Kolokoloy ny Fahalianana Amin’ny Fanaovana Fiverenana Mitsidika Mandaitra
1 Ny lahateny voamana tsara tsirairay dia misy fampidiran-dresaka manaitra ny fahalianana, tenan’ny lahateny ahitana fianarana ary famaranan-teny manosika hanao zavatra. Ny fampidiran-dresaka dia misarika ny sain’ny mpihaino, kanefa raha tsy misy tenany sy famaranan-teny ilay lahateny dia tsy ho feno. Mihatra amin’ny fanompoantsika koa io fotopoto-pitsipika io. Tsara dia tsara ny fanairana ny fahalianan’ny tompon-trano amin’ny fitsidihana voalohany. Kanefa tsy tokony hitsahatra ny hanolokolo izany fahalianana voalohany izany isika amin’ny fanaovana fiverenana mitsidika mandaitra.
2 Nahoana Andriamanitra no mamela ny fijaliana hisy? Fanontaniana mahatonga hieritreritra tokoa izany! Tsy manaiky ve ianao fa ao an-tsain’ny olona maro amin’izao andro izao io foto-kevitra io? Izany no antony nanipazana hevitra tao amin’ny lahatsoratra etsy ambony fa tokony hanao io fanontaniana io ianao amin’ny faran’ilay fitsidihana voalohany amin’ny fikendrena ny hamaly azy io rehefa hiverina hitsidika ilay olona ianao.
3 Ho azonao atao ny hilaza toy izao:
◼ “Manahoana ô. Fony isika niara-niresaka farany, dia nipoitra ilay foto-kevitra momba ny famelan’Andriamanitra ny fijaliana hisy, ary nampanantena anao aho fa hiverina ka hitondra fanazavana ho anao. Olona maro no mihevitra fa, raha tena miahy antsika marina Andriamanitra, dia hamarana ny fijaliana izy. Angamba ianao mitovy hevitra amin’izany koa. [Avelao hamaly ilay tompon-trano.] Manome toky antsika ny Baiboly fa tena miahy antsika tokoa Andriamanitra. [Vakio 1 Jaona 4:8.] Manana antony tsara Andriamanitra matoa mamela ny fijaliana hitohy mandrak’ankehitriny. Ny iray amin’izany antony izany dia hazavaina ao amin’ny 2 Petera 3:9. [Vakio.] Ny antony hafa dia voasoritra ato amin’ity bokikely ity.” Avy eo, dia sokafy eo amin’ny pejy faha-12-14 ilay bokikely hoe Tena Miahy Antsika ve Andriamanitra? ary miresaha momba ny hevitra iray mahaliana.
4 Ny tompon-trano sasany dia mety ho liana ny hahazo fanazavana lalina kokoa, ary mety hilaina ny hanaovana fiverenana mitsidika maromaro alohan’ny hahafa-po azy ireo tanteraka amin’ilay valin-teny. Ny toko faha-12 amin’ny boky Vaovao Tsara Hahatonga Anao ho Sambatra, izay hasongadintsika mandritra ny volana Janoary, dia azo ampiasaina ho fototra ho amin’ny fifanakalozan-kevitra hafa koa momba io foto-kevitra io.
5 Rehefa mamarana ilay fifanakalozan-kevitra ianao, dia manaova fanontaniana hafa iray ary ilazao ilay tompon-trano fa ho faly ianao hanome azy fanazavana mahaliana rehefa miverina. Olona maro no maniry hahafantatra izay mitranga amin’ny olona iray rehefa maty izy. Nahoana ianao raha manao fandaharana mba hiresahana momba izany foto-kevitra izany amin’ny fotoana mety?
6 Hanampy anao ny fitadidiana ao an-tsaina ireto fotopoto-pitsipika fototra telo ireto. Mahaiza manova zavatra arakaraka ny tarehin-javatra. Mety ho tsy zatra ny manokana fotoana voafaritra tsara mba hiresahana momba ny Baiboly ilay tompon-trano. Ataovy fohy ny fitsidihanao. Aza mijanona ela loatra na miresaka momba ny hevitra maro loatra amin’ny voalohany. Amin’ny ankamaroan’ny toe-javatra dia ho tsara kokoa ny fihetsiky ny olona eo anoloan’ny fitsidihanao raha tsy mamelabelatra afa-tsy hevitra vitsivitsy ihany ao anatin’ny fotoana fohy ianao. Manehoa fitiavana sy fisakaizana. Asehoy amin’ilay tompon-trano fa tena mihevitra ny aminy manokana ianao.
7 Ny zava-kendrentsika voalohany dia ny hampiresaka ilay tompon-trano momba ny foto-kevitra iray araka ny Soratra Masina. Avy eo, dia tiantsika ny hanomboka fampianarana Baiboly mampandroso any an-tokantranony amin’ny alalan’ny zavatra vita an-tsoratra iray mifanentana tsara, toy ny boky Hiaina Mandrakizay. Mety hahazo izany fifaliana izany ianao raha manolokolo amim-paharetana ny fahalianan’ilay tompon-trano tany am-boalohany amin’ny fanaovana fiverenana mitsidika mandaitra.