Ampiasao amim-pahakingana ny Tenin’ny fahamarinana
1 Misy fiantraikany eo amin’ny fandraisan’ny olona ny vaovao tsara ny fahakingantsika mampiasa ny Tenin’Andriamanitra. Noho izany, dia nampirisika ny hambolena fahaizana tsara eo amin’ny fanompoana i Paoly ka nilaza hoe: “Manaova izay rehetra azonao atao mba hanolorana ny tenanao ho olona hankasitrahan’Andriamanitra, dia mpiasa tsy manana izay tokony hahamenatra azy fa mampiasa tsara ny tenin’ny fahamarinana.” — 2 Tim. 2:15, MN.
2 Tsy maintsy ambolena ny fahakingana rehefa mampiasa ny Baiboly. Tena ilaina ny fanokanana fotoana ho an’ny fianarana manokana sy ny fanatrehana ireo fivoriana kristiana. Kanefa, tsy maintsy ampiharintsika ireo zavatra ianarantsika amin’ny fampiasana tsy tapaka ny Baiboly eo amin’ny fanompoana. Izany dia mitaky fiezahana mitohy sy ny fitadiavantsika ny fanampian’Andriamanitra sy ny fitarihany. — 1 Jaona 3:22.
3 Mifantoha amin’ny Tenin’Andriamanitra: Zava-dehibe ny hahatakaran’ny olona fa tsy araka ny fihevitsika manokana ny hafatra entintsika fa avy ao amin’ny Tenin’Andriamanitra voasoratra. (Jaona 7:18, MN). Afaka manana heriny lehibe ny fampisehoana amin’ny olona iray izay lazain’Andriamanitra momba ny foto-kevitra iray ao amin’ny Baiboly. Voataonan’ny hafatra mahery ao amin’ny Baiboly ireo olona manana fo marina. Rehefa mampiasa betsaka kokoa ny Soratra masina isika, dia manjary mahay kokoa ary ho afaka hanome ny hafa fahatakarana mivelatra kokoa momba ny Tenin’Andriamanitra, zavatra izay hitondra soa ho azy ireo.
4 Tsy mahalala ny Baiboly ny ankamaroan’ny olona. Rehefa mampiasa azy isika, dia tsy maintsy manao mihoatra noho ny famakiana andinin-teny fotsiny. Tena ilaina ny fanaovana fanomanana amim-pieritreretana mba hamantarana ny fomba hampidirana andinin-teny iray. Azo ampiasaina mba hanairana fahalianana ny fanontaniana na ny fanononana zava-manahirana iray. Ary tsy maintsy asiana fiheverana koa izay holazaintsika rehefa avy novakina ilay andinin-teny. Mety tsy ho afaka ny hahazo ilay hevitra tiana holazaina aorian’ny famakiana indray mandeha fotsiny ilay olona. Ny fanamafisana indray ireo teny fototra sy ny fanaovana fampiharana izany dia hamela ireo hevitra hiditra tsara. — Jereo Boky ho an’ny Sekoly, fianarana 24 sy 25.
5 Ny zavatra atolotra: Rehefa mahita olona tena liana amim-pahatsoram-po isika mandritra ny volana Novambra, dia hanolotra azy ireo ny boky Vaovao tsara hahatonga anao ho sambatra. Ahoana no mety hampidirantsika io zavatra atolotra io amin’ireo olona? Rehefa avy nampahafantatra ny tenantsika isika dia afaka milaza hoe: “Amin’izao andro izao, dia maro no mitodika any amin’olona na boky samihafa mba hahazoana fitarihana. Inona no heverinao fa loharano tsara indrindra mba hahazoana fitarihana azo ampiharina? [Avelao izy hamaly.] Jereo izay lazain’ny Baiboly momba ny tena loharanon’ny fahendrena. [Vakio Ohabolana 2:6, 7, fanamarihana ambany pejy.] Mampalahelo fa niharihary ho tsy nahomby sady nitarika ho amin’ny tsy fahasambarana sy ny famoizam-po ny fahendren’olombelona. Ny fahendren’Andriamanitra anefa dia niharihary ho azo ianteherana sy mahasoa foana. [Vakio Isaia 48:17, 18.] Noho izany, dia tokony hitodika any amin’Andriamanitra, izay manome antsika ny fitarihana ilaina mba handresena ireo zava-manahirana atrehintsika, isika.” Avy eo isika dia afaka manokatra ny toko faha-4 ao amin’ny boky Vaovao tsara, ka hitarika ny saina ho amin’ny fehintsoratra faha-3. Aorian’izany, dia azo ampifandraisina amin’izany ny hevitra azo ampiharina iray avy ao amin’ilay toko.
6 Rehefa avy mampiasa ny Ohabolana 2:6, 7 (fanamarihana ambany pejy) mba hampisongadinana ny maha-lehibe kokoa ny fahendren’Andriamanitra ianao, dia hazavao amin’ilay tompon-trano ny antony nahatonga anao hanaja sy hihevitra ny Baiboly ho sarobidy. Ampahafantaro azy fa hahasoa azy ireo fampianarana ao sady hanome azy fanantenana mafy orina ny amin’ny hoavy. Ny famelabelarana toy izany dia mety hanokatra fahafahana hampiseho ny sasany amin’ireo torohevitra feno fahendrena ao amin’ny Baiboly momba ireo zava-manahirana eo amin’ny fiainana andavanandro ka mety hitarika ho amin’ny fampianarana Baiboly.
7 Naka teny avy tao amin’ny Soratra masina foana i Jesosy mba hanampiana ireo olona tso-po ary mba hamaliana ireo nanohitra azy. Fanaon’i Paoly ny ‘nanazava sy nanaporofo tamin’ny alalan’ny fakàn-teny’ ireo zavatra nampianariny. (Asan’ny apostoly 17:2, 3, MN). Hitombo ny fatokian-tenantsika sy ny fifaliantsika eo amin’ny fanompoana rehefa miezaka mafy amim-pahatsorana isika mba ho kinga kokoa rehefa mampiasa ny Tenin’ny fahamarinana.