato maneran-tany, dia asa izay mitaky fahaizana maro samihafa. Ireo rehetra nampirisihin’ny fony ka nanao fanomezana toy izany dia afaka matoky fa tsy hanadino ny asa mafy nataon’izy ireo i Jehovah! — Hebreo 6:10.

Mihatra koa izany eo amin’ny fandraisan’ny tsirairay avy amintsika anjara amin’ny fanompoana kristianina. Ampirisihina mafy ny rehetra mba hanararaotra izay fotoana azo andraisana anjara amin-jotom-po amin’ny fitoriana. (Matio 24:14; Efesiana 5:15-17). Manao izany ny sasany amin’ny maha mpitory ny filazantsara manontolo andro, na mpisava lalana azy. Tsy afaka mandany fotoana betsaka eo amin’ny fanompoana toy ny mpisava lalana ny hafa, noho ny tarehin-javatra misy azy. Na izany aza anefa, dia mampifaly an’i Jehovah koa izy ireo. Toy ny tamin’ireo fanomezana ho an’ny tabernakely, dia tsy mametra habetsahan-javatra voafaritra tsara tokony homen’ny tsirairay i Jehovah. Ny takiny anefa, dia ny hanompoan’ny tsirairay avy amintsika azy amin’ny fontsika rehetra sy ny fanahintsika rehetra, sy ny saintsika rehetra ary ny herintsika rehetra. (Marka 12:30). Raha manao izany isika, dia afaka matoky fa hamaly soa antsika izy noho ireo fanomezana an-tsitrapo ataontsika mba hampandrosoana ny fanompoam-pivavahana marina. — Hebreo 11:6.

[Fanamarihana ambany pejy]