Amin’ny fanatanterahana ny fanompoantsika ilay Fanjakana ao anatin’ny kongregasiona
1 Tamin’ny alalan’i Jesosy Kristy, ilay Filohan’ny kongregasiona kristiana, i Jehovah dia nanome andraikitra ny “mpitandrin-draharaha mahatoky” iray na mpiadidy ny trano. (Lioka 12:42,43) Izany fandaharana izany dia nahafahantsika nahazo toromarika vita printy ny amin’ny fomba ‘tokony hitondrantsika tena ao an-tranon’Andriamanitra.’ (1 Tim. 3:15) Ny fitaovana lehibe indrindra ananantsika mba hahitana izay zavatra vita printy, dia ny Index des Publications de la Société Watch Tower. Amin’ny fomba ahoana no azony anampiana anao?
2 Moa ve ianao loholona? Misy lohateny ankapobeny roa mifandray amin’ny andraikitrao, dia ny hoe “Loholona” sy ny hoe “Mpiandraikitra”. Eo ambanin’ny fizarana hoe “Loholona” dia ahitana ireo fakàn-teny maro mitondra ho amin’ny fanazavana momba ny fanampiana olona isan-karazany ao anatin’ny kongregasiona, ny amin’ny fomba fanomezana torohevitra, ny fifandraisan’ireo ao anatin’ny kolejin’ny loholona, ny andraikitry ny loholona sy ny sisa. Hita eo ambanin’ny hoe “Mpiandraikitra” ireo fakàn-teny momba ireo fepetra takina, satria io lohateny io no fitenenana ampiasain’ny Baiboly rehefa miresaka ny amin’izy ireny. Eo ambanin’ny hoe “Mpiandraikitra” ihany koa no ahitana ireo andraikitra ôfisialy, tahaka ny hoe “mpiandraikitra prezidà”, “mpiandraikitra ny asa” sy ny hoe “mpitantsoratra”. Ny lohateny lehibe hoe “Kongregasiona”, dia manome fanazavana mahasoa koa.
3 Ianao izay mpikarakara momba ny asa, manana anjara asa lehibe ao anatin’ny kongregasiona koa ny tenanao. Ny lohateny hoe “Mpikarakara momba ny asa” dia manome ny lisitry ny fanazavana momba ireo fepetra takina sy ny andraikitrareo. Hahita koa ianareo, fakàn-teny ny amin’ireo zavatra vita an-tsoratra miresaka ny amin’ny maha-zava-dehibe an’ireo tombontsoam-panompoana misokatra ho anareo sy ny fomba hahatratrarana andraikitra fanampiny.
4 Ireo loholona sy mpikarakara momba ny asa dia manana tombontsoa mifandray amin’ireo fivorian’ny kongregasiona. Ny lohateny hoe “Fivoriana” dia manolotra fakàn-teny amin’ny endriny tsirairay avy amin’io foto-kevitra io, anisan’izany ireo ohatra mampihetsi-po, eo ambanin’ny hoe “fiezahana mba hanatrika.” Mazava koa fa misy lohateny lehibe ho an’ny tsirairay avy amin’ireo fivoriana ireo.
5 Hoy ny Salamo 68:11: “Ny vehivavy mpilaza soa dia antokony lehibe.” Tahaka an’ireo mpikambana lehilahy ao anatin’ny kongregasiona, ny anabavy koa dia tokony hanaraka akaiky ny fitondrantena mifanentana aminy ao amin’ny tranon’Andriamanitra. Mitranga indraindray dia mipetraka ny fanontaniana momba ny foto-kevitra toy ny hoe amin’ny fotoana toy inona no tokony hisaron-doha ny anabavy iray, na hoe inona no tokony hatao rehefa tsy misy rahalahy afaka mitarika fivoriana na afaka misolo tena ny kongregasiona ao amin’ny vavaka manatrika eo. Ny lohateny hoe “Vehivavy” dia afaka mitarika anao ho amin’ny fanazavana momba ireo foto-kevitra ireo. Mahasoa koa ireo lohateny hoe “Anabavy” sy “Misaron-doha” ary “Vavaka”.
6 Ny tapany farany amin’ny 1 Timoty 3:15 dia miresaka ny kongregasiona kristiana ho toy ny “andry sy fiorenan’ny fahamarinana.” Tombontsoa ho antsika tokoa ny manohana ny fahamarinana, raha mbola mitondra tena araka ny mety ao amin’ny tranon’Andriamanitra isika, sady manatanteraka ny fanompoantsika ilay Fanjakana ao anatin’ny kongregasiona.