Miverena any Amin’izay Nahitanao Fahalianana
1 Maro amintsika no nahita fahombiazana teo amin’ny fizarana gazety sy bokikely. Zava-dehibe ny hiverenantsika sy ny hiezahantsika hanaitra fahalianana fanampiny. Mety hiankina amin’ny fomba fiomanantsika tsara alohan’ny hanaovantsika fiverenana mitsidika iray ny fahombiazantsika amin’izany.
2 Tadidio fa ny zavatra mampanahy ny olon-dehibe ihany koa no ahin’ny ankamaroan’ny tanora. Ao amin’ny nomeraon’ny Mifohaza! dia misy lahatsoratra izay mandinika ireo zava-manahirana miseho ankehitriny araka ny fahitan’ny tanora azy. Manome fahatakarana hevi-dalina izay afaka manampy ny tanora ireny lahatsoratra ireny, ary koa manampy ny ray aman-dreniny hahatsapa izay tena zava-dehibe eo amin’ny fiainana. Ireo foto-kevitra nodinihina vao haingana tao dia: momba ny SIDA (N° 1/94), ny fanapahan-kevitra hifindra any amin’ny tany manan-karena kokoa (N° 4/93) sy ny mozika (N° 2 sy N° 3/93) ary ny vavaka (N° 1/93). Ampiasao mba hanombohan-dresaka amin’ny tanora sy ny ray aman-dreniny ireny foto-dresaka ireny.
3 Mety hanapa-kevitra ny hanolotra bokikely iray ianao amin’ny fampiasana itỳ tari-dresaka itỳ:
◼ “Nahafaly ahy ny dinidinika fohy farany nataontsika momba ny hoavin’itỳ tany itỳ. Azonao an-tsaina ve hoe ho toy inona ny fiainana eto rehefa hamarana ny faharatsiana sy ny fahoriana Andriamanitra? [Asehoy ny sary eo amin’ny pejy faha-31 amin’ilay bokikely hoe Inona no Zava-kendren’ny Fiainana? — Ahoana no Mety Hahitanao Azy Io?] Mariho ange ireto andinin-tenin’ny Baiboly rehetra ireto e, eo amin’ny pejy faha-29 sy faha-30, izay milazalaza ireo fitahiana hoentin’ny Fanjakan’Andriamanitra. [Mifidiana andinin-teny iray, ary vakio mivantana ao amin’ilay bokikely.] Ho tiako ny hametraka azy itỳ aminao amin’ny fandraisana anjara an-tsitrapo 300 FMG.”
4 Rehefa miverina ianao, dia angamba hampahafantatra anao ilay tompon-trano fa efa manana ny zavatra vita an-tsoratra ara-pivavahana azy manokana izy, ka mahatsapa fa ampy azy izany. Ho azonao atao ny hilaza toy izao:
◼ “Na inona na inona fivavahantsika, dia voakasiky ny maro amin’ireo fanahiana mitovy ihany isika rehetra — ny heloka, ny aretina mafy, ny fanahiana noho ny fahasimban’ny tontolo iainana — tsy izany ve? [Avelao izy hamaly.] Araka ny hevitrao, mety hisy tena fanafodiny amin’ireny zava-manahirana ireny ve? [Vakio ny 2 Petera 3:13.] Ny zava-kendren’ny zavatra vita an-tsoratray dia voalaza eto amin’ny pejy faha-2 amin’ny Ny Tilikambo Fiambenana. [Vakio ny fehezanteny voafantina iray na roa.] Olona maro izay tsy Vavolombelon’i Jehovah no faly mamaky ny zavatra vita an-tsoratray noho ny hafatra mahavelom-panantenana ao anatiny, izay miorina amin’ny Baiboly.” Raha maneho fihetsika tsara ilay tompon-trano dia hazavao ny fandaharam-pianarana ny Baiboly ataontsika.
5 Ho azonao atao ny hanao izao tari-dresaka izao:
◼ “Fony aho tonga farany teto aminao dia niresaka isika ny amin’ny fahatsinjovan-javatra ho avy ho an’ny tontolontsika. Inona ny hevitrao momba itỳ tatitra itỳ? [Lazao izay zava-nitranga vao haingana mampanahy.] Rehefa mandre zavatra tahaka izao ny olona, dia mahatonga azy hanontany tena izany hoe inona no hiafaran’itỳ tontolo itỳ, sa tsy izany? Mino izahay fa ny zavatra toy izao dia manondro fa miaina amin’ny “andro farany” nambara mialoha tao amin’ny Baiboly eo amin’ny 2 Timoty 3:1-5 (NW) isika.” Rehefa voavaky ireo hevi-dehibe, dia afaka manontany ianao raha efa nahita olona mifanitsy amin’izany filazalazana izany izy. Tohizo amin’ny fandinihana iray amin’ireo lohatenikely eo amin’ny pejy faha-43–48 amin’ny boky Fanjohian-kevitra.
6 Raha miomana tsara sy mampiseho tena faniriana marina hanampy isika, dia afaka matoky fa hihaino ireo olona tso-po. — Jaona 10:27, 28.