Tena Mahasoa ny Mahatsiaro Izay Nataon’i Jehovah!
1 Nahazo herin’ny fanahy masina ny mpanoratra ny Salamo 48, ka nampirisika ny Israelita ‘hanodidina an’i Ziona, hanisa ny tilikambony, hihevitra tsara ny mandany, mba hanambarany izany amin’ny taranaka mandimby.’ Tia an’i Jehovah izy ireo, ka tena liana tamin’ny tsipiriany rehetra tamin’io foiben’ny fitondran’Andriamanitra teto an-tany io. Tena sarobidy izany tsipiriany izany, satria tao amin’io tanàna io no nametrahan’i Jehovah ny anarany! Niresaka momba azy io izy ireo, ary tsy maintsy nataony azo antoka fa nahafantatra ny zava-tsarobidy rehetra tao am-pony ny taranany.—Sal. 48:12, 13.
2 Tsy any Ziona eto an-tany intsony ny foiben’ny fitondran’ny Mesian’i Jehovah ankehitriny, fa any Jerosalema any An-danitra. (Heb. 12:22) Nanomboka nitondra ny Fanjakan’i Jehovah tarihin’i Jesosy Kristy, tamin’ny 1914. (Apok. 12:10) Ny asan’izy io no mahaliana antsika indrindra. Tena mahaliana antsika koa ny fomba itarihan’i Jehovah ny mpanompony eto an-tany, mba hanatanterahan’izy ireo ny sitrapony, satria solontenan’ilay Fanjakana eto an-tany izy ireo. Misy tsipiriany mahaliana momba izany resahin’ilay bokintsika vaovao hoe Vavolombelon’i Jehovah—Mpitory ny Fanjakan’Andriamanitra. Tena faly isika nahazo an’io boky io tamin’ny Septambra lasa teo.
3 Nahazo tamin’izy io ve ny ankohonanao? Mamaky azy io ve ianareo? Miresaka momba ny zavatra nianaranareo avy tamin’izy io ve ianareo? Rehefa avy nijery ny sary sy ny fanazavana miaraka aminy ny rahalahy sy anabavy maro, dia nandinika avy hatrany ny votoatin’ilay boky. Inona no nolazain’izy ireo? Izao ny sasany amin’izany.
4 Hoy ny anabavy iray: “Io boky io ihany hatramin’izay no tsy andriko ny hamitana azy mba hamakiako azy indray. Eo amin’ny toko faha-25 aho izao. Arakaraka ny amakiako, no mampirotsaka ny ranomasoko, ary vao mainka feno fitiavana an’i Jehovah ny foko. Tena mampahery sy manatanjaka finoana ilay boky.”
5 Hoy ny rahalahy iray efa nanompo an’i Jehovah hatramin’ny 40 taona mahery: “Tsy azoko an-tsaina mihitsy teo aloha fa tena hahaliana ilay boky. Alina be aho vao natory, sady nifoha maraina be koa, ka vitako tao anatin’ny tapa-bolana ny famakiana azy. Io tokoa no iray amin’ireo boky mampihetsi-po indrindra novakiko hatramin’izay. Nanaovana fikarohana lalina izy io, sady tena feno fampaherezana ao anatiny.”
6 Fandaharam-pamakiana tsy tapaka: Tapa-kevitra ny hamerina hamaky miadana kokoa an’ilay boky ny sasany tamin’ireo nahavaky azy io haingana.
7 Raha misy ao amin’ny fahamarinana ny mpianakavinao, dia mety ho tianao ny hampiasa ny ampahany amin’io boky io amin’ny fianaram-pianakavianareo. Nisy fianakaviana nanomboka nanao izany, andro vitsivitsy taorian’ny naharaisany azy io tany amin’ny Efitrano Fanjakana. Tsy midika akory izany fa tokony hajanona ny zavatra sasany, toy ny fanomanana ny Fianarana Ny Tilikambo Fiambenana. Mety ho hitanao fa hahasoa anefa ny manokana 15 na 20 minitra fanampiny, mba hamakiana sy hiaraha-midinika hevitra avy amin’ny boky Mpitory.
8 Ny fianakaviana hafa kosa mamaky pejy roa na telo, angamba lohatenikely iray na roa, isan-kariva, rehefa avy misakafo. Mety ho efa samy namaky ampahany betsaka tamin’ilay boky izy ireo. Be kokoa anefa ny soa raisin’izy ireo, rehefa vakina miadana kokoa ilay izy, sady resahina ny hevitra novakina. Efa nanompo an’i Jehovah nandritra ny taona maro ny sasany amin’ireo manao izany. Zavatra maro no mitamberina ao an-tsainy eo am-pamakiana ilay boky. Tena faly ny fon’izy ireo rehefa miresaka ny anjara noraisiny tamin’ireo zava-nitranga.
