Mampiasa Tsara ny Tenin’andriamanitra ve Ianao?
1 I Jesosy Kristy no ilay mpampianatra niavaka indrindra teto an-tany. Niteny tamin’ny fomba nanohina ny fon’ny olona sy nanentana ny fihetseham-pon’izy ireo ary nanosika azy ireo hanao asa tsara izy. (Matio 7:28, 29). Nampiasa foana ny Tenin’Andriamanitra ho fototry ny fampianarany izy. (Lioka 24:44, 45). Nanome voninahitra an’i Jehovah Andriamanitra izy noho ny zavatra rehetra fantany sy hainy nampianarina. (Jaona 7:16). Namela ohatra kanto ho an’ireo mpanara-dia azy izy tamin’ny fampiasana tsara ny Tenin’Andriamanitra. — 2 Tim. 2:15, NW.
2 Ohatra niavaka koa ny apostoly Paoly tamin’ny fampiasana tamin’ny fomba nandaitra ny Tenin’Andriamanitra. Nanao mihoatra noho ny hoe namaky fotsiny ny Soratra Masina tamin’ny hafa izy; nanazava sy nanjohy hevitra ny amin’izay novakiny izy, ka nampiseho porofo avy tamin’ny Tenin’Andriamanitra fa i Jesosy no Kristy. (Asa. 17:2-4, NW ). Toy izany koa fa ilay mpianatra nahay nandaha-teny atao hoe Apolosy dia “nahery tamin’ny Soratra Masina”, ary nampiasa azy io tsara tamin’ny fampisehoana ny fahamarinana tamin-kery. — Asa. 18:24, 28.
3 Aoka ianao ho mpampianatra ny Tenin’Andriamanitra: Ireo mpitory ilay Fanjakana amin’ny andro ankehitriny dia nahita fahombiazana faran’izay tsara teo amin’ny fampianarana olona tso-po, tamin’ny fakana teny sy fanjohiana hevitra avy tamin’ny Baiboly. Tamin’ny toe-javatra iray, ny rahalahy iray dia afaka nampiasa ny Ezekiela 18:4 niaraka tamin’ny andinin-teny mifandray aminy mba hanjohiana hevitra niaraka tamin’ny pastora iray sy mpiangona telo tao amin’ny fiangonany, momba ny fiafaran’ny ratsy fanahy sy ny marina. Ho vokany, dia nanomboka nianatra ny mpikambana sasany tao amin’ilay fiangonana, ary ny iray tamin’izy ireo tamin’ny farany dia nanaiky ny fahamarinana. Tamin’ny toe-javatra hafa, ny anabavy iray dia nangatahina hanazava tamin’ny lehilahy nanohitra iray, izay vadin’ny olona liana iray, ny antony tsy ankalazan’ny Vavolombelon’i Jehovah ny Krismasy sy ny fitsingerenan’ny andro nahaterahana. Teo am-pamakian’ilay anabavy mivantana ny valiny ara-baiboly avy tao amin’ny boky Fanjohian-kevitra, dia naneho ny fanekeny izany ilay lehilahy. Ravoravo aoka izany ilay ramatoa vadiny noho ny fanekeny, hany ka nilaza izy hoe: “Ho any amin’ny fivorianareo izahay.” Ary dia nanaiky ilay lehilahy!
4 Ampiasao ny fanampiana misy: Ny Fanompoantsika Ilay Fanjakana sy ny fandaharan’ny Fivoriana Momba ny Fanompoana dia manolotra fitarihan-dalana tsara dia tsara mba hanampiana antsika amin’ny fampiasana ny Tenin’Andriamanitra. Mpitory maro no naneho fankasitrahana ny fomba fampiseho isan-karazany anoloran-kevitra izay atonta sy anaovana fampisehoana ho tombontsoantsika ary hita fa tena amin’ny fotoana ilana azy sy mandaitra. Ny Fomba Fanjohian-kevitra avy Amin’ny Soratra Masina dia mirakitra hevitra be dia be ny amin’ny fomba hanazavana tsara loha hevitra lehibe mihoatra ny 70 izay resahina ao amin’ny Tenin’Andriamanitra. Ny Fahalalana Izay Mitarika ho Amin’ny Fiainana Mandrakizay dia manome famintinana fohy ny fampianarana fototra rehetra ao amin’ny Baiboly izay ilain’ireo vaovao ho takatra. Ny fianarana 24 sy 25 ao amin’ny Boky ho An’ny Sekolin’ny Fanompoana Teokratika dia mampiseho amintsika ny fomba ampidiran’ny mpampianatra kinga sy amakiany ary ampiharany araka ny tokony ho izy ireo andinin-teny. Tokony hampiasaintsika amin’ny fomba tsara izany fanampiana rehetra azontsika raisina mora foana izany.
5 Rehefa mampiasa tsara ny Tenin’Andriamanitra isika, dia ho hitantsika fa ‘velona sy mahery izy io ka mahay mamantatra ny eritreritra sy ny fisainan’ny fon’ireo’ izay itoriantsika. (Heb. 4:12). Ny fahombiazana hitantsika noho izy io dia hanosika antsika hilaza ny fahamarinana amim-pahasahiana mbola lehibe kokoa! — Asa. 4:31.