Valin’ny Fanontanianareo

◼ Mety amin’ny Vavolombelon’i Jehovah ve ny mitsabo tena any amin’ny hopitaly tantanan’ny fivavahana?

Fivavahana maro no manana hopitaly. Tsy natao hampandrosoana mivantana fivavahan-diso ny ankamaroan’izy ireny. Ho fidiram-bolan’ny fivavahana iray angamba no nananganana azy ireny tamin’ny voalohany. Ankehitriny anefa dia ny anarany fotsiny sisa no maha hopitaly ara-pivavahana ny sasany aminy. Misy hafa koa anefa mbola mampiasa mpitondra fivavahana na relijiozy.

Raha mila mitsabo tena any amin’ny hopitaly ny Vavolombelon’i Jehovah iray, dia izy samirery no hanapa-kevitra raha toa izy ka ho any amin’ny hopitaly izay angamba misy ifandraisany amin’ny fivavahana. Mety hamela ny sasany hanao izany ny feon’ny fieritreretany, fa ny an’ny hafa kosa tsy hamela. Misy toe-javatra sasany tsara hodinihina anefa, satria mety hiankina amin’izany ny fanapahan-kevitra horaisina.

Hopitaly manana anarana ara-pivavahana angamba, ohatra, no hany misy eo akaiky eo. Na misy hopitaly hafa ihany tsy lavitra eo, fa ilay hopitaly misy ifandraisany amin’ny fivavahana no malaza ho tsara fitsaboana kokoa. Angamba koa io hopitaly manana anarana ara-pivavahana io no hany manana ny fitaovana ilaina amin’ilay fitsaboana, na mety ho ao ihany ilay dokoteranao no ho afaka hitsabo ilay aretinao. Hopitaly misy ifandraisany amin’ny fivavahana koa indraindray no mety hanaja ny fanapahan-kevitrao hifady ra, fa ny hafa kosa mety tsy hanaja izany. Zavatra vitsivitsy tsy maintsy dinihina ireo, rehefa manapa-kevitra ny amin’izay hopitaly hidirana.

Raha toa ianao ka manapa-kevitra hitsabo tena any amin’ny hopitaly misy ifandraisany amin’ny fivavahana, dia azonao heverina fotsiny ho saram-pitsaboana ilay vola aloanao. Azonao atao ny mihevitra hoe asa toy ny asa hafa rehetra no ataon’ilay fivavahana. Tsy hoe manao fanomezana an-tsitrapo mba hanohanana fivavahan-diso àry ianao raha mandoa vola noho ilay asa nampanaovina azy. Manome ny saran’ny asa vitany fotsiny ianao.

Mazava ho azy fa amin’ny toy izany, dia tsy maintsy mitandrina ianao mba tsy handray anjara amin’ny fivavahan-diso, satria Kristianina ianao. Na mpiasan’ny hopitaly na mpitsidika, dia tsy azonao omena anaram-boninahitra ara-pivavahana toy ny hoe “Mompera” na “Masera.” Tsy maintsy mitandrina ianao mba ho fitsaboana fotsiny no ifampiraharahanao ao amin’ilay hopitaly, ary izay ihany.

Koa tsy maintsy mandinika ny toe-javatra rehetra àry ny tsirairay ka samy hanapa-kevitra ny amin’izay hopitaly hidirany.​—Gal. 6:5.