9 Ianao irery angamba anefa no mamaky an’ilay boky ao an-trano. Nanoratra ho an’ny fandaminana ny anabavy iray hoe: “Mamaky ampahany kely amin’io boky io aho isan-kariva, alohan’ny hatoriana. Manjary ankasitrahako sy tiako kokoa ny fahamarinana, ary lasa akaiky kokoa an’i Jehovah aho, sady tena misaotra azy, noho izaho anisan’ny fandaminany. Tena ankafiziko ny pejy tsirairay vakiko.”
10 Lehibe ilay boky, nefa fohy ny fizarana tsirairay. Fanazavana fohy nefa mahaliana momba ny zava-nitranga nanomboka tamin’ny andron’i Abela ka hatramin’ny taona 1992, no ao amin’ny fizarana voalohany, izay 108 pejy monja. Misy 13 ka hatramin’ny 150 ny isan’ny pejy amin’ny fizarana hafa. Misy toko maromaro ao anatin’ny fizarana tsirairay. Aza vakina maimaika izy ireny, fa fizarana iray na toko iray na lohatenikely iray ihany vakina isaky ny mandeha. Ankafizo izany, ary tadiavo ny soa azo avy aminy.
11 Makà fotoana hieritreretana izay vakinao: Inona no tokony ho zava-kendrenao eo am-pamakiana azy io? Tsy tokony ho ny hamaky pejy maro mba hamitana azy fotsiny. Mirakitra ny lovanao eo amin’ny fanompoana ny boky Mpitory, ka tokony ho fantatrao tsara izay raketiny. Makà fotoana handinihana ny zavatra tafiditra amin’izay vakinao. Jereo ny fomba hanahafana ny finoan’ireo Vavolombelon’i Jehovah fahiny, rehefa mamaky momba ny asan’izy ireo ianao. (Heb. 12:1, 2) Rehefa mamaky momba ilay fivadiham-pinoana lehibe ianao, dia mariho manokana ny zavatra namandrika an’ireo nivadika, mba hiarovanao ny fifandraisanao amin’i Jehovah. Ary rehefa mijery ny tantarantsika amin’ny andro ankehitriny ianao, dia jereo ny toetran’ireo nampiasain’Andriamanitra. Jereo koa ny fomba nanehoan’izy ireo fa ny fanaovana ny sitrapon’Andriamanitra no zava-dehibe indrindra teo amin’ny fiainany. Diniho ny fomba niatrehany ny olana navelan’Andriamanitra hiseho, na dia tena sarotra aza ny sasany taminy.—Heb. 13:7.
12 Hanatanjaka ny finoana ny mandinika ireo tsipiriany mampiseho ny fomba nitarihan’i Jehovah ny vahoakany, mba hahatakaran’izy ireo tsara ny fahamarinana ao amin’ny Baiboly, araka ny ahafantarantsika azy ankehitriny. Vao mainka hankasitraka ny fandaminan’i Jehovah hita maso ankehitriny ianao, rehefa fantatrao tsara kokoa ny fivoaran’ny fandaminana. Azo inoana fa faly ianao rehefa mahita fa tanteraka ilay faminaniana hoe ho tonga hatrany amin’ny faritra lavitra indrindra amin’ny tany ny vaovao tsara. Hahafaly ny fonao ny zavatra niainan’ireo nahatoky eran-tany, izay nazoto nitory ilay Fanjakana. Hanatanjaka anao mba hiatrehanao ny fitsapana mianjady aminao ny famakiana ny zavatra niaretan’ireo rahalahy sy anabavy nahatoky, noho izy ireo tia an’i Jehovah.
13 Makà fotoana hiresahana ny hevi-dehibe sy ireo tsipiriany, isaky ny avy mamaky amin’ilay boky ianareo. Raha manan-janaka mbola kely ianao, dia asao izy hanazava ny sary sy hilaza ny zavatra fantany momba ireo olona hitany eo. Na dia mamaky irery aza ianao, dia miezaha hiresaka amin’olon-kafa, momba ny zavatra nianaranao. Raha mety, dia ampiasao amin’ny fiverenana mitsidika sy fampianarana Baiboly ny zavatra novakinao. Hilentika kokoa ao an-tsainao sy ao am-ponao ilay izy, rehefa averimberinao, sady hahasoa ny olon-kafa koa.
14 Diniho ireo tsipiriany: Tokony hahafaly sy handraisan-tsoa ny fotoana atokanao hamakiana ny boky Mpitory.
15 Tianao hitsidika ny foiben’ny Vavolombelon’i Jehovah ve ny fianakavianao? Aseho eo amin’ny pejy 208-209 ny trano nampiasain’ny fandaminana tany Pittsburgh, zato taona lasa izay. Eo amin’ny pejy 216-217 kosa ny sarin’ireo trano nampiasaina tany Brooklyn, tatỳ aoriana. Manampy anao hahazo sary an-tsaina ny foibe ankehitriny ny pejy 352-356. Resahin’ny toko 26 sy 27 ny tsipirian’ny asa atao any amin’ny Betela, ary hazavain’ny pejy 295-298 ny fiainana ao.
16 Tsy afaka mitsidika an’ireo biraon’ny sampan’ny Vavolombelon’i Jehovah ny ankamaroantsika. Mitondra anao mitety an’izao tontolo izao anefa ny pejy 357-401 amin’ny boky Mpitory. Tsy misy antony hamitana azy io maimaika. Manokàna fotoana kely hijerena sy hankafizana ny tany tsirairay. Ampiasao ny sarintany, eo amin’ny pejy 415-417, mba hijerena ireo toerana. Vakio ireo fanazavana momba ny sarin’ny sampana tsirairay. Hahita fanazavana hafa mahaliana momba ny tany tsirairay ianao, raha mijery ny fanondroana teny. Hararaoty izany mba hahalalana tsara ireo mpiray finoana aminao any an-tany hafa.
17 Manao kilalao ampahafantarana zavatra tsy ara-pivavahana ny olona indraindray, rehefa miala voly. Tsy hahasoa kokoa ve ny mahafantatra daty sy zava-nitranga teo amin’ny tantaran’ny vahoakan’i Jehovah ankehitriny? Misy lisitry ny maro amin’izany eo amin’ny pejy 718-723 amin’ny boky Mpitory. Ny zava-nisongadina no omen’io lisitra io, fa azonao atao ny manampy tsipiriany hafa hita ao amin’ilay boky. Ampiasao ireny mba hanaovana famerenana. Mora mahatadidy azy ireny angamba ny tanora, fa mety ho sahirana kokoa ny efa lehibe. Tsipirian’ny tantaran’ny vahoakan’i Jehovah anefa ireny, ka mahasoa antsika rehetra ny mahalala azy. Tadidio tsara aloha ireo daty sy zava-dehibe. Jereo ny tsipiriany tadidinao momba ny zava-nitranga tsirairay. Resaho avy eo ny ifandraisan’ilay izy amin’ny fanatanterahana ny sitrapon’Andriamanitra. Aorian’izay, dia resaho ny vokatr’izy io eo amin’ny fiainanao sy ny anjara raisinao amin’ny zavatra ataon’i Jehovah.
18 Fantaro izay mbola azonao atao: Rehefa mamaky sy miresaka momba ny boky Vavolombelon’i Jehovah—Mpitory ny Fanjakan’Andriamanitra ianao, dia ho hitanao fa tanteraka ny Isaia 60:22. Hoy ilay boky, eo amin’ny pejy 519: “Tanteraka tokoa ilay fampanantenana hoe ‘ny kely ho tonga arivo’! Tsy nisy ‘kely’ na Vavolombelona iray akory nitory, tany amin’ireo tany maherin’ny 50, tamin’ny 1919, nefa efa mihoatra ny arivo izao ny mpidera an’i Jehovah any. Misy an’aliny, na mihoatra ny iray hetsy mihitsy ny Vavolombelona any amin’ny sasany amin’ireo tany ireo, ary mazoto mitory ny Fanjakan’Andriamanitra izy ireo! Lasa ‘firenena mahery’ ny Vavolombelona eran-tany, satria maro kokoa noho ny isan’ny mponina any amin’ny tany 80, fara fahakeliny, ny isan’izy ireo eo anivon’ny fiangonana eran-tany.”
19 Mbola tsy mifarana anefa io fitomboan’ilay Fanjakana io fa vao mainka hafainganin’i Jehovah. Hatraiza ny anjara raisinao amin’izy io? Tena fantatrao ve ny zavatra rehetra mbola azonao atao? Eo am-pandinihanao izay nataon’ny olon-kafa, dia enga anie ny fonao ka hanosika anao hahafoy tena mba handray anjara amin’ny fomba feno amin’ilay asa lehibe atao amin’izao andro izao, eo ambany fitarihan’ilay Andriamanitra fitiavana amin’ny alalan’i Jesosy Kristy.