Tsarovy avy Hatrany ny Gazety Mandritra ny Volana Oktobra
1 Ny Tilikambo Fiambenana sy ny Mifohaza! dia mirakitra hafatra feno fampiononana sy fampaherezana, izay misy vaovao tsara mandrakizay. Tafiditra amin’ny hoe mahatsiaro avy hatrany ny gazety ny fakana fotoana hamakiana azy ireo amim-pitandremana sy handinihana ny fomba mety hanintonan’ireo lahatsoratra ao an’ireo olona eny amin’ny faritanintsika.
2 Voalohany aloha, dia fantaro tsara ireo lahatsoratra asongadin’ilay fonony. Ireo sary eo amin’ny fonony fotsiny matetika dia efa hanosika ny olona haka ireo gazety. Mifidiana lahatsoratra izay heverinao fa mety hanintona ny olona eo amin’ny faritaninao. Moa ve ny ankamaroan’izy ireo anisan’ny fivavahana iray ihany? Inona no zavatra ahin’izy ireo voalohany indrindra? Amin’ny fihazonana ireo zavatra ireo ao an-tsaina, dia tokony ho afaka hanomana fomba fampiseho mandaitra ianao. Mariho ireto atolotra eto ambany ireto.
3 Raha manolotra “Ny Tilikambo Fiambenana” tamin’ny 1 Oktobra ianao, dia ho azonao atao ny hanasongadina ilay lahatsoratra hoe “Ny Baiboly — Manao Ahoana ny Tena Hasarobidiny?” Azonao atao ny milaza hoe:
◼ “Afaka mahita Baiboly saika ao amin’ny tokantrano rehetra eto amin’ny manodidina antsika ianao. Maro amin’ireo izay manana Baiboly no mihevitra fa mirakitra zavatra misy vidiny manokana izy io.” Avy eo dia ho azonao atao ny hanao fanontaniana mivantana toy ny hoe: “Inona no eritreretinao fa mahatonga ny Baiboly ho tsy manam-paharoa?”, na ny hoe: “Inona no eritreretinao fa hanampy olona betsaka kokoa handray soa avy amin’ny Baiboly?” Aorian’ny valin-tenin’ilay tompon-trano, dia mety ho afaka hanohy hilaza teny mifanentana toy izao ianao: “Misy porofo tondraka momba ny maha-ara-tsindrimandrin’Andriamanitra sy ny maha-mpitari-dalana azo itokiana ho antsika ny Baiboly. Mirakitra fahalalana izay afaka mitarika antsika ho amin’ny fiainana mandrakizay izy io. [Vakio ny Jaona 17:3.] Olona maro no manaja azy, nefa tsy mahafantatra ny fomba fampiasa azy. Itỳ lahatsoratra ato amin’ny Ny Tilikambo Fiambenana itỳ dia manazava ny fomba ahafahan’ny tenanao mampiasa ny Baiboly mba hahazoana valiny ho an’ireo fanontanianao momba ny hoavy. Tiako ny hametraka itỳ gazety itỳ aminao. Raha tianao ilay izy, rehefa miverina amin’ny manaraka aho, dia hampiseho aminao ny fomba hahazoanao Ny Tilikambo Fiambenana tsy tapaka.”
4 Raha mampiasa “Ny Tilikambo Fiambenana” tamin’ny 15 Oktobra ianao, dia mety ho tianao kokoa ny tari-dresaka tsotra toy itỳ:
◼ “Saika ny olona rehetra dia efa namoy olon-tiana iray tamin’ny fahafatesana. Itỳ lahatsoratra itỳ dia mametraka ilay fanontaniana hoe ‘Manao Ahoana ny Toetran’ny Maty?’ Inona no eritreretinao fa mitranga rehefa maty ny olona iray? [Avelao ilay olona hamaly.] Raha tianao ny hahafantatra ny fomba amalian’ny Baiboly io fanontaniana io, dia ho faly aho ny hametraka itỳ gazety itỳ aminao.” Ataovy vonona ny taratasy mivalona hoe Manantena Inona ny Olon-tiana Nodimandry? mba hanoloranao azy an’ilay tompon-trano raha fanazavana fohy kokoa no tiany.
5 Miezaha hanolotra famandrihana isam-baravarana, na dia tsy afaka miresaka momba ny Baiboly aza ianao. Raha tsy ekena ny famandrihana, dia manolora gazety.