Ankizy Nitovy Tamin’ilay “Zazavavikely Israelita”
TAMIN’NY 2006 no niseho ny tantara, tany Praia Grande, any Brezila. Efa nanakaiky ny Fahatsiarovana ny nahafatesan’i Jesosy. Tapa-bolana talohan’izay, dia nanao ny lisitry ny olona hasaina ry Sales mianakavy. Nomen’ny ray aman-dreniny fanasana iray i Abigayl, zazavavy enin-taona, ary nanontaniany hoe: ‘Iza no homenao an’iny?’
“Ilay rangahy mitsikitsiky amiko iny foana”, hoy izy.
“Iza izany?”, hoy ny ray aman-dreniny.
“Ilay rangahy malemy iny e!”, hoy izy.
Natoron’i Abigayl azy ireo ilay lehilahy, efatra andro tatỳ aoriana. Walter no anarany, ary tsy lavitra ny Efitrano Fanjakana ny tranony. Nalemy ny tongony satria tratran’ny lozam-piarakodia izy 15 taona lasa izay, tamin’izy 28 taona. Mpanankarena izy ka nanana mpiambina roa. Rehefa nahazo niresaka taminy i Abigayl, dia hoy ny ray aman-dreniny: ‘Misy fanasana tian’ny zanakay homena anao.’
Nohazavain’i Abigayl àry ilay fanasana. Hoy izy avy eo: “Ny olona any am-pivoriana manana fanasana be dia be, fa ny ahy iray fotsiny. Ianao irery izany no asaiko. Ka raha tsy tonga ianao, dia tsy mba manana olona nasaina aho. Fa raha tonga ianao dia faly be aho, ary tena ho faly koa i Jehovah.”
Tamin’ny andron’ny Fahatsiarovana, dia nanadio ny Efitrano Fanjakana hanaovana an’ilay fankalazana ireo Vavolombelona, anisan’izany i Abigayl. Sendra nandalo i Walter no nahita azy, ka nasainy najanona ny fiara. ‘Inona no ataonao?’, hoy izy. ‘Manadio ny efitrano handraisana anao izahay.’
Efa tsindrian-daona erỳ i Abigayl kely, rehefa tonga ilay fotoana. Nanomboka ny lahateny. Nitoditodika izy nijery hoe tonga ve i Walter. Tampoka teo, dia niditra ilay lehilahy sy ny mpiambina azy. Faly erỳ i Abigayl. Nanazava i Walter rehefa nirava, fa efa saika ho any an-toeran-kafa izy. Noho i Abigayl anefa dia tonga izy. Hoy izy avy eo: “Tena tsara ilay lahateny.” Nangataka Baiboly izy, ary nanomboka nianatra sy nivory.
Tian’ny anabavin’i Walter ho fantatra hoe iza izany Abigayl izany, satria miresaka azy foana ny anadahiny. Rehefa nihaona izy ireo, dia faly izy nahita fa zazavavy mahafinaritra i Abigayl. Hoy izy: “Azoko amin’izay ny mahatonga an’i Walter ho lasa falifaly.”
Mbola mianatra Baiboly i Walter. Mivory foana koa izy ary manome valin-teny. Resahiny amin’ny hafa izay ianarany. Mampahatsiahy antsika an’ilay zazavavikely israelita ny tantaran’i Abigayl. Nanampy an’i Namàna hahalala an’i Jehovah, ilay tena Andriamanitra, izy io.—2 Mpanjaka 5:2-14.