Aoka isika hanatanteraka ny fanompoantsika an’ilay Fanjakana amin’ny maha-Vavolombelon’i Jehovah antsika
1 Amin’ny maha-Vavolombelon’i Jehovah antsika, dia manana ny tombontsoa lehibe indrindra eto an-tany isika. Misolo tena an’i Jehovah isika amin’ny fitsarana iray atao manerana izao rehetra izao izay itsarana an’ireo rehetra tompoina toy ny andriamanitra. (Isaia 41:1, 23; 43:12). Mba hanampiana antsika hiaro ny fanantenantsika amin’ny fomba mendrika, dia nanome antsika fitahirizam-boky feno zavatra vita an-tsoratra i Jehovah. (1 Pet. 3:15). Fanalahidy lehibe iray hahitana ny fanazavana ilaintsika ny Index des publications de la Société Watch Tower. Ny fifankazarana amin’ny sasantsasany amin’ireo zava-dehibe asongadiny dia hanampy antsika ho tonga kinga kokoa amin’ny fampiasana azy io.
2 Tokony hahafantatra tsara ilay lohateny lehibe hoe “Jehovah” isika rehetra. Eo ambanin’io lohateny ao amin’ny Index tamin’ny 1986-1988 io, moa ve ianao afaka mahita fakàn-teny manazava ny famelan’i Jehovah ny ratsy hisy vetivety? Ho hitanao koa ny lohateny eo afovoany hoe “Nom” ao amin’ny Index tamin’ny 1950-1985 sy ny Index farany. Mitambatra eo avokoa ny fakàn-teny amin’ny zavatra vita an-tsoratra rehetra mikasika ny anarana hoe Jehovah.
3 Lohateny tena lehibe hafa koa ny hoe “Témoins de Jéhovah”. Miara-hita ao ireo fakàn-teny momba ny Vavolombelon’i Jehovah amin’ny maha-fandaminana iray azy. Fantatrao ve ny fomba fiheverana ôfisialy ananantsika raha ny amin’ny fianarana ambony, ny “autopsie”, ny famonoana ho fiarovan-tena, na asa fanasoavam-bahoaka? Hahita fakàn-teny ho an’ny fanontaniana toy izany ianao eo ambanin’ilay lohateny kely hoe “comportement à l’égard”. Ankoatra izany, dia tanisaina manaraka azy ireo ny tantaran’ny Vavolombelon’i Jehovah amin’ny andro ankehitriny any amin’ny tany samihafa, ary hita eo ambanin’ilay lohateny eo afovoany hoe “citations” ny lisitra lava be iray momba ny hevitry ny olona mikasika ny Vavolombelon’i Jehovah.
4 Ny fanazavana ny amin’ny fomba nanatanterahan’ny vahoakan’i Jehovah amin’ny andro ankehitriny ny fanompoany an’ilay Fanjakana dia mety ho hita amin’ny fampiasana ireo lohateny lehibe maromaro. Eo ambanin’ilay lohateny hoe “Dates”, dia misy lohateny eo afovoany hoe “Meilleure compréhension”. Ireo fakàn-teny ho fanazavana lehibe kokoa ny fahazoantsika ny hevitry ny foto-pampianarana, faminaniana, ary tandindona ara-paminaniana dia nalahatra arakaraka ny taona. Ny “Dates ayant un sens prophétiques” [Ireo daty manana heviny ara-paminaniana] dia saika manarakaraka an’io avy hatrany. Efa misy an-taonany maro ireo faminaniana na tandindona ara-paminaniana no tanteraka na nanomboka tanteraka.
5 Ireo tantaram-piainan’ny mpanompon’i Jehovah mahatoky dia loharanom-pampaherezana sy fampianarana ho antsika. Mety hanampy antsika hametraka fanorenana mafy ho an’ny hoavy ao amin’ireo zanatsika na ireo olona ampianarintsika ny Baiboly izy ireny. Ho hitanao voalahatra araka ny anarana manokana sy ny lohatenin-dahatsoratra eo ambanin’ilay hoe “Récits de la vie de Témoins de Jéhovah” ireny tantaram-piainana ireny.
6 Ny Vavolombelon’i Jehovah ihany no manana fampianarana miorina amin’ny Baiboly ny amin’ireo fanantenana roa ho an’ireo izay ankasitrahan’i Jehovah, dia ny ho any an-danitra sy ny ho eto an-tany. Ny lohateny lehibe hahitantsika fakàn-teny momba ireo izay nahazo ny “fiantsoana avy any an-danitra” dia ilay hoe “Congrégation de Dieu”. (Heb. 3:1; Asan’ny apostoly 20:28; 1 Tim. 3:15). Misy koa lohateny hafa hoe “Reste” sy “144 000”. Ny lohateny roa hoe “Grande foule” sy “Autres brebis” no voalohany indrindra manondro mankamin’ny fanazavana mahakasika an’ireo izay manana fanantenana fiainana mandrakizay eto an-tany. — Apok. 7:9; Jaona 10:16.
7 Na tanora isika na antitra, ny tombontsoa amin’ny maha-anisan’ny Vavolombelon’i Jehovah antsika dia mahakasika ny lafim-piainana rehetra. Ireo lahatsoratra manaraka ao amin’ny Ny fanompoantsika ilay Fanjakana dia hampiseho hoe amin’ny ahoana ny Index no afaka manampy antsika amin’ny fanompoantsika, ao amin’ny kongregasiona, eo anivon’ny fianakaviana, ary eny amin’ny saha fitoriana.