Valin’ny Fanontanianareo
◼ Misy hopitaly na trano fitaizana ny be antitra, iandraiketan’ny fivavahana. Azon’ny Vavolombelon’i Jehovah atao ve ny mitsabo tena na mipetraka any?
Maro ny fivavahana manana hopitaly na trano fitaizana ny be antitra na sembana. Tsy natao hitarihana ny olona ho any amin’i Babylona Lehibe izy ireny matetika. (Apok. 18:2, 4) Mba hahazoana vola fotsiny no mety ho antony nanorenana azy, tamin’ny voalohany. Efa tsy an’ilay fivavahana intsony ny sasany ankehitriny, fa ny anarany no tsy novana. Ny hafa kosa mbola mampiasa mpitondra fivavahana na masera.
Mety hisy Vavolombelon’i Jehovah mila miditra hopitaly na mipetraka any amin’ny trano ho an’ny be antitra na sembana. Anjarany ny manapa-kevitra raha ho any amin’ny hopitaly na toerana, izay angamba misy ifandraisany amin’ny fivavahana izy na tsia. Tsy manaiky ho any ny Kristianina sasany, fa ny hafa kosa manaiky. Miankina amin’ny feon’ny fieritreretan’ny tsirairay izany. (1 Tim. 1:5) Misy zavatra tsara hodinihina anefa, satria mety hiankina amin’izany ny fanapahan-kevitra horaisina.
Tsy misy afa-tsy hopitaly iray angamba, ohatra, eny akaikinareo, nefa manana anarana ara-pivavahana izy io. Na misy hafa ihany tsy lavitra eo, fa ilay hopitaly toa misy ifandraisany amin’ny fivavahana no malaza ho mahay mitsabo kokoa. Io hopitaly io koa angamba no hany manana ny fitaovana ilaina amin’ilay fitsaboana, na mety ho ao ihany ilay dokoteranao no afaka miasa. Ny toeram-pitsaboana toy ireny koa indraindray no manaja ny fanapahan-kevitrao hifady ra, fa ny hafa kosa tsy manaja izany. Anisan’ny zavatra tsy maintsy dinihina ireo, rehefa manapa-kevitra hoe aiza ny hopitaly hidirana.
Raha tapa-kevitra ny ho any amin’ny hopitaly na toerana hafa misy ifandraisany amin’ny fivavahana àry ianao, dia azonao heverina ho saram-pitsaboana na saran’ny fikarakarana anao fotsiny ny vola aloanao. Azonao atao ny mihevitra hoe asa toy ny asa rehetra ihany no ataon’ilay fivavahana. Tsy hoe manome vola hanohanana fivavahan-diso àry ianao, raha mandoa vola aminy ho takalon’ilay asa nampanaovinao azy. Manome ny saran’ny asa vitany fotsiny ianao.
Tsy maintsy mitandrina anefa ianao, mba tsy handray anjara amin’ny fanaon’ny fivavahan-diso. Raha misy mpitondra fivavahana na masera miasa ao na tonga mitsidika, dia tsy tokony hantsoinao amin’ny anaram-boninahitra hoe “Mompera” na “Masera” izy. (Matio 23:9) Tsy maintsy mitandrina koa ianao mba ho fitsaboana na fikarakarana fotsiny no ifampiraharahanao amin’ilay hopitaly na ilay trano fitaizana, dia izay ihany.
Azonao atao ny milaza fa Vavolombelon’i Jehovah ianao, ary maniry hotsidihin’ny anti-panahy eo an-toerana, mandritra ny fotoana hijanonanao ao. Hahazo fampaherezana foana ianao amin’izay.—1 Tes. 5:14.
Misy rahalahy na anabavy zokiolona mipetraka any amin’ny trano fitaizana ny be antitra. Tokony hanampy azy hifandray tsara amin’i Jehovah foana ny fianakaviany Vavolombelona sy ny anti-panahy ary ny mpiara-manompo hafa, indrindra raha iandraiketan’ny fivavahana ilay toerana misy azy. Tena hampahery azy ny mahita anareo mazoto manao izany. Ho voaro koa izy, ka tsy handray anjara amin’ny fotoam-pivavahana na fety ao amin’ilay toerana, na dia tsy fanahy iniany aza.
Mila mandinika ny zava-misy rehetra eo an-toerana àry ny tsirairay. Anjarany avy eo ny manapa-kevitra hoe aiza ny hopitaly hidirany na trano fitaizana hipetrahany.—Gal. 6:5.