Ampio Ireo Olona Tahaka ny Ondry Hanorina eo Ambonin’ny Fototra Mafy Orina
1 Mitaky ny hanaovana mari-trano maty paika sy fiezahana mafy ny fanorenana trano iray. Rehefa vita ny drafitr’ilay trano, dia tsy maintsy omanina ilay toerana hanorenana ary apetraka ny fototra mafy orina. Maka endrika tsikelikely ilay trano kasaina haorina mandra-pahavitany amin’ny farany. Tahaka izany koa, isika dia tsy maintsy manampy ireo olona tahaka ny ondry hianatra tsikelikely ny fahamarinana. Miezaka manaitra ny fahalianana isika dieny eo amin’ny fitsidihana voalohany. Aorian’izany, dia manao fiverenana mitsidika isika, mametraka ny fototra amin’ny fampianarana ireo fahamarinana fototra momba an’Andriamanitra sy ny fikasany ho an’ny taranak’olombelona.—Lioka 6:48.
2 Alohan’ny hametrahana ny fototra anefa, dia ilaintsika ny manomana ny toerana hanorenana, raha azo atao ny milaza izany, amin’ny fiheverana ny toe-javatra misy ilay tompon-trano. Foto-kevitra inona no nodinihina teo aloha? Andinin-teny inona avy no nampiasaina? Nanao ahoana ny fihetsiny? Zavatra vita an-tsoratra inona no napetraka? Rehefa miverina dia manàna hevitra voafaritra tsara ao an-tsaina, ary aoreno tsikelikely ny fototra. Tokony hitombo ny fahalalan’ilay tompon-trano sy ny finoany an’Andriamanitra isaky ny mitsidika ianao.
3 Raha ilay boky “Hiaina Mandrakizay” no napetraka, dia ho azonao atao ny hilaza toy izao:
◼ “Faly indrindra aho mahita anao ato an-tokantranonao. Tadidinao angamba fa tamin’ny resaka farany nataontsika, dia nodinihintsika ny fihenan’ny fahalianana momba an’Andriamanitra eto amin’ny faritra misy antsika. Hamafisin’ny Baiboly mazava fa mihevitra ny taranak’olombelona Andriamanitra ka hotahina amin’ny alalan’ny Fanjakany ny olona marina. [Vakio ny Matio 6:9, 10.] Amin’ny alalan’io Fanjakana io no hanjakan’ny rariny sy ny fahamarinana.” Vakio ny Isaia 11:3-5, ary tariho ny sain’ilay tompon-trano ho amin’ireo fehintsoratra roa voalohany ao amin’ny toko voalohany amin’ny boky Hiaina Mandrakizay. Asehoy hoe amin’ny fomba ahoana no azo ianarana ilay zavatra dinihina.
4 Raha ilay taratasy mivalona hoe Fiainam-piadanana ao Amin’izao Tontolo Izao Vaovao no napetraka tamin’ny fitsidihana voalohany, dia azo dinihina indray ireo hevi-dehibe nojerena teo aloha sy ny ilana toe-piainana tsaratsara kokoa ary ireo fampanantenan’ny Baiboly. Antitrantero fa tsy maintsy mandray fahalalana marina isika mba hahafahana hiaina ao amin’ilay tontolo vaovao. Vakio ny Jaona 17:3. Hazavao fa rehefa avy nandray fahalalana marina toy izany isika, dia tsy maintsy manao ny sitrapon’Andriamanitra. Vakio ny 1 Jaona 2:17. Tariho ny sain’ilay tompon-trano ho amin’ireo hevitra voafaritra tsara eo amin’ny pejy faha-5 amin’ilay taratasy mivalona.
5 Raha momba ny fiainam-pianakaviana no nohamafisina tamin’ny fitsidihana voalohany rehefa napetraka ny boky “Hiaina Mandrakizay”, dia ho azonao atao ny hilaza toy izao:
◼ “Tamin’ny fitsidihako farany, dia niresaka ny amin’ny fiainam-pianakaviana isika. Nanaiky isika fa mba hananana fiainam-pianakaviana sambatra, dia tsy maintsy arahina ireo torolalana hita ao amin’ny Baiboly. Inona no ilaina, araka ny hevitrao, mba hahombiazan’ny fanambadiana?” Avelao ilay tompon-trano hilaza ny heviny. Asongadino ireo hevitra voafaritra tsara hamafisina eo amin’ny pejy faha-243-246 amin’ny boky Hiaina Mandrakizay. Anontanio ny hevitr’ilay tompon-trano ny amin’ireo sary ary mandiniha hevitra nofantenana, hitanao fa mifanentana. Antitrantero ny maha-azo ampiharina ireo fotopoto-pitsipiky ny Baiboly.
6 Raha ilay taratasy mivalona hoe Une vie de famille agréable no napetraka, dia diniho indray ireo fotopoto-pitsipika fototra ao amin’ny Baiboly hamafisina eo amin’ny pejy faha-4 sy faha-5. Raha nisy fahalianana dia atolory ny boky Hiaina Mandrakizay. Mariho ny toko faha-29 hoe “Mahità Fahombiazana eo Amin’ny Fiainam-pianakaviana” ary asehoy ny fomba azo iaraha-mandinika azy io amin’ilay tompon-trano sy ny fianakaviany.
7 Tokony handray anjara tsy tapaka amin’ny fanaovana fiverenana mitsidika isika rehetra. Araho hatrany ny fahalianana rehetra naseho, amin’ny fanaovana fiverenana mitsidika mandaitra mandritra ny Septambra